US president thimnak cu Laimi zong kan tang ngai cio hna, pastor le Pathian riantuan tu zong an ruahnak le hmuhning tampi an chim/tial cio

Tu kum US president thimnak cu Laimi zong kan tang ngai cio hna i thil tha a si ko tiah ka ruah. President thar cu nihin thawk in rian a thawk cang. Tutan thimnak hi vio dang thimnak he a dan ngainak cu pastor le Pathian riantuan tu zong an ruahnak le hmuhning tampi an chim/tial cio. Cucu economy le foreign policy te hna ruangah a si tuk lo. Khrihfa kan zumhnak he a pehtlaih caah a si. Bible nih a tialmi Khrihfa zumhnak he a kalh in ram hruai a timmi le a tim lomi kan ti hna ahcun kan palh lai lo.

US tuanbia ka chuanh than ahcun, a limcia kum 50-60 hrawngah Supreme Court nih biaknak le uknak cu a then ding a si timi ruahnak he US cu chan thar ah a rak kalpi. Cu nih a chuahpi mi cu biaknak zalonnak a si lo. Biaknak khamnak tu a rak si. Atu kum tampi a ruah hnu ah cu ruahnak i a theipar cu cozah zung le company riantuannak kipah biaknak cu kham a si cang. Cozah zung, sianginn le company poah ah kan zumhnak le biaknak kong chim khawh a si ti lo. US ram cu khrihfa zumhnak he rak dirhmi a si. Minung kan covo cu Pathian nih a kan pekmi a si tiah vawlei ah a aupitu a si. Atu cu thil sining a dang tuk cang. Hmuhning le zumhning zong a dang tuk cang. Cucu kan dirhmun zeidah a si lai?

Hi hnuah zei lam dah kan panh lai ti cu a fiang chin lengmang ko. Kan zumhnak hi US cozah nih biaknak min pek in ri a kan kiahpiak chin lengmang cang. Kan fale sianginn kainak ah ngeihkhat tthitum te hna, nau thah te hna, kum tlin lo nupa sualnak tuah te hna hi kham lo in an cawnpiak chin lengmang cang hna. Cu cawnpiaknak cu kan fale thinlung ah tlaici an tuh lio a si. Cu vialte te cu bible nih a chimmi kan zumhnak he a kalh bakmi lawngte an si. Cu tikah zeidah kan dirhmun a si lai? Sunday School ah kan chimhmi hna le sianginn ah an chimhmi hna ralkah tikah zei lei ah dah kan dir lai? Kan zumhnak nak in abiapi deuhmi zeital a um hnga maw? Kan zumhnak kan kilven, dirpi duh lo ahcun khrihfabu le kan innchungkhar kilven, dirpi lo he a khat.

Atu lio US ah an chim lengmangmi cu “na zumhnak le biaknak cu inn le biakinn ah i chiah ko” ti a si. Cozah zung le sianginn a si lonak public space zongah chim khawh lonak phung an ser ni cu US ah Khrihfa zumhnak a thih ni a si te ko lai. Cucu Bawi Jesuh nih a kan fialning he a khat maw? Khat hlah. Bawi Jesuh nih cu vawlei khuaza kipah a thawngtha chim ding in a kan fial. A zultu hna zong nih an rak chim. Market ah an chim, zalam ah an chim, thonginn chung zong ah an rak chim. Cu an zumhnak cu kum 2000 a rauh hnu zongah zeibantuk minung le cozah hmanh nih a kham kho lo. Cucu kan dirhmuh zeidah a si lai? Kan zumhnak hi kan kalnak hmuh kip ah kan dirpi ding a si hnga lo maw? Kan inn chung le biakinn chung lawngah maw kan chim lai? Peter nih Jesuh mipi hmai ah a hlawt bantuk kha maw kan si lai mipi sinah a thawngtha a chim bantuk dah kan si lai?

Mibu/khua/ram pakhat ah mi thalo cu an um lai nain mipi nih a chia le a tha (moral values) a thleidan khawh ahcun cu mibu/khua/ram cu a rawk lai lo. Asinain, mipi nih a chia le a tha an thleidan khawh lo ahcun cu society cu a rawk tawn. Minung a chia le a tha (moral values) a kan chimtu cu bible a si. Cozah nih a chim bal hna lo. Cozah kut chung a phak poah ah ram a rawk.

Left pawl nih Khrihfa biaknak kham le ri khiahpiak an duhmi cu biatak a chim caah a si. Nu le pa kan si ti hmanh a fiang ti lomi, nau thah cu lainawn a si lo a ti mi, Pathian a um lo tiah kan fale cawnpiak a tim cuahmah mi tiluan (movement) cu tv chungah kan hmuhmi a si lo. Kan duh zong duh lo zongah kan innchung ah khuasak a timmi a si. Biden cozah theng kha chim duhmi a si lo, progressive movement tu a si. Cucu zeidah kan dir hmun a si lai? Kan chim a herh lo maw? A herh tuk. Tu ni thawk in a herh chinchin lai. Atu Europe ram tampi ah Khrihfa an si ti lonak cu progressive movement an rak kham lo ruangah a si. Credit: David C. Thawng