Update!! Thawngfiang le thawngdik theih a si cang hih!

Hakha Sii-inn Chungah SAC Ralkap Nih Minung 19 An Tlaih Hna!!
============
Nihin October 4, zaanlei sml 3:30 ah SAC ralkap nih Hakha sii-inn chungah tualchung mi 19 an tlaih hna, tiah theih a si. Tualchung mi pakhat nih, “Hakha sii-inn ah ngandam lo ruangah siibawi i zohter dingin a kalmi tualchung mi hna cu SAC ralkap nih an tlaih hna,” tiah The Chin Post ah a chim.

Cheukhat cu covid 19 zawtkham sii i chunh dingah a kalmi an si. Cheukhat cu mizaw congtu zong an um. Mizaw congtu cu Siibawi te nih sii an cawkter hna i, an kir lei sii-inn chung an luh ah an tlaihmi hna zong an um. An sii cawkmi he palik sakhan ah an kalpi hna i, an mizaw conghmi hna kong an ruah ah an lungre a thei ngaingai, tiah a chim chap. An tlaihmi hna chungah nu 4 le pa 15 an si i palik sakhan ah an phone an check piak dih hna hnuah hman an thlak hna i zaanlei sml 6:30 ah an thlah ṭhan dih hna, tiah theih a si. Crd-The Chin Post

Ye Ah SAC Ralkap Thawngpetu A Umnak Inn Lila Ah Kahthah A Tong, Mon ramkulh, Ye peng Kyunelaung(ကျူံလောင်း) khua hlun ah a ummi SAC ralkap sin thawngpetu U Aung Myint cu kan fimhlawm tiah Mon State Revolutionary Organization (MSRO) nih an thanh.

Nihin October 4, zinglei suimilam 9:00 hrawng ah, a umnak inn ah MSRO phu nih meithal voi 15 kah in kan fimhlawm tiah an chim. “A umnak inn ah kan fimhlawm, a chungkhar cu zeihmanh kan ti hna lo, March thla lio MSRO kah an ton lio ah SAC ralkap sin ah thawngpeknak a tuahtu a si, SAC ralkap sin in sing 25 a ngah tiah kan theih” tiah MSRO phu in ṭuanvo ngeitu nih a chim.

Kum 40 tluk hrawng a si mi U Aung Mint cu kah a tonnak hmun ah a thi colh, a ngandamnak a ṭhat lo caah inn ah chae(ချဲ) zuar in a um, cun SAC ralkap sin ah thawngpeknak a tuah tiah theih a si.

Mizoram Ramkulh Myanmar Ramri Ah Rupee Sing 640 Jan Bing-rang An Tlaih, Mizoram ramkulh, Champhai ah Assam mi pahnih sin in sapiat bawm 100 chung ah rawnmi bing-rang rupee sing 640 man cu palik phu nih nihin October 3 ah an tlaih tiah theih a si.

Cu bing-rang cu Motor hnulei zawn ah ṭha tein an chiahnak hmun ah thuhnawh in an phorh tiah theih a si.
Bing-rang phorh ruang ah tlaih a tongmi pahnih hna cu Champhai palik phu nih 21(c)/ 25/29 rithaisi upadi poh-mah in an sual kawl an si tiah theih a si. Credit:Zalen

Hpakan Ah Motorcycle Ai Citmi Mino 2 SAC Ralkap Nih An Kahthah Hna, Kachin ramkulh, Hpakan ah motorcycle ai citmi mino 2 hna cu SAC ralkap nih meithal in an kahthah hnu ah an chungkhar sin ah an ruak pek lo in an khangh tiah pengkulh pyituh hluatdaw palai le tualchung mi hna nih an chim.

