US ah Biaknak zalonnak timi cu duhpoh in biakinn sak i duhpoh in Pathian biak khi asilo

US ah Biaknak zalonnak timi cu duhpoh in biakinn sak i duhpoh in Pathian biak khi asilo. Biaknak kip caah US Cozah nih a kan dirkamhnak cu Ngunkhuai Luatnak(501c3) a kan chuah piak hi a si. Cu 501(c)3 cu Federal Cozahpi i a t’eng pakhat a simi Ngunkhuai Zung(IRS) nih chuah piak a si. Cucaahcun biaknak bu kip nih kan zulh ding phung a um len ve. Paisa thurhnawm cohlan lo ding kha ralrin a hau. Tahchunnak ah minung hawi zuarthlainak in hmuhmi paisa, rithaisii a zuarmi hna paisa, hlawhhlangnu pawl hmangin paisa a kawlmi hna paisa phun kha cohlan khawh asilo. Paisa lut le paisa chuak a thianghlim ko ti langhternak ah IRS ah monthly or quarterly report pek lengmang a si. Hihi tuah lo ahcun biaknak innka kha Federal Cozah nih hrenh piak asiloah cawibelhter a si. Cucaahcun Freedom of Faith and Religion zong hi lawless freedom khi a rak asilo, zulh ding LAW tangah nawlngeihnak he khuasak cio a si. Federal zulhphung zulh lo ruangah Khrihfa biakinn tampi an khar piak cang hna, Jewish Synagogues tampi an khar piak ve cang hna. Muslim Mosques tampi an khar piak cang hna. Muslim nih dirhmi The Holy Land Foundation hawi cu terrorists pawl sinah paisa nan kuat ti in tazacuai tiang an tong i an innka khar piak lawng si loin t’uanvo ngeitu zong thong ah an thlak hna.

US ah Chin nih sakmi Biakinn hi a tampi cang. Sak lo in midang nih an rak sakmi kha a cawmi zong an tampi. Biakinn kan sak tikah Groundbreaking in a dih tiangah City Cozah nih a ngeihmi zulhphung(Ordinance and Code) tampi a um. Cu vialte cu anmah le an t’uanvo cio in zoh piak le check piak lengmang an si. Minung 500 tiang nih hman ding tiah hmannak nawl an kan chuah piak bu ah minung 600 asiloah 700 tiangin a chungah um khawh asilo. Chim duhmi cu biaknak zalonnak kan ti ahhin Cozah nih biaknak he aa pehtlaimi poh kha zeihmanh a theihpi lai lo tinak khi asilo.
Biaknak Zalonnak timi cu US Constitution tangah na zumhmi kha zalongtein na zumh khawh, midang hnursuang lo tein, ti tu khi a si. Khrihfa hna zong nih cu zalonnak cu 100% kan tinco. Muslims le Hindus le Buddhists le a dang biaknak hna zong nih an tinco cio. Satanic Worship timi Sehtan a biami bu hmanh nih zalongtein an biak ve. President Ronald Reagan le Nancy Reagan hna i an fapa Ron Reagan cu Pathian a um lo timi Atheist Bu hruaitu a si.

Hi bantuk nihchuak capo bantuk a simi biaknak Bu pawl zong nih tlukruangtein Biaknak Zalonnak cu an tinco cio.
Separation of Church and State timi ahhin Biaknak nih a chuahpi theipar tete hi Cozah caah hlawknak tampi a um. Biaknak cu Cozah nih aa bochan peng. Cozah upa hna zong Biaknak ah members hna an si theo. IRS nih 501c3 a chuahpiakmi zulh phung thatein a zulh poh ahcun biaknak kongah Cozah i thlak lo ding ti kha a si. Asinain, biaknak lei nih Cozah sinah chimrelnak a ngei lai lo timi a um lo. Cozah nih biaknak pakhat kha hlorh in a dang biaknak tete nih namneh an ton hnga lonak ding ca tu ah biaknak dihlak kha tlukruangtein zalonnak a pek hna. Aho politician hmanh pulpit cungin biachimnak an pe lai lo, Pastor tu cu khoika hmun poh ah a dir kho ko. Cozah nih biaknak hna a hnawhlonak kong tu a si deuh. Biaknak nih Cozah cungah lungtlinlonak le ngaihchiatnak a ngeih ahcun a ngaihchiatnak le lungtlinlonak langhternak nawl a ngei. Zulhphung a zul komi biaknak bu cungah Cozah nih zeibantuk hnahnawhnak le nawlngeihnak hmanh a tuah kho lo.

Khrihfabu cu Bible in kan i hruai. Islam cu Quran in an i hruai. Buddhists cu Tripitaka(Pihtakat Tungpung) in an i hruai. US Cozah nih US Constitution in America le Americans a kan hruai(Bible in a kan hruai lo). Credit: Rev. Zammang Mualcin