US Covid-19 Upadate Rak Zoh Hmanh

US Covid-19 Update: 04/16/2020. Peak date kan lonh hnu in tuzarh chung hi cu a thimi le a zawmi an zor cang lai. US Cozah nih Coronavirus bawmhnak a tuahmi, minung pakhat ah $1200 le fa pakhat ah $500 chap dingmi bawmhnak nizan le tuchun ah nan bank account chungah thun hram an thawk cang. A ngahmi zong an tam ngai cang. kum dih tax refund i direct deposit a tuahmi mi minung 60 million bank account ah a lut cang lai. Nu le va le fa pahnih a ngeimi nih cun US$ 3400 a lut lai. Asinain mail in kuat dingmi pawl cu April 24 hnu lawngah kuat khawh an si lai tiah an chim.

A ngah rih lomi thaizing ah nan bank chek than cio te uh. Cozah sin ah pek than haumi a si lo. Kum dih tik tax claim tik zongah an zuh dingmi a si lo. A lak tein pekmi a si ko. CDC le FEMA nih May ni khat thawk in cozah sianginn, church le camp on than an duh tiah information a chuak. FEMA timi cu, The Federal Emergency Management Agency ti a si i, CDC timi cu the Centers for Disease Control and Prevention tinak a si.

Tuchun tiangah US ah a thimi  minung 28580 an phan. Nizan ah minung 2741 an thi. A zawmi 644823 an phan. Nizan lawngah a zawmi minung 34589 an i chap cang. Nikhat hnu nikhat a zawmi an zor cang. Tutiang ah zawtnak a chek cangmi 3 million renglo an si cang. A dam thanmi 48710 an si. Nizan lawgah a dam thanmi minung 10190 an i chap ve. Athi mi a tam deuh cu minak pawl an si. A thimi tam deuh cu zawtnak dang a ngeih chihmi hna mi tam deuh an si.

President Trump nih business on than dingah, zawtnak lei thiamsang hna le business lei mirum pawl ruahnak pekmi chung in biachahnak ka tuah te lai a ti. May thla chungah hin business zeimawzet cu an on than lai tiah zumh a si. Mah on thannak dingah state kip governor hna he kan ttuanti lai tiah a chim. State pakhat le pakhat sining a khah lo caah tuan ongmi le tlai deuh ongmi um khawh a si.

President Trump nih small business pawl bawmhnak caah US$250 billion bawmhnak tuah an duh nain Democrats pawl nih small business bawmhnak he a pehtlai lomi, sizung, sibaw, nurse le food stamp lei ah bawmhnak tam deuh in telh chih an duh caah kap hnih lungtlinnak a ngei kho rih lo. Republican pawl nih bill kan chuahpi mi hi small business caah adang tein tuahmi bawmhnak a si caah a dang bawmhnak he kan cawhmeh kho lo an ti.

Vawleicung ah zawtnak ngeimi tam bik cu le a thimi tam bik cu US kan si cang A zual bikmi khua cu New York a si i, minung 11586 an thi. Nizan lawngah New York khua ah minung 752 an thi. A thimi minung cazin a tum chin lengmang cang.

Atu lio ahcun sibawi, nurse le healthcare riantuantu pawl cu ralkap nak in kan i bochan deuhmi an si. US mipi himnak caah ral a tumi bantuk an si. US rampi chung a zawmi le a thimi, 40% cu New York khuami an si. New York hi vawleicung khualtlawng a tam biknak khua a si caah a zual khunnak a si an ti. Covid-19 ruangah US ah rian ngei lo a sawkmi million 22 renglo an si cang. Salai Lairamthang

Leave a Reply

Your email address will not be published. Required fields are marked *