US Election 2020 Hi 2000 Lio I Florida I Vote Relthannak Bantuk Hei Ai Lo Maw?

US election 2020 Hi 2000 lio i Florida i Vote Relthannak bantuk hei ai lo maw?
============================

US election i poll an tuahmi an phih dih hnu, vote rel cuahmah a si lio ah khin, “Vote kongah dehhlennak a um. US Supreme Court kan kai lai” tiin Trump nih tehte langhter lo piin a chim.

Nihin ni tiangah US election kong tuanbia i Spreme Court nih biachiahpiak hau a si mi cu 2000 election kha a si i, cu lio ah cun George W Bush nih Al Gore a rak tei bal.

Tutan election le 2000 election tahchunh hi a fawite ko nain, cu ti tahchunhnak tuahmi nih lamping ah a kan hruai khawhmi a si. 2000 election ah khan cun Florida state pakhat cung lawngah ai fuu dih – cu state ah cun candidate pahnih hna hi vote za tlawmpal te lawngin an i thlau. Ai khat lo mi cu, tutan ah cun Trump nih state tampi ah tazacuainak a tuah, cun Biden nih hin margins hrim in faaktuk in a thlau fawn.

2000 lio ah zeidah a cang; US tuanbia chungah vote kongah a buaibaibikmi 2000 election lio ah khan, Republican governor of Texas zong a si i, US president hlun i a fapa a si mi George W Bush sinah Democratic Vice-President Al Gore hi mark tlawmte lawng in a rak sung bal.

2000 lio zongah cun, khat le khat an i tluk ngai te lai, tiah opinion poll nih a rak chimcung bal. Election zaan a vun i thok in cun, election a phichuak ai hliahnak dingah Florida liangcungah zeizongte ai fu. Cu lio ah cun Florida nih electoral vote ai ngeihmi hi 25 a si. Nihin ah cun 29 a si cang.

Ballots an rel in cun, US networks kip nih Florida cu Al Gore tei ah an chiah. Asinain, a nehnu deuh ah khin, khat le khat an i tluktuk than, tiin thawng an thanh than. Suimilaam tlawmpal a vung rauh ah khin ‘Bush nih Florida ah buan a co than e,’ tiin network pakhat hnu pakhat nih thawng an vun thanh. Asinain, cu hnu zongah cun, buan a cotu fenh khawh an si rih lo, an i tluktuk than, tiin an thanh than.

Election zaan cu pengpaso (seesaw) ai citmi ko an lo. “A sunghkhaan ko cang,” tiin Al Gore nih Bush cu phone in a hei chonh. “Nangmah tu kha a sungh khaan ko rawh,” tiin Bush nih a hei chonh than ve.

Bush nih 1,784 vote in Al Gore cu a hleih i, Florida law ning tein vote relthannak tuah dingin an nawl caah, a thai zing ah an thok colh ve. Bush a vote cu 327 tiangin an thumh. Cu hnu cun Florida chungum county kip ah vote relthannak tuah vir dingin Al Gore campaign nih nawlnak an tuah chap.

Rampumpi mit cu Florida cung lawngah ai fu cang hna i, cu lio i voting machine (seh) ah a langmi ballots cung i an cumhmi (catlap then/thleh duh ah stamp in hmetete awng um dingin cumh a si) pawl an dikfel le dikfel lo dawthlattu pawl nih thatein an cekhlat hna. Cu ti an check lio hmanthlaak cu news networks pawl nih an langhter lulh hna.

A cheu voters pawl nih an ballots cu an cumh tikah, a cheu cu an ballot le a tanglei catlap ai then lomi an um. Cu tikah mizeideuh an thim, ti ai fiang tawn lo. Cun, thil pakhat a um rih mi cu, ballot cungah cumhmi a awng tete cu a um ko nain, hlan lakin ai cumh lo tikah, cu bantuk ballot paoh cu lunghrinmi asiloah tuahchommi ah chiahpiak an si.

Florida ah a nganbikmi sihni pawl nih ballot capar cung an cumhmi a fiang lo mi kong an ceih.

Florida ah a ummi a cheukhat Republican tanhtu pawl cu Miami ah an vung kal riangmang i vote relthannak ngol dingin, thalo in duhlonak an langhter. Cu ti duhlonak a langhtertu pawl cu Miami khuami an si ko, tiin an ti ko nain, tamdeuh u cu Washington ah a ummi Congress pawl bomhnak a petu Republican minung lawngte an si kha nehhnu ah theih an si than. Cu duhlonak langhtermi cu “The Brooks Brothes Riot” (Vatecek Unaurual Buaibainak) tiin min an pek – duhlonak a langhtermi pawl cu suut he nektai he an i hruk dih hna, ti a si.

US Supreme Court nih Bush savo an coter lawlaw i, buabainak vialte cu an donghter. “Vote relthannak nih hin kan US election a musiam hi a herh lo ah a chiatchuah sual leh lam lai,” tiin Supreme Court nih an chim. Florida i million 6 nih vote an thlaakmi vialte lakah a donghnak margin in Bush buan an coternak vote a zat cu 537 lawng a si. Cu tluk cun an rak i tluk.

“Kai lungsak ko cang. Biaceihzung an biachahmi cu ka lung a tling lem lo nain, ka cohlan ko. A ra lai mi Monday i electoral college ah namhneh te dingmi tutan phichuak hi ka cohlan ko. Tu zan cu, kan ram democracy i a thazaang le a mipi dirhmun in lungkhat thinkhat in um ding kan si caah, ka lung ka thumhnak a vun langhter,” tiin Al Gore nih a chim.

