US Election Kong Hi Ningcang Loin Thil An Tuah Tikah Um Sawhsawh Awk A Tha Ti Lo.

US Election kong : Ka ruat lai lo ti zong ah theih peng ko, hmuh peng ko mi cu ruah ve lo awk a ttha loh. Citizen asi i Vote a thla ve ko mi nih cun dir hmun le ttan hmun ngei te i kan um hi a herh mi hrim hrim zong asi. Atu bantuk caan i keh lei tal orh lei tal, a kiik lei tal a lum lei tal i um lo a karlak kiik lo lum lo um hi Zisuh Khrih zong nih “kan chaak hna lai” kan luak hna lai ati mi kha kan si. Kan dir hmun zong kan i fian cio aherh.
State kip ah Hearing cu an van tuah hna i Testimony a chim mi pawl nih an chim mi ka hei ngaih ve lengmang tik ah kei cu tawlreltu nih zei ti lei in dah bia an khiah lai ti lei si lo in Prophesy nih an rak chim chung mi rum lo ka hna thlaam ah an cuang ko i khat lei cun hi Election hi Pathian nih America hmang in vulei cung i dinlonak vialte hmun-phiah bantuk i phiah dih nak ah pei a rak hman taktak ko hi ti hi ka lung ah a um bik ko. Thil ttha tuah nak in Thil ttha lo (Sualnak) doh a ttha deuh.

Lai mi kan nun phung ah thlachiat ruah ti mi hi thuuk ngai in kan i ngeih mi asi i zei tluk i sualnak a pical mi hmanh sathi te kan luanh ah cun i ngaihthiam le remnak lei ah fawi te in a kiir tthan kho mi kan si. Sualman thihnak tibak i vulei a tawreltu Dingthlu Lairel phung nak in hlah maw Laimi kan nunphung hi a rak tthat deuh ti hna hi ruah lo awk a ttha lo.

Atu Election ah dinlonak a um ti an hmuh tik ah Demo/Rep/Independent ti um lo in din lo nak asi ati ngam mi hawi hmai ah an hung chuak i Affidavit he Testify an tuah thluahmah ko hna. Adih mi cu va dih cang ko seh, buai leen a hau lo an ti kho hrim lo. Kan ram a rawk lai, Ram kan ngei ti lai lo an ti i ral ttha taktak in thil ttha lo (Sualnak) ti i an hmuh mi cu an doh ngam ko. Hi ti i thil ahung can tik ah hin prophesy nih an rak chim chung mi Trump hmang in hnawm vialte Tank bantuk a cawh dih lai i a hlonh dih lai ti i Prophesy an rak chim mi te hna kha ruah tthan lo awk a ttha lo. Amos 5:24 ah “dinnak kha nan lak ah tiva bang luan ter uh” ti asi i cu bantuk Pathian bia tlam a tlin khawhnak ding ah hi Election hi rian a ttuan cuahmah ti khawh asi.

Hi zawn te ah hin Laimi nih kan ruah ve awk ah ka duh ngai mi cu phungchimtu cheukhat nih ngaih thiam nak rum ro kan i cawn piak mi, adik lo ti fiang tuk i a lang ko mi zong ngai thiam ko ti rum ro i kan i cawnpiak mi hi Pathian duh ning asi maw ti hi asi. USA ah cun Zuri pakhat nih an hmai ah motor a mongh ah cun a ran nak in 911 an call colh ko. Kan nih Laimi cu kanmah tu nih hlaat pi in kan hrial i kha thil he khan i hnamhnuaih kan duh lo. A ngai te ti ah cun dinnak timi cu sualnak cung ah action laak ngam tiang ttan ngam hi asi. Sualnak hrial ziar hi asi lo. Kan Laimi lak ah dinnak thawngtha hi ai chim rih lo ti khawh ding in a um rih ko. Sualnak action ala kho/ngam lo mi ram le miphun cu an rawk thluahmah ko i Action ttha te i a la kho/ngam mi poh ram ttha an si ko. Voi khat Motor pakhat nih ka sir lei in aka hnur i ka mawttaw a sir lei a heem dih. Ka van dir bak ah minak pa a rak tli i a phone number le a min a hong ka peek i na herh ah cun rak ka call Witness ah kan dir piak lai kan hmuh ko hna khah a rak ka ti. Kei mah kai si ter tik ah kei cu sining law ka hei zoh sawh ko hnga i ka phone number hna cu ka pe bal rua hnga lo ti khua ka ruat i ka ning zong azak ngai. HI bantuk dinnak a ttanh ngam mi nun hi ka nun nih a tlinh rih lo ti aka cawn piak.

Kan Bawipa Zisu vulei a rat chan zong hi thil ttha tuah ah asi lo, Sualnak doh ah asi deuh (Hebrew 8:28). Donald Trump nih sualnak hi an min faak in a auh hna, Direct in address a tuah thluahmah hna tik ah hin chanthar philosophy he compromise atuah cang mi nun phung mit in cun zochia le khen hru pi khi alo ko. Asinain kan Bawipa Zisu zong nih Farasi phung tlai pawl kha bia faak faak in a rak ti ve ko hna ti zong kha kan philh lo a herh mi asi. A ngai te ti ah cun Pathian ttih cu sual huat (Phung 8:13) asi i sual hua lo i um hi Pathian zei rel lo he arak i khat diam ko.

Atulio kan vulei pi hi keh le orh (left and rigt) pial nak lam tte a phak cuah mah lio asi. Gospel thawng ttha hi vulei a hung luan chan tlawm pal ah cung le authority (right) lei le tanglei (Liberal) doctrine asimi sifaak santlailo thongtla dawtnak lei in Zisu hi hmuh le ton afawi deuh ti a rak i tthen i cucu chan avan kal lengmang tik ah Evolution theory, Essentialism theory, Naturalism theory a phun phun nih a hna/hri cat lak in an zam i atu (Left) pawl i an kal pi mi lam hi cu Biatak he a zei ti hmanh i pehtlaihnak a ngei ti lo mi, sualnak he compromise ai tuah mi, sual a hua lo mi, sualnak a um lo ti tu i a ttang mi, NEW AGE HIGHWAY pi a zuul ti hi hmuh thiam a biapi tuk. Atu Election zong hi Election buainak men men si lo in Left le Right karlak buainak, Sual a hua mi le sual ahua lo mi buainak, Pathian attih mi le a ttih lo mi karlak buainak asi ti khawh asi. Biatak lei i a ttang mi nih cung lei tthawnnak bochan in heh ti ah thla an cam lio ah sualnak he i rem aduh mi pawl cu tuchan technology le Media tthawnnak dihlak he an rak cawlcang cuahmah ve. Credit: Salai Bawiukthang Cinzah