October 2, zaan suimilam 10:00 hrawngah Hpakan, Myomah sang Kalat dawr kalnak chukṭumnak zawnah cycle aa citmi mino pahnih hna cu SAC ralkap le palik nih thi lak in an kah hna hi a si. “Thil a can ning tak cu SAC ralkap hi mipi nih kan hmuh paoh ah cun ṭih an nun caah tlik zaam a si, tutan zong ah an ṭihlaunak ruangah dir loin an zaam i cu ah cun kahthah an ton hi a si tiah kan theih” tiin U Aung Hein Min nih a chim.

Kahthah a tongmi mino pahnih hna ruak cu SAC ralkap nih chungkhar sin ah pek lo in, hlamtu ngeilo ruak tiin an khanghpiak hna tiah tualchung mi nih an chim.

Rampi Cozah Sinah Nan Pek Dingmi Tax Felfai Tein Pe Hna Uh-Min Aung Hlaing, Ram mipi hna nih rampi cozah sinah nan pek dingmi Tax hna felfai tein pek cio dingin SAC hruaitu Min Aung Hlaing nih a chim tiah theih a si.

Tax a pe dingmi hna nih tling tein pek dingah le sipuaizi tuahmi hna nih nan i cawimi leiba cham cio dingin October 3 ni meeting ah a chim tiah theih a si. Ramchung chuak thilri in citi kan ser lai I ramdang ah kan kuat khawhnak dingah kan i zuam cuahmah lio ti zong meeting ah a chap.

SAC hruaitu Min Aung Hlaing cu ramkomh huap meeting ah a lungchuak bia poah a chim lengmang mi a si i kan hnu zongah cozah lutlai hna mah pumrua le khiing rih zaan ai tlak dingin nan um lai tiah nawl a chuahtu a si.

Palaw Ah Rallam A Sialmi SAC Ralkap Cu PDF, KNDO Le KPDF Nih An Kah Hna Caah SAC Ralkap 20 Leng An Thah Hna, Tannitharyi ramṭhen, Palaw pengah rallam a sialmi SAC ralkap motor cu PDF, KNDO le KPDF hna i bawm in kan kah hna caah SAC ralkap 20 leng an thi, tiah anmah ṭangṭi phu nih cathanh an chuah.

Nizaan October 3 zaanlei sml 2:30 hrawngah Myeik in Palaw lei ah a kalmi SAC ralkap motor 2 le lam a him le him lo ral a venpiaktu SAC ralkap motor hna cu, KNDO/PDF ṭangṭi phu hna nih an kah i SAC ralkap 20 leng an thih pinah motor 2 cu a hmun ah a rawk dih, tiah theih a si.

Cu hnuah Myeik in a chuakmi SAC ralkap motor 2 cu Palaw Pah Kah Phah chungtel a simi Ayeik(အရိပ်) Guerrilla phu(PSGF) ralkap hna nih bomb in puahhnawh ṭhan hna caah SAC ralkap a thimi a um Cu kahdohnak voihnih chungah SAC lei in minung 20 leng an thi i, 10 hliamhma an pu. SAC ralkap a thimi ruak cu, October 3 zaan sml 8:30 hrawngah motor 2 nih a lak hna, tiah cathanh an chuah.

Kani Ah SAC Ralkap Thilri Chantu Tilawng Cu Kah An Ton Caah SAC Ralkap 10 Nak Tlawm Lo An Thi, Tilawng Pakhat A Kaang, Sagaing ramṭhen, Kani peng Kanpyu(ကမ်းပြို) hmunram ah SAC ralkap thilri chantu tilawng 13 cu Monywa, Alone tilawng dinhnak hmun in an chuak i, Chin Dwin tiva hrawn in an kai, cu an kal pah ah PDF ṭangṭi phu hna nih nizaan October 3 zaanlei sml 3:30 ah an kah i, SAC ralkap 15 an thi, tilawng pakhat a kaang, tiah Kyauk Lone Gyi PDF sinin theih a si.

