Vanlawng ralkap Cap. Mohtung le ralkap Thiha nih Min Aung Hlaing An zam tak!
Breaking News: Vanlawng ralkap Cap. Mohtung le ralkap Thiha cu CDM an tuah!
=========
Ralhrang kuttang ah rianṭuan duh loin a nuar (CDM) mi vanlawng ralkap 100 leng an si cang tiah Pyituhpantai phu sin in theih a si. February 22 ah Captain Mohtung, February 24 ah van khamnak ralkap in Thiha cu MA3 zuun 2 he mipi sin ah aa fon i a tu ahcun himnak hmun a phan cang tiah theih a si.
Mipi sin ah aa rak fonhmi Cap. Mohtung le Thiha hna cu a rauh hlan ah mipi he theihternak kan tuah lai tiah Pyituhpantai phu nih an chim. Ralhrang nih mipi cungah vanlawng in bom a thlak lengmangmi hi celh a si lo tiah Cap. Ze Thu Aung, Cap. Mohtung, Sergeants pawl le vanlei ralkap 100 leng cu CDM tuah in mipi lei an ṭang cang.
Cubantuk ṭhiamṭhiam in, 2021 April ah CDM a tuahmi Sergeant. Naung Yo zong himnak hmun ah kuat a si cang tiah Khit Thit thawngzamh nih a ṭial.
Demoso kahdohnak ah ralhraang 20 leng an thi, raltuknak motor pakhat a rawk. Kayah (Karenni) ramkulh, Demoso peng chung kahdohnak ah ralhraang raltuknak motor pakhat a rawk i ralhraang 20 leng an thi tiah Demoso PDF nih an thanh.
March 1 ah Demoso peng, Kyuntaw khua ah raltuknak motor he umhmun a khuar mi council ralhraang 100 cu Karenni PDF phukomh nih kan kah hna tiah an chim.
Zaannlei suimilaam 2:00 in 5:00 tiang suimilaam 3 chung an i kap i ralhraang 24 an thi. PDF phukomh nih hriamnam ngan in an kah hna caah ralhraang raltuknak motor pakhat a rawk tiah Demoso PDF nih an chim. Hi kahdohnak hi DMO Local-PDF, Loikaw PDF, KNDF, KA, အလယ်ပိုင်း အထူးစစ်ဆင်ရေးတပ် le dothlennak a tuahtu pawl komh in an tuah mi a si i tangti phukomh lei in pakhat hma a pu tiah an thanh.
Council ralhraang hna nih Demoso peng chung hmunhma hna lak ding in thazaang tamtaktak a chap ca ah ralzaam an karh i a rak zaam ciami pawl zong hmundang ah an zaam than tiah an thanh.
“Ukraine Lei Ah Kan Dir” Tiah Myanmar Nih UN Ah Vote A Thlak. Russia nih Ukraine a tukmi kong he pehtlai in United Nation General Assembly (UNGA) lakhruak tonpumhnak cu February 28 in an thawk i, “Ukraine mipi lei ah Myanmar kan ttang,” tiah UN ah Myanmar aiawhtu palai a simi U Kyaw Moe Tun nih a chim.
SAC nih Myanmar ram uknak an chuh hnu ah UN nih SAC palai a cohlang hna lo. Ahlan i a rak ttuan tthingmi (Myanmar mipi lei a dirmi) U Kyaw Moe Tun tu hi Myanmar aiawhtu palai ah an cohlanmi a si. Ukraine kong he pehtlai in United Nation Security Council (UNSC) nih lakhruak tonpumhnak a tuah nain Russia mawhphorh ding timi biatung cu amah Russia lila nih Veto Power nih a hnon caah UNGA lakhruak meeting an auh tthan hi a si.
UN ah Russia Ramleng Vuanci Biachim lio ah an Chuahtak Dih. Nihin March 1 ah UN Conference tonpumhnak cu Switzerland ram, Geneva khua ah an tuah i, Russia ramleng vuanci Sergey Lavrov nih biachimnak a thawk lecangka in EU chungtel ram aiawhtu hna le US hawikom ram aiawhtu hna nih a biachim lio ah an chuahtak dih colh.
Russia ramleng vuanci biachim lio ah an chuahtak dihmi video cu French aiawhtu palai nih a tar i, “Ukraine he kan dir tti timi langhternak ca ah Minister Lavrov biachim lio ah kan chuahtak dih,” tiah a ttial. Nihin UN Conference ah Russia cu minung pum in rak kai lo in video call tu in a kai.
Cu kong he pehtlai cun Minister Lavrov nih, “EU nih Russia cung ah a tuahmi sipuazi dantatnak hi cohlan khawh hrimhrim a si lo caah punpak in tonpumhnak ah kan kai lonak a si,” tiah a chim.