Update Thar; Nikhat chung Hakha khua chung kahdohnak kan pasaltha le an thawngpang fiang!!

Hakha Thawngpang Update A Dotdot!!
==================
Hakha Ah Hriamngan Thawng Pehtlai In A Than Hnuah Helicopter Pakhat A Phan, Chin ramkulh khualipi Hakha ah nihin November 20 ni ah hriamngan thawng pehtlai in a than hnu caan tlawmpal ah Helicopter pakhat a phan, tiah theih a si.

Hakha ummi pakhat nih, “Nihin zinglei cu kahdohnak thawng kan theih mi cu a um lo nain SAC ralkap nih hriamngan voili nga hrawng an kah. Cu hnu zing sml 9:00 hrawngah SAC ralkap Helicopter pakhat Hakha a phan i, caan tlawmpal a um hnuah a kir ṭhan,” tiah The Chin Post ah a chim.

“Rungtlang SAC ralkap sakhan in hriamngan voi tam ