US Caah Thawngpang Tha; FDA Nih Covid-19 Khamhnak Sii An Cohlan Cang

FDA Nih Covid-19 Khamhnak Sii An Cohlan Cang
**********************************
FDA timi Food and Drug Administration’s Vaccine Advisory Panel nih Pfizer nih an serchuah mi, Coronavirus ikhamhnak sii vaccine cu tuchun ah emergency caah hman ding in an cohlan cang. FDA Advisory Panel ah hin infectious disease doctors le scientific experts pawl an itel. Mah hna nih hman dingah vote an thlak i an fehter mi a si. Mah Covid-19 khamhnak sii cu kum 16 in a cunglei pawl caah hman hmasa a si rih lai. Virus zawtnak hi 95% tiang a khamh khotu a si an ti.

FDA lei tuanvo ngeitu hna nih an chimnak ah sumilam 24 chungah 6.4 million khamhnak sii cu kan kuat dih lai tiah an chim. Cucaah thazing ahcun US ram pumpi ti awk in an kuat dih cang lai. Mah khamhnak si hi voi hnih ichunh a herhmi a si. Voikhatnak an i chunh hnu zarh thumnak ah avoi hnihnak chunh a si lai. Ngamdamnak lei riantuan mi hna le tar kum upa pawl le tar zohkhenhnak ah a ummi pawl an chunh hmasa hna lai. US citizen a simi paoh cu a lak in chunh a si lai ti a si.

Thawngpang Bultan; President Trump nih tuchun ah President nawlngeihnak hmang in minsen a thut i, Executive Order a chuah. Ramdang mi hlan ah US citizen hna nih Covid-19 zawtnak khamhnak sii an tinco hmasa ding a si tiah a ti. Zawtnak khamhnak si cu US ah hmun 50000 ah ichunhnak tuah ding in timhlamhnak an ngei cang. Tuzarh chungah FDA nih approve a tuah lai tiah zumh a si. Healthcare worker pawl, tar zohkhenhnak ah a ummi hna le an riantuantu hna an chunh hmasa hna lai ti a si. US citizens paoh cu free in chunh a si lai.

US President Inauguration Committee nih Joe Biden President si ding in cohlan ding le biakamnak tuah khawhnak caah Democrats hruaitu han nih resolution an tuahmi cu Republican hruaitu han nih an thah piak hna caah January 21 ah zeidah a cang lai timi chim awk a tha rih lo.

Texas Attorney General Ken Paxton nih Supreme Court ah Georgia, Michigan, Pennsylvania le Wisconsin i mail in ballot an thlak i Joe Biden an teiter mi hi US phnghrampi he a kalh caah hnon dingah taza an cuai hna. Pandemic pulrai hmang riangmang in Joe Biden teinak an coter mi hi US constitution he a kalhmi a si caah hnon dih dingah biaceihzung ah an kai.

Bernie Sander nih avoi hnihnak Stimulus Check mipi sin a phak khawh lonak cu Democrats hruaitu pawl ruangah a si tiah tuchun a mawhchiat hna. Mipi an har lio ah bawmhnak pek dingmi politic celhnak i kan hmanmi hi a dik lo tiah a ti. President Donald Trump nih tuan deuh ah Coronavirus relief package $1.8 trillions pek dingah a rak chuahpi nain Democrats pawl nih an i duhter loh. Atu cu mahnak in a tlawm deuhmi, $908 billion ah an tla caah Democrats hruaitu pawl cu faak ngai in a mawhchiat hna. Credit: Salai Lairamthang