Kum Khat Le Cheu Chung Ah BPLA Le SAC Ralhrang Kar Kahdohnak Voi 44 A Chuak; SAC 90 Leng An Thi
=========
Kawl miphun luatnak hriamtlai Bamar People’s Liberation Army (BPLA) le SAC ralhrang karlak kum khat le chau chung ah kahdohnak voi 44 a chuak, tiah BPLA nih nihin June 30 cathanh an chuah.
BPLA hi Karen National Liberation Army (KNLA) nawlpeknak tang ah a dang hriamtlai phu hna he ṭangṭi in ralhrang kan doh hna i, 2021, December thla in 2023, June thla chung tiang ah kahdohnak voi 44 kan i tel kho, tiah theihternak an tuah.
Cu kahdohnak ah SAC ralhrang chungtel 91 an thi i, SAC ralhrang Lah-khah-yiah (97) kan kah lio hna ah 16 kan tlaih hna, tiah an langhter. Cu pinah SAC ralhrang sinin 60MM zun 4, 40MM zun 2, RPG zun 2 le hriamthil dang hna zong kan laak khawh chih, tiah an langhter chih.
BPLA in kum khat le cheu chung kahdohnak ah pasalṭha 4 nih ram le miphun caah an nunnak an pek i, ngandamlonak ruang ah minung 3 nunnak a liam. Cu pinah 16 nih hliamhma an tuar, tiah cathanh an chiahmi ah an langhter.
BPLA hi Karen National Union (KNU) hmunram chung le Shan ramkulh thlanglei Kokang hmunram chung hna kahdohnak zong ah a cawlcangmi hriamtlai phu an si i, Rakhine ralkap AA he zong neihniam mi sinak pehtlaihnak zong an tuah, tiah Bamar People’s Liberation Army (BPLA) nih cathanh an chuahmi ah an langhter chih.
Kawkareik Khuapi Um SAC Ralhrang Khah-lah-yiah 97 Battalion Cu Ṭangṭi Phufonh Nih 60MM In An Kah hna. Karen ramkulh, Kawkareik khuapi ah umhmun a khuarmi SAC ralhrang Khah-lah-yiah 97 Battalion cu Karen National Liberation Army (KNLA) le ṭangṭi phufonh hna nih 60MM in an kah hna, tiah theih a si.
Mipi hna umnak sang le khuate cheukhat hna cu nifate in hriamngan he a kaptu SAC ralhrang Khah-lah-yiah 97 Battalion hna cu Major Pwaltaw hruainak in White Tiger Column Ṭet-khuai (Southern Eagle PDF), White Tiger Ṭet-khuai 4, Ṭet-khuai 5 (Justice Soldier PDF) hna fonh in an kah hna hi a si, tiah theih a si. Cu kahdohnak ah SAC ralhrang lei in a thimi le hliam a pumi an um, tiah White Tiger hriamtlai phu nih June 30 ah thawngthanhnak an tuah.
Mah ralhrang pawl nih a luancia June 22 lio ah duhpaoh in an kahmi hriamngan ruang ah mipi hna an umnak hmun Kawkareik peng, Kyaung-shar-kone khua inn hna zong an rawk, tiah theih a si.
SAC ralhrang nih nawlngeihnak a laak ka in Kawkareik thlanglei hmuntampi ah nifate nawn in kahdohnak a um, tiah theih chih a si.
Kachin Ah PDF Minbunh In Firnak A Tuahtu Pawl Cu Tlaih In Dantatnak Kan In Tuah Hna Lai. Kachin ramkulh, Mohnyin peng ah PDF minbunh in mifir/damiah ṭaih tu pawl cu kan in thlaih hna lai i, dantatnak kan in tuah hna lai, tiah PDF nih June 30, nihin ah cathanh an chuah.
Mohnyin peng chung le kan hmunram chung ah mihrokhrol pawl nih PDF min hmang in mipi le mipi ralkap hna karlak ah i hmuhthiamlonak a umnak ding ca ah thinh chih tein firnak, damiah ṭaihnak, mithil chuh, rianngei tu hna le thilphur motor pawl tangka khawlhnak pawl an tuah, tiah theih a si.
Mohnyin-PDF hi dothlennak caan a hramthawk in nihin tiang mipi hna bawmhchanhnak, zawnruahnak le dawtnak thawng in kan dir kho i, firnak, damiah ṭaihnak, mithil chuh le mipi ṭhihphaihnak pawl zong voi khat hmanh kan tuah bel lo i, atu hnu zong ah kan tuah lai lo, tiah cathanh an chuah.
Cucaah mipi hnahnawhnak a petu mihrokhrol pawl cu hlathlainak tuah in kan thaih hna lai i dantatnak zong kan tuah hna lai caah mipi nih dirpi in thawng nan kan peknak lai, tiah cathanh an chuahmi ah an langhter chih.
June 29 ah Mohnyin khuapi, Na-hka-myawt sang ah ummi suidawr pakhat cu pa 6 nih Cycle 3 le meithal he an luhhnawh i, sing 1,000 man sui an fir piak hna. Cu pinah Mohnyin peng, Bawdikone khua um inn pakhat zong June 27 ah damiah an ṭaih hna, tiah theih a si.
Minyar Khua Cu SAC Ralhrang Nih ni 2 Chung Cunglei In A Kah Caah Mipi Thimi Le Hliamtuar An Um. Sagaing ramṭhen, Paungbyin khuapi pawng um Minyar khua cu SAC ralhrang nih ni 2 chung pehtlai in raltuknak vanlawng in bomb an thlak hnawh caah mipi nunnak liammi le hliam a tuarmi hna an um, tiah tualchung mipi hna nih an chim.
June 27 in nihin tiang Paungbyin khuapi pawngkam hna ah SAC ralhrang le mipi ralkap hna karlak ah kahdohnak a chuak. Ni 3 chung kahdohnak ah SAC ralhrang thimi an tam caah jet vanlawng hna hmang in June 28 le June 29 ni 2 chung pehtlai in bomb a thlak hi a si, tiah kan theih.
“SAC ralhrang nih June 28 ah bomb a thlak pinah June 29 zan suimilam 9:45 tluk ah bomb 3 a thlak ṭhan i, mipi nunnak liammi le hliamhma tuarmi an um nain zeizat an si tucu ka thei fiang lo” tiah tualchungmi pakhat nih Khit Thit ah a chim.
Tualchung mipi ralkap thawngzamhnak cheukhat hna nih “Ni 3 chung pehtlai in kahdohnak faak ngai a chuah caah SAC ralhrang nih jet vanlawng in bomb a thlak pinah tanglei in ralhrang thazaang zong tam ngai a chap chih hna” tiah an langhter chih. Credit: The Chin Post