US University Hmanh Ah A Lar Vemi Ka Si Hi, Chin Minta-kyi Ka Si Hi

US university hmanh ah a lar vemi ka si hi. Chin minta-kyi ka si hi. Laitlang in cang-ai khorh le lothlo dirhmun in US ram a phanmi, ABC rel hmanh a thiam lomi pawl nan sinah Christmas daihnak le remnak, lawmhnak, biachim holhrel thiamnak, nun nemnak, thinfualnak le toidornak, fimnak, biadawh hmanzia thiamnak, thinhar i sum khawhnak, ruahdomh biachim lo ding nunzia thiamnak, dawtnak, ruahchannak, dinnak, ninghngal lonak, mi upat zia thiamnak, Khrihfa ttha sinak, mi bawmh duhnak, zei ngai si ttung lo i sang ngai i ruah lonak, Khrihfa biaknak le cawnpiaknak i nun pinak, vialte cu nan cungah um ko seh tiah thla kan campiak hna.

Thlarau tthalo cu Saul cungah a tlun bang, Trump ttanhtu pawl cheukhat sin zongah thlarau tthalo cu a lut ve tawn. Chinmi lakah, Trump ttanhtu pawl hi 100 ah 85 hrawng cu a piangthar lomi (hrintthan lomi) nan si, ti khawh si. Mah cu comment le ca nan ttialmi zoh in a thei ko. Nan thin a harning, mi nan volhpamh ning, holh dawh lo nan hmang ning, le na fim loning le Biden a ttantu pawl nan kan huatning pawl nih a langhter dih ko. Trump vote pek ding in an forhtu hna nan hruaitu pawl zong, Trump an ttanhnak kongah cun an piangthar ve lo ti khawh an si. Keicu pastor ttuan ning law ka Khrihfa bu sinah bia ttha tein ka cah hna lai, facebook i comment le catial kongah. Thin i sum ding, biadawh deuh le bianem hman ding, le dawtnak le fimnak he cattial ding ti pawl in. Atutan US thimnak ah, Biden le Trump a ttanhtu pawl karlak ah thil ka hmuhmi a um ve, kan Khrihfa sinak ah le kan thinlung put le kan ziaza ah.

Chinmi lakah, Trump ttanhtu a tamdeuh pawl cu (nan zate nan si ve lo), thlarau tthalo nih a luh hnawhmi Saul siangpahrang he nan i lo ngai hna. Saul cu thlarau tthalo nih a luhhnawh caan poah ah David cu thah ding a dawi peng (1 Samuel 19). A dam caan ahcun maw David, ka dawt tukmi ka fapa a ti. Asinan Pathian nih a hlawt hnuah cun thlarau tthalo a chungah a lut ciammam i David cu thah ding in a dawi peng. Trump le a ttantu pawl zong nan sungh hnu cun thlarau tthalo nan chungah a lut ve i hehtiah Biden a ttanhtu pawl nan kan huat i nan thinhar buin nan kan volhpamh len ve. Zeizong tein nan kan ti. Biden le Democratic party zong zeizong tein nan ti hna. Thlarau tthalo nan chungah a luh caah a si. Thlarau ttha lo nih luh hnawhmi cu Pathian hlawtmi nan si tinak a si ko.

Pathian thlarau cu David chungah a um bang in Biden le a ttanhtu pawl kan chung zongah Pathian thlarau cu a lut ve i comment kan pekmi le ca kan ttialmi zongah fimnak, nemnak, toidornak, thinfualnak, dawtnak, fimkhur te umnak, biadawh le thluachuak bia, biadik le biahman, mi ngaihthiamnak le mi theihthiamnak pawl an i tel peng lai. Saul cu thlarau tthalo nih a luh hnawh caan poah ah David cu an va auh i tingtang a tumpiak hnu ah a dam tawn ti kan hmuh (1 Samuel 16:14-23). Cu ve bantuk in Trump le a ttanhtu pawl, thlarau tthalo nih an luh hnawhmi hna damternak ding caah, Biden le a ttanhtu pawl sinah ra ve uh law kan in cawnpiak hna hnu le thla kan in camh hna hnuah tingtang kan in tumpiak ve hna lai i David bang in cucun damnak tling nan hmuh ve ko lai/nan piangthar ve ko lai. Nunnem le toidor nun nan nei ve ko lai. Dawtnak he. Merry Christmas to you all!

Relchap, Keimah ka hmuhning te kan hrawmh ve hna. Keimah ka hmuhning ka van nolh tthan ahcun Trump nih Khrihfa a dawt terning hna le a ttanh terning hna cu Bawi Zisuh leirawitu le zuartu, Judas Iscariot nih vawlei khamhtu Bawi Zisuh, a hmai ah a hnamhter he a lo bakte a si/a khat bak ka ti. Aruang cu Trump nih US president si duhnak (Dictatorship uknak bantuk in) caah le amah chungkhar sipuazi hlawknak caah Khrihfa biaknak cu a dawtter i a ttanhter. Judas Iscariot zong nih ngun tangka 30 hmuhduh ah Bawi Zisuh cu a hmai ah a hnamhter ve (Matthai 26:15-16). Mah cu Khrihfa tampi nih kan i fiang rua lo ka ti. Asinan Democratic party le Biden nih cun Trump i Khrihfa biaknak a dawtter mi aruang cu an i fiangtuk i Trump timhtuahnak a ttha lomi chung in US ram democracy uknak cu an chanh manh.

Trump nih US democracy uknak kum 200 leng a kal cangmi cu hrawh a timh i amah pumpak duhnak le hlawknak le min larnak ding caah kalpi a timh. Nan Bawipa Pathian nih US mipi thinlung ah rian a ttuan i Trump timhtuahnak le duhfah hakkauhnak cu thingkung pi bang in a tlu ruangmang ai cang ne. Trump nih US democracy uknak cu, Than Shwe le Kim Jong-un nih Kawlram le North Korea ram an uk bantuk in uk a timh ve. Mahcu Republican party le Trump ttanhtu pawl nih an thei lo i an i fiang lo. Bawi Zisuh cu fimnak le ti khawhnak le hngalh khawhnak in a khatmi a si caah Judas Iscariot nih a zuar lainak kong zong a theihcia dih i a zuarnak ding a ruang cu a hngalh cia. Democratic party le Biden nih cun Trump biathli le bia thuhruk cu an theih khawh ve. Phundang in kan chim ahcun Thlarau nih a bawmh hna kan ti lai cu. Matthai 10:16 chungah kan hmuhmi cu “Ngai hmanh u! Cenghngia hrang rual lak i thlahmi tuu bantukin kan thlah hna.

Cucaah rul bantukin vaa fim u law ṭhuro bantukin nan nun va nem u,” ati. Democratic party le Biden a ttanhtu pawl cu rul bantukin kan fim i tthuro bantukin kan nun a nem fawn. Lamkaltu 1:18 chungah kan hmuh rihmi cu “Judas nih khan thil ṭhalo a tuahmi man ah tangka a hmuhmi khan lo pakhat a cawk i cuka ah cun thi lakin a tlu i a kek dih i a chungril vialte a chuak dih.” Trump zong Judas bang in US president sinak in a dinh hnu ah tazacuainak, harnak, hnahnawhnak le buainak a phun2 tong te dawh a si ve ko hi. Amah a ttanhtu pawl nih hehtiah thla nan campiak chung a hau rih ko lai hi. Merry Christmas to you all! Credit: Saya Van Tum