US Tlawng Dingmi Nih Covid-19 Test Tuah Ding

US Tlawng Dingmi Nih Covid-19 Test Tuah Ding
**********************
Tuchun ah White House Press Secretary Jen Psaki nih White House ah Press Conference a tuah i, thaizing thawk in US ah a rak lut dingmi paoh nih Covid-19 negative test tuahmi result nan i ken dih lai tiah a chim. US kalnak vanlawng chung luh hlan nithum a duh ah negative test nak tuahmi result a si lai ti a si.

US ah covid-19 zawtnak a zual chin caah atu bantuk in khen khamnak le visa renghnak an tuahmi a si. UK, Europe le Brazil ram ah khual tlawn le luhchuah zong kham rih a si lai. South Africa zong a thar in President Biden nih khualtlawn luchuh kham dingah a timhmi chungah a tel. South Africa ah hin Coronavirus in a sem chinmi, Coronavirus zawtnak phundang an hmuh chap caah atu bantuk visa le luhchuahnak rengh an timhnak cu a si. Brazil, Ireland, UK, European ram cheukhat le South Africa in US Citizen a si lomi poah luh khawh a si rih lai lo. Cucaah Kawlram in US a luh dingmi paoh nih vanlawng nan I cit hlan nithum lawng a duhmi Covid-19 negative test result nan I khen hrimhrim lai. Nan I ken lo ahcun vanlawng ah luhter nan si lai lo.

Relchap Magyn Kelly: Capitol Buainak Cu Media Ruangah Si. US nu Journalist vialte lak ah mintang bik a simi Megyn Kelly nih Capitol Hill buainak a chuahnak a ruang taktak cu, Main stream media CNN le media ngan pipi nih President Trump cungah thleidanak an tuah ruangah a chuakmi a si” tiah a chim. US mipi nih main stream media chungah zumhnak an ngei ti lo, mipi thinhunnak an chuahter, mah ruangah Capitol Hill inn tiang luh hnawhnak a chuahmi a si tiah nizan ah a chim.

Media nih mipi sin ah thawng an pekmi hi a dik lomi a tam tuk pin ah kap khat lei lawngte a si tik ah mipi thinhunnak cu Capitol Hill cungah a tla tiah BBC News night interview ah nizan ah a chim. A hlei nih CNN nih President Trump cungah a huatning a faak tuk, an pumpak huatnak in mipi thawng an pek tik ah a dikmi thawng an pe kho lo.

Megyn Kelly hi US President a cuhmi hna debate ah bia a hal tawntu a si. President Trump zong bia har ngaimi a rak hal bal caah faak ngai in soisel a tong balmi a si. Megyn Kelly cu US media anchor a tuan balmi mi lak ah phaisa tam bik a hmumi nu pakhat a si. NBC, ABC, Fox News, Podcast, Youtube ah rian a tuan balmi a si. NBC a tuan lio ah Kum khat US$ 18 million in an hlan.

Keimah pumpak in US media anchor vialte lak ah ka uar bikmi a si. Amah hi Albany Law School in D.J degree tiang a ngahmi a si. Atu cu Megyn Kelly podcast ah The Meagyn Kelly Show a tuah i rian a tuan. Amah hi zei party hmanh ah a lutmi a si lo, Independent a si an ti, democrats zong Republican zong a duhmi hna cu a vote ko hna ti a si. Credit: Salai Lairamthang