US, NATO le Europe pawl nih pawpi (tiger) Putin cu an rak ttih taktak ko!

US, NATO le Europe pawl nih pawpi (tiger) Putin cu an rak ttih taktak ko!
============
Chungthu leengnaal mizer phu pawl: US, NATO le Europe cozah pawl nih pawpi (tiger) Putin cu an rak ttih taktak ko asi. A ngamh in an rak ngamh naisai lo. Hramnaam ttha ngei lem lomi, ram santlai lo deuh/ramfa deuh tete asimi: Syria, Iraq, Lybya, Kuwait, Yugoslavia/Bosinia, tibantuk hrawnghrang lawng kha, an rak i ngamh seek ve hna le asi kho hme kha.

Ukraine khi, Russa nih a tuk hlan ahcun, hi tin bia an kamh. Ukriane: A lamkip in kan in umpi/dirpi ko, an rak ti. (We are with you). Heh tiah an rak leem. Russia nih a vun tuk hnu cun: Thlacamnak he kan i umpi ko (Our prayer are with you.) NATO chungtel na si lo le ralkap he kan i bawmh kho lo, an hei ti salam ko.

Atu cu, Ukarine cu, amah te lawng bak in, vawleicung nuclear hriamnaam tambik ai chiahmi (stockpile) le ralkap tthawng bik asi vemi Russia pi, vun doh peng ding hi cu, a fawi ti lo. Ukriane cu, US le Europe nih an hloh ko; an hlen cikcek ko.

Ningzah phen ah, hriamnaam an hei i bawmh ter sawhsawh; Russia kha supuaizii sanctions an hei tuah sawhsawh ceo khi asi. Sipuaizii sanctions hna hi cu, Russia President Putin ca-ah cun nothing le zero khi asi ko. Taiwan zong khi, China nih tu sehlaw, US nih ralkap he a bawm lo hrimhrim. 99.99% in chim khawh cia asi ko.

Russia Nih Ukraine Hi Alak Khawh Zongah Atei Lai Ka Zumh Loh! Vawleicung ah raltuknak hriamnam thabik a neimi le ralkap thazaang thawngbik a neimi American nih a sifak ngaimi le hriamnam thathi hmanh a neilo mi Vietnam a tuk tikah Vietnam ram cu alak khawh taktak ko.

Asinain Vietnam nih hriamnam chiah lo in biatak tein an doh than hna tikah a hnu ahcun American nih a tei hna lo i, hnu akir tak hna, Hriamnam thathi hmanh a nei lomi Vietnam hi American nih a tuk tikah raltuknak vanlawng thatha le tinbaw thatha ahman hna, Culawng asi loh, hriamnam thatha le raltuk a thiammi ralbawi tampi ahman rih hna, An hriamnam thazaang le an ralkap thazaang cuai thlai ahcun David le Goliath tluk nak hmanhin an itlau deuh men lai?

Vietnam nih US akhamkhawhnak hi pakhatnak ah meithal thathi kan neih lo zongah kan ram caah kan lu kan iphum lai, ‘timi lungthin he ral an tuk. 2nak ah an ram asi caah an fing le tlang kha an theih dih tikah ral thli Guerrilla system kha tha tein an hman khawh. 3nak ah Vietnam ralkap le mipi hi ti le nga bang an ithen loh. Hi hna 3 hi hmunkhat te ah anhman khawh caah USA nih a tei hna lo nak hi a si.

American nih ram fa te a simi le hriamnam thathi hmanh a neih lomi Afghanistan a tuk tikah fawi tein alak ko. Asinain Taliban pawl nih Guerrilla ralthli in biatak tein an doh tikah a hnu ahcun hnu a kirtak hna i Afghanistan cu Taliban kut ah a tla than ko. Taliban pawl lungput zoh tikah kan ram caah kan lu kan iphum lai timi ruahnak he ral an tuk.

An mipi tampi nih an dirpi rih hna, An fing le tlang kha an theih dih caah cu cu ral thli kahnak ah ningcang tein an hman khawh, Khatleiah aramri a simi Pakistan nih athli tein abawmh hna, Hi hna thazaang vialte hi tha tein an hman khawh caah Taliban nih teinak ahmuhnak hi a si. Nihin Russia le Ukraine ituk nak ah an ralkap thazaang le hriamnam thazaang zoh tikah van le vawlei in i thlau ko hmanh sehlaw a dongnak teinak ah bia a chimtu hi hriamnam thazaang le ralkap thazaang hi asi lai ka zumh lo.

Adonghnak teinak bia chimtu hi thih ngamnak lungput le lungrualnak kha asi teh lai, Nihin Ukraine lungput zoh tikah kan ram caah kan lu kan iphum lai timi lungput he ral an tu. Ram leng a um mi Ugraine mi le sa a simi kum 60 a simi hman nih kan ram caah lu kan iphum lai tiin an ram ah an kir hna. Hibantuk lungput hi nuclear bomb nak hman in tih a nung deuh mi a si.

Nihin Ugraine an dirhmun zoh tikah Kan hngakchiat lio ca kan rak cawnmi tar pa nih athih lai ah afa le funghreu hi hmunkhat ah kan funtom ahcun ahohman nih an khiah kho lailoh. Cucu teinak muru cu a si,tiah bia acah hna bang, ‘atulio Ukraine an lungput zoh tikah an ifuntom dih lio can a si. Khelkhat in kan chim ahcun an cozah an ralkap le an mipi kha fek thup in an ifun hna. Hi an ifunnak hi an ral teinak ah a biapi mi cu asi teh lai.

Cun Ukraine an van that khunnak cu bawmhtu tampi an nei mi hi asi. Nato nih an herh mi hriamnam tampi a bawmh hna. EU-US-UNO le ram tampi hna nih Russia hi ‘siipuazii’ an phih hna. Hi siipuazii an phih mi hna hi raltuk arau deuh ahcun Russia caah cancer zawtnak bantuk a si teh lai. Tahchunnak ah US nih Vietnam a tuk lio ah ahohman nih sipuazii an phih lo nain, US sipuazi kha vawlei ah atla i, ahnu ahcun US mipi nih raltuk kan duh lo tiah Cozah an auh hnawh hna tikah US Cozah an lu ari i, ahnu ahcun raltuk kha a ngol ko.

Ka chim duhmi cu vawleicung ah arumbik le athangcho bikmi US nih ral atuk tikah ramdang nih sipuazi an phih lo nain a sipuazii kha vawlei ah atla ko. Cucaah atulio Russia raltuknak hi a rau deuh asi ahcun ram tampi nih siipuazii an phih mi nih hin a hnu ahcun an siipuazzi hi khur chungah atla teh lai i,’ cu nihcun araltuk nak thazaang hi faktuk in a zor ter teh lai ti hi zumh cio mi a si.

Ukraine an van thatnak asi rih mi cu; an ramri ram pawl hi ahawikawm an tam mi hi a si..Tahchunnak ah Ukraine he ram aa rimi Poland-Romania-Slovakia le Hungary ram hna hi Nato chungtel an si caah Ukraine abawmhmi lawngte an si hna. Nato nih hi hna ram pawl palhtlang in Ukrain hi a bawmh hna. Chimh duhmi cu raltuk tikah innpa ram hi an bia pi ngai. Taliban nih Afghannistan alak khawh than mi khi, aruang tampi lakah Pakistan innpa a neih mi khi aa tel ve.

Thil asikhawhmi cu; Russia nih hin Ukraine hi a va lak dih zongah Ukraine nihhin acunglei ka chimmi ram pawl hi hrambunh nak le chuah luhnak ah ahman lai i, Russia hi fak ngai in a doh khawh than hna. Russia nih Ukraine hram an bunhnak ram hna hi, na ram ah Ukraine na um ter hna tiin, va kah sual hna sehlaw Noto chungtel an si caah Nato nih an leh rulh colh lai i khual ngal bu vai lamh sual khi a lawh lai. Ka chimh duh mi cu Ukaraine nih hin an ram ven khawh lo in hnu an ithawn zongah Innpa ram hin thazaang ihrimthannak hmun thatuk an nei rih. Hihi an vanthatnak pakhat cu a si ve.

Russsia nih Ukraine atuk tikah American nih Hiroshima le Nagasaki ah atomic bomb a thlak i ciamlak atuah bantuk in atomic bomb in Ukraine hi ciamlak in atuah lo ahcun atei hna lailo ti hi ka zumhning asi, Khatlei ah nuclear hi hman sual sehlaw Nato nih zoh sawhsawh lo in alehrulh ve ahcun Russsia ram hi vutcam ah ai cang khawhmi asi. Mah Inn mah nih duah ti hekhin ai lawh lai.

Cucaah Russia nihhin newclear bomb in Ukraine hi ciamlak in atuah lo ahcun zeithluk hriamnam tha le ralkap tor le cheng zong hmang in Ukraine hi a valak khawh zongah adonghnak ahcun teinak taktak ahmuh khawh lai ka zumh lo. Aruangcu ral teinak muru hi lungput le lungrualnak ah aa hngat bik caah asi.

Atulio Ukraine an lungput zoh tikah an ram caah thih an ngamh dih. An ilung rual fawn. An hnulei in Innpa ram hna le Nato EU hna nih an bawmh rih hna. Cucaah atu an lungput le an ilungrualnak le bawmhchanhtu an neihmi thazaang vialte he ral an doh peng ahcun ahnu ah teinak thantar an thlai teh ko lai, tihi ka zumhning asi. Credit: Van Neih Thang