Al Gore nih election a co lo nain, rampumpi total vote ah cun 48.38% a hmuh i, Bush nih cun 47.87% lawng a hmuh.

Nihin election kongah zeidah ai dannak a um?

2000 election lio i vote relthannak an tuah lio ah khan cun, biahalnak chuahpi khotu ballot capar ah a cat/ ai then lo mi (hanging chads) an um. Tutan election ah hin cun vote kongah dehhlennak a um, tiin tazacuainak lawng a um – cu kongah cun le tehte a um fawn lo.

A tlawmbik state 5 hrawngah Trump legal team nih tazacuainak an tuah. “Kan ram ah dehhlennak nganpi a tlung” tiin hrihhram um lo piin a chim. April tein khan mail-in vote hi a rak zum lo cang i, dehhlennak tampi a um khomi a si, tiin a chim. Tehte le thitha in an langhter kho fawn lo.

Vote kong i dehhlennak hi cu a tlawmte tawn i, vote tlawmte lawng a hnursuan tawn, tiah election law experts pawl nih an chim.

Khat le khat an i tluk lekmaknak state ah hin Biden nih Trump hi vote a thong le a sang in a tei ko rih hna.

Georgia ah hin, Biden nih Trump hi vote 14,000 hrawngin a lonh. Automatic in vote relthannak tuah tikah vote 14,000 hi a tlawmmi a lo ko. Asinain, election phichuak cu ai thlen hlei lai cu zumh a si hlei lo.

Vote relthannak an tuah ruangah thil ai thlengmi pathum a um bal – 2008 lio ah Minnesota Senate zuam lio ah siseh, 2004 i Washington governor thim lio ah siseh, 2006 i Vermont auditor thim lio ah khan a um bal. Asinain cu pathum lio ah cun, a hramthok te i margin in khat le khat vote an i thlau mi kha 500 hrawnghrang lawng an rak si bal.

Trump nih a president dirhmun a humhaak khawhnak dingah cun electoral college vote 270 a hmuh a hau i, cu tikah Georgia lawng i buanco hi a caah san a tlai hlei rih lo.

“Tutan election thilsining hi ai khat lo” tiin 2000 vote relthannak an tuah lio i kaphnih party caah sihni a tuanmi hna nih an chim.

“Tutan election hi cu, piangte ti ko lo cu, a dih cang ko. Election a phichuak a khupthal a let than kho tu ding thil zeihmanh a um kho ding zong a si ti lo. Trump campaign nih hin State pakhat te hmanh hin election phichuak a hleng kho dingmi legal cawlcanghnak ai ngeih ti lo,” tiin 2000 election lio i Gore’s legal team a hruaitu David Boies nih a chim.

“Election Day hnu ah Post office in a rak phanmi vote paoh cu phung he ai kalhmi a si. Cucaah hi pawl hi cu vun relhchih ti hlah u,” tiin Trump nih a aupimi cu 2000 lio i Bush’s team a hruaitu former secretary of state James Baker nih a soisel ngaingai. (Virus a tlun caah hin, Election Day hlan tein rak kuat cangmi ballot paoh cu Election Day hnu ni 3 tiang i an rak phaak ko ah cun cohlan an si lai, tiah Pennsylvania biaceihzung nih a ni a rak thawn cangmi a si.)

“2000 lio i kan buaipimi than kha cu, vote an thlakmi kan rel than, kan rel than, kan rel than, cu hnu ah election kan donghter,” tiah Mr Barker nih a chim.

Asinain, Senate leader Mitch McConnell hei ti bantuk Republican lakah a cheukhat seniors pawl nih cun Trump nih zazacuainak nawl a ngeihmi an dirpi ve.

Election a Phichuak kongah Supreme Court nih bia a chat kho lai maw?

Tazacuainak a tuahmi Supreme Court tiang lanhpi dingin tu le tu Trump nih a chim. Asinain, hi thil hi cutluk in a fawibai mi cu a si lem lo.

US Attorney General William Barr nih hlathlainak tuah dingin cozah sihni pawl nawl a pek cang ko hna bu zongah, tazacuainak a tuahmi cu state level biaceihzung kipah ceihhmai (challenge) hmasa an si lai.

Tazacuainak an tuahmi cu state biaceihbawi nih an cohlan hnu ah vote relthannak tuah dingin nawl an chuahpiak te hna ding khi a si. Cu hnu lawngah cun an biasu cuaithlaipiak dingin Supreme Court sinah bomhnak an hal te lai.

Sihmanhsehlaw, tazacuainak an tuahmi a hmuru kongah phungningtein federal, asiloah legal lei in biahalnak tuah a si hrimhrim te lai.

Vote kongah nincanlonak tehte fiang a um hnu lawnglawng ah hlathlainak hi federal sihni pawl nih an tuah te lai, tiah attorney general nih tutan zarh deetka ah khan a chim.

Nihin tiang i Trump te lei nih an chimmi kongah biafiang pakhat hmanh a um rih lo. A chinchap lo ah ti le bang ahcun State cozah pawl nih an hnonh piak lulh cang hoi. Mangkong chim bantuk men ah a cang ko cang lai hi! Credit: Chelsea Bawi

Leave a Reply

Your email address will not be published. Required fields are marked *