US le Canada lawngah Hakha pengmi milu thong 12-15 kan um. Riantuanmi thong 4 renglo kan um!

Kan Daithlang Sual Maw?
========
CDF-Hakha dirkamhtu unau hna nan sinah tlawmte forhfialnak langhter kan duh. Pathian zangfahnak le mipi dirkamhnak thawngin CDF-Hakha cu kum 1 deng tluk a kal cang. A kan bawmtu nan dihlak cungah lawmhnak chimcawklo kan ngei i nan riantuannak le khuasaknak cio ah Pathian nih damnak le hlawhtlinnak in pe ko hna seh.

Ram chung ummi nih nun pek in rian an tuan lio ah ramleng ummi nang le kei hi kan daithlang in kan thi a dai tuk sual maw tihi ruah lo awk a tha lomi dirhmun ah kan dir. Hi dohthlennak hi hnu va kir ding (ngol than) cu a tlai tuk cang. Kan tei hrimhrim lai tiah rak ruahmi a si caah kan tei cikcek hlan tiang kan doh a herh. Nunnak tam tuk a liam cang. Kut le ke pum tlamtling lo tamtuk kan um cang.

Nuhmei, pahmei le ngaktah tampi kan ram ah an um cang. Mah le khua, mah inn lo cia ah kan hnangam kho ti lo. Kan ram chung ummi kan fale zong tha thi in fim cawnnak an ngei kho ti lo. Hi tining in sau tuk kan kal ahcun kan miphun cu ralkap kut tangin kan luat hmanh ah fimnak le cawnnak a ngei lomi kan si ahcun miphun dang kut ah kan tang than lai. Cu a si caah kan ral hi zokzok tein kan tei hrimhrim a herh.

Kan theih cio bangin kan ral cu tha dam tuk le fawi tukin kan tei lai lo. Saduhthahnak men le biasi phai men in cu kan tei lai lo. Teinak caah nunnak le sining dihlak pek a herh. Ral kan tei tuan khawhnak ding caah voi khat voi hnih lungthawhnak men in pekmi chawva lawng a za lo. Ral kan thawh cang caah a dihdongh tiang thazaang chuah in kan i hnek a hau. Cucaah forhfialnak langhter kan duhmi cu:

1. Hakha cu khuapi a si bantukin Hakha khua chung pakhat lawngah minung 35,000- 40,000 kan um. Hakha peng chungah khua 60-70 in a um. US le Canada lawngah Hakha pengmi milu thong 12-15 kan um. Riantuanmi thong 4 renglo kan um. Cu thongli nih cun fel tein tho usihlaw thla khat ah $ 400,000 kan hmuh lai. Hakha peng chung ummi he cu thong 20 tluk North America ah kan um lai tiah ruah a si. Cu vialte hna cu kan miphun nih a hrum a ai lio ah khuazeidah nan um dih?

2. Hi dohthlennak caah a cheukhat nih do cawi tiangin thazaang an chuah lio ah a cheu khat cu voi 1 hmanh chawva pek loin biasi a phaimi kan um rih. A cheu cu kum 1 hmanh thazang chuah loin kan lung a dong. Cu bantuk lungput cu hngerhte bu hmanh kan ṭhio kho lai lo.

3. North America ummi Hakha pengmi chungin cheu 10 ah cheu 1 hmanh nih tha tein CDF-Hakha caah thazaang kan chuah rih lo. Cazin ṭha tein kan chiah caah fiang tein kan theih.

4. Hakha pengmi lawng siloin Hakha pengah inntung dirh in khuasami poahpoah zong nih CDF-Hakha dirkamhnak caah thazaang chuah a herh. Inntung kan dirhnak cu kan khua a si. Kan vawlei a si. Kan khuapi a si. Cucaah mah siaremnak le mah duhnak ca lawngah thazaang chuah loin kan umnak khua le ram ca zongah thazaang chuah dingin forfialnak ngeih kan in duh hna.

5. CDF-Hakha dirkamhnak ding caah riantuantu nih a kan pehtlai lo tiah a timi kan um pah. Riantuantu upa hna zong hi zapi bantukin paw cawmnak caah rian a tuan vemi an si caah pumpak in hmunkip ah kan rak in pehtlai kho hna lai lo.

6. Cucaah Hakha pengmi le Hakha peng chung ummi dihlak nih CDF-Hakha dirkamhnak caah thla khat $ 100.00 cu rianṭuantu upa sinah na rak kan kuatnak lai ruahchannak he zangfah nawl kan in duh hna.

7. Zaanghlei a cawi khomi nih pehtlaihnak kan ngeih hram u. Kan dihlak in ṭuanvo kan ngei timi lungput ngei u si.
8. Ral kan doh kaa rumro i daithlan le lungdong phun in kan um ahcun hngerhte bu pakhat hmanh kan ṭhio kho lai lo kan ti cang. Biasi phai le saduhthahnak tampi chim lo in tuahsernak tu in thazaang chuah khawh i zuam hram u si.

9. Tampi chim loin tampi tuan khawh i zuam hram u si. Zeitik caan poah ah 704 794 7628 ah pehtlaihnak ngeih khawh kan si. A cung i langhtermi phone number zongin phaisa kuat khawh zungzal kan si. HAKHA a simi le HAKHA peng chung ummi nih cun rak share hrimhrim u! Lawmhnak tampi he, CDF-Hakha Support Team of North America