Update; Tibual kahdohnak kan pasaltha le an thawngpang dik!!

Tibual Khua Ah SAC Ralkap Le Chin Ralkap Kar Kahdohnak A Chuak Ṭhan, SAC Ralkap Pakhat A Thi!!
================
Chin ramkulh, Falam peng Tibual sakhan um SAC ralkap le Chin ralkap CNDF karah nizan November 23 ah voihnih tiang kahdohnak a chuak i SAC ralkap pakhat a thi, tiah theih a si.Nizan November 23 zing sml 11:45 hrawngah kaphnih kar kahdohnak a chuak i, zanlei sml 3:00-4:00 karah a voihnihnak kahdohnak a chuak ṭhan. Cu kahdohnak ah SAC ralkap pakhat a thi, tiah Chin National Organization(CNO) nih cathanh an chuah tiah theih a si.

Cu kahdohnak ah SAC ralkap nih mei bomb in an kah ruangah Tibual khua inn pakhat a kaang tiah CNO nih cun an langhter.
A luancia November 21 le 22 lio zong ah SAC ralkap le Chin ralkap CNDF karah voithum tiang kahdohnak a rak chuak i, CNDF lei in ralkap pakhat hliamhma hme a pu. Cun SAC ralkap lei in a thimi le aa hliammi an um ko nain fiang in theih a si rih lo, tiah CNO nih an langhter.

SAC Ralkap Nih Pauk Peng Sathein Khua An Khangh Caah Inn 241 A Ciam, Magway ramṭhen, Pauk peng Sathein khua cu SAC ralkap nih an khangh caah inn 241 a ciam tiah Pauk peng chaklei hmunhma um pah-kah-phah phu in tuanvo ngeitu nih a chim. Sathein khua cu SAC ralkap nih November 22 in 23 tiang ni hnih chung pehtlai in an khanghpiak hna caah tualchung mi hna an umnak inn 241 a ciam,

SAC ralkap nih Kawl biaknak an pathian lem zong an hrawh, cun Gwaykone(ဂွေးဂုံ) khua zong an khanghchih caah tualchung mi umnak inn 4 a kaang tiah theih a si. “Sathein khua cu inn 400 tluk hrawng umnak khua a si, SAC ralkap nih inn 242 an khanghpiak hna, zei bantuk thilri hmanh lakawk thalo in an ciam,” tiah Pauk peng chaklei pah-kah-phah in tuanvo ngeitu pakhat nih a chim.

Naupawi Lio Nu Pakhat Sii-inn Lei An Kalpi Lioah Motor Ai Let I Nu Pathum An Nunnak A Liam, Mandalay ramṭhen, Nyaung U peng, Nyaung U-Kyauk Pan Taung(ကျောက်ပန်းတောင်း) lam ah nizan November 23 chun sml 12:30 hrawngah chungkhar pakhat nih citmi motor pakhat ai leh caah mi bawmchantu phu nih an bawmh hna, tiah theih a si.

“Cu motor cu naupawi lio nu pakhat sii-inn ah a kalpitu a si i Nyaung U-Kyauk Pan Taung lampi metung 17/5 an phak ah rang tuk in a khalh ruangah ai let i nu pathum an nunnak a liam, naupawi lio nu cu a him,” tiah mi bawmchantu phu in ṭuanvo ngeitu pakhat nih a chim.
Motor ai citmi hi nu pali le pa pakhat an si i cu chungah pa pakhat le naupawi lio nu lawng an him, asinain hliamhma belte an pu, tiah theih a si.

SAC Ralkap Nih Pakokku Hrambunh PDF Sakhan Pakhat An Khangh, PDF Ralkap Pahnih An Tlaih Hna, Magway ramṭhen, Pakokku hrambunh Dragon Brothers Guerrilla sakhan cu, nizan November 23 ah SAC ralkap nih an khangh piak hna pinah PDF ralkap pahnih an tlaih hna, tiah Dragon phu in bawino Paing Kyi nih a chim.

Zanlei sml 3:00 hrawngah Pauk le Myaing lei ah rallam a sialmi SAC ralkap 80 hrawng a phurtu motor 9 an kai tiin thawng kan theih ahcun an kan luhhnawh cang, tiah a chim chap. “Sakhan ah a taangmi Chit Tey le Phu Lone cu ṭha tein sentari congh ding ah phone kan chawnh ko hna nain chawnh khawh an si ti lo.

Keihmah le PDF ralkap pahnih he sakhan lei kan va kal ahcun SAC ralkap nih an rak tlaih cang hna. Hriamnam tling in kan ngeih lo caah hnu ah kan kir ṭhan,” tiah bawino Paing Kyi nih cun a chim. Sakhan chungah a ummi facang tun 2, bomb le thilthuam hna cu SAC ralkap nih an lakpiak hna i tlaih a tongmi PDF ralkap pahnih zong Pakokku lei ah an kalpi hna, tiah theih a si.

NLD Hluttaw MP Pathum Hna Cu SAC Nih Thong Kum 20 Thlak Dingin Bia An Khiahpiak Hna,, Rampi nawlngeihnak latu Min Aung Hlaing nih thongtla cheukhat a thlah hna hnu ni tlawmpal a rauh ah NLD party Hluttaw palai pathum hna cu, Pathein thonginn ah kum 20 thong thlak dingin bia an khiahpiak hna, tiah theih a si.

Kum 20 thong thlak a tongmi hna cu Pathein ramṭhen Hluttaw palai Than Htuat, Tharpaung Pyituh Hluttaw palai Thein Htun, Tharpaung ramṭhen Hluttaw palai Aung Aung Oo hna an si, tiah theih a si. SAC kuttang Pathein thonginn chung biaceih zung nih rampi limhang thlaknak le rampi rawiphiarnak case in kum 20 thong an thlak hna hi a si, tiah NLD party chungtel hna sinin theih a si.

Thong kum 20 thlak a tongmi NLD Hluttaw palai pathum hna cu, SAC nih nawlngeihnak an lak hnu ah an i thup i thla khat a rauh hnuah SAC ralkap nih an rak tlaih hna. NLD party nih an khawmhsuatmi cazin ningin SAC nih nawlngeihnak an lak hnu in Hluttaw palai 90 tlaih an tong i, tlaih an ton i hren an ton lioah Hluttaw palai pahnih an nunnak a liam, tiah theih a si. Crd-TCP