“Thilri chantu tilawng 13 chungah pakhat cu a kaang, sniper in ralkap 5 kan thah hna. Ralkap pawl nih an hmanmi pehtlaihnak(phone) chungin kan theih ning ah ralkap 15 an thi. Tilawng hna cu Chaung Wagyi(ချောင်းဝကြီး) khua tilawng dinhnak hmun ah an riak i, tilawng a kaangmi zong an remh cuahmah. Khanti(ခန္တီး) tiang a kal ding a si tiin kan theih,” tiah Kyauk Lone Gyi PDF ralkap pakhat nih a chim.

Cu tilawng nih cun mizaw phorhnak motor hna telh in vanlawng Diesel le zen-kuan an phorh, tiah a chim chap. Cu kahdohnak ah KLG PDF, Pyidaungsu Liberation, Moustache phu, Yinmarbin le Kani ṭangṭi phu hna i bawm in an kah hna, tiah theih a si.

Kanbalu Peng Ah SAC Ralkap Nih Hriamngan Duh Paoh In An Kah Caah Tualchung Mi 7,000 Leng An Zaam, Sagaing ramṭhen, Kanbalu(ကန့်ဘလူ) peng chaklei khuate pakhat ah nihin October 4 zinglei ah SAC ralkap nih hriamngan an kah caah khuami hna cu a himnak hmun ah an zaam, tiah theih a si.

Kanbalu peng chaklei, SAC ralkap 60 hna umhmun an khuarnak Chetkone(ချပ်ကုန်း) khua in nihin zing sml 6:00 hrawngah Zawchaung khua cu, hriamngan in an kah caah khuami cu a himnak hmun ah an zaam dih tiah theih a si. “Khah Mah Yah 3 SAC ralkap nih, hriamngan an kah caah Zawchaung, Alay Khone(အလယ်ခုံ), Tintaw(သင်တော) le Lwingyi(လွင်ကြီး) khua in khuami 7,500 hrawng cu inn le lo kaltak in ramlak ah kan zam dih,” tiah tualchung mi pakhat nih a chim.

Kyunhla(ကျွန်းလှ) khua in mi bawmchantu phu ṭuanvo ngeitu nih, “A zammi khua hna hi khua khat ah minung a thong leng a ummi an si. Ralkap nih hriamngan in an kah caah atu le atu an zam lengmang. Voi zeizat dah an zam cang ti zong kan hngal kho ti lo nain thawngpang kan hlat cuahmah,” tiah a chim. Kanbalu peng chungah SAC ralkap le pyusawhti hruaitu phungki pa i bawm in tualchung mi inn cu mei in an khanghpiak hna pinah khuami zong an thah hna, tiah theih a si.

A Ra Laimi ASEAN Meeting Ah Min Aung Hlaing An Sawm Lai Lo-Cambodia, Cambodia ram khualipi Phnom Penh ah a ra laimi November thla ah a voi 41 nak ASEAN tonpumhnak meeting le pehtlaihnak meeting tuahnak hmunah SAC hruaitu Min Aung Hlaing cu kan sawm lai lo tiin an langhter, tiah The Phnom Penh Post nih nihin October 4 ah an thanh.

SAC hruaitu Min Aung Hlaing cu ASEAN meeting ah kan sawm lai lo tiin Cambodia Foreign Minister zung in chimphuannak nawlngeitu Chum Sunry nih a fehter cang, tiah theih a si. ASEAN ram chungtel vialte cu kan sawm dih cang hna nain Myanmar ram cu kan sawm lo. Cozah he aa pehtlai lomi chungin aiawhtu pakhat lawng kan sawm,” tiah Chum Sunry nih cun a chim.

ASEAN hnatlaknak(agreement) phun 5 cu a tak in SAC nih an ṭuan lo caah Cambodia hruainak in a luancia Febuary thla ah rak tuahmi ASEAN runvennak zung palai pawl tonpumhnak(ADMM) ah SAC ramdang palai Wana Maung Lwin zong an rak sawm lo. A ra laimi ASEAN meeting le pehtlaihnak meeting cu November 8 in 13 tiang Cambodia ram khualipi Phnom Penh khua ah an tuah lai, tiah theih a si. Crd-The Chin Post