Lungkhar kahdohnak Updated
==========================
Chin ramkulh, Hakha peng chung, Lungkhar tlang kahdohnak ah Zotung miphun CNA ralkap 2 nih ram le miphun caah an nunnak an pek tiah The Zotung Post nih a langhter. June 12 zinglei sml 4:30am hrawng in aa thawk mi lungkhar tlang kahdohnak ah Zotung miphun a si mi CNA 2 an nunnak a liam hi a si i kahdohnak chung ah SAC lei nih hriamngan he bawm in a naih tein an doh hna hna tiah theih a si.
Lungkhar tlang kahdohnak ah a nunnak a liam mi CNA ralkap 2 hna cu Salai San Oo (Hunglae) le Salai Thawng Naw Hoi (Sungpi) hna an si tiah The Zotung Post nih a langhter. A luancia May 26 hrawng in Hakha le Thantlang karlak, Timit pawnghrawng le Lungkhar tlang ah SAC ralkap thazang 150 hrawng nih kahdohnak an thawk caah nifatin ngawt in kahdohnak a chuah hi zarhthum chung a lut cang i kahdohnak chung ah SAC lei a thi mi 50 hrawng an si cang i hriam cheukhat zong CNA, CDF phufonh lei nih an lak khawh. Mipi hriamtlai CDF, CNA phufonh lei in 17 hrawng an nunak a liam ve cang tiah thawng theih a si.
Magway ramṭhen, Pakokku peng, ni chuahlei Bonekan khua ah hmunhma a khuar mi SAC ralkap pawl an kah hna i SAC lei a thi mi an tam tiah Earthquake PDF (Pakokku) sin in thawng theih a si. June 11 zinglei sml 3 hrawng thawk in ni chuahlei Bonekan khua ah a um mi SAC ralkap sakhaan pawl doh ding in an naih hna i zinglei sml 5:00am hrawng in kahdoh an thawk i sakhaan la kho beh ding in zinglei sml 6:00am tiang kahdohnak an tuah, sianginn tual chung ah hmunhma a khuar mi SAC ralkap pawl ceilak in an kah khawh ko hna nain Pakokku sehzung tual in SAC ralkap pawl nih kahdoh an rak bawmh hna caah phungki sianginn chung ah hmunhma a khuar mi SAC ralkap pawl sakhaan bel la kho lak in an kap kho hna lo tiah theih a si.
Kahdohnak chung ah SAC ralkap tampi hliam an tuar/an thi i PDF hriamtlai 1 a nunnak a liam tiah an thanh. Kahdohnak chung ah Earthquake PDF, Myaing B02, C01, Middle Revolution Task Force – MRTF, King Cobra, Royal Defense Force, PKU N PDF, Pakokku pengkomh B02 hna bawm in kahdohnak an tuah hi a si. Sagaing ramṭhen, Shwebo peng, Shwebo-Kyaukmyaung lam ah SAC ralkap pawl voi tampi bomrap an puah hnawh hna i 15 nak tlawm lo an thi tiah Burma Rangers nih an thanh.
June 10 zinglei sml 10:00am hrawng ah Shwebo-Kyaukmyaung lam ah SAC ralkap 50 hrawng cu Shwemi datsi zuarnak pawng ah bomrap lung 6 an puah hnawh hna i hliam a tuar mi an tam caah ar zuatnak hmun lei ah an zaam tiah an langhter.Cu a zaam mi SAC ralkap pawl cu bomrap lung 7 an puah hnawh chap hna i SAC ralkap 7 a hmun ah an thi tiah an thanh. SAC ralkap pawl cu ar zuatnak hmun chung ah bomrap lung 4 in a voi 3 nak an puah hnawh ṭhan hna i SAC ralkap tampi hliam an tuar, ar zuatnak hmun chung in SAC ralkap 7 an chuah lio ah bomrap an puah hnawh ṭhan hna i SAC ralkap 5 a hmun ah an thi, 2 fak ngai in an i hliam tiah theih a si.
SAC ralkap lei an sungh tuk caah thazang chap ding in Kyaukmyaung lei in SAC ralkap pawl an rat lio ah bomrap lung 6 an puah hnawh ṭhan hna caah SAC ralkap 3 an thi, 6 an kutke aa tan i fak ngai in hliam an tuar tiah an thanh. Kahdohnak chung in a thi mi SAC ralkap pawl cu ke 12 ngei mawṭaw in Shwebo lei ah an kalpi hna i zinglei sml 11:00am hrawng cun SAC ralkap 25 hrawng lawng Shwebo University tual chung ah an lut kho tiah theih a si. Kahdohnak le bom puah hnawhnak pawl hi Burma Ranger (Shwebo) nih bom lung 24 hmang in an tuah mi a si i SAC ralkap 15 an thi, 8 an kutke a bul i fak ngai in hliam an tuar, mipi hriamtlai lei him tein an kir kho tiah theih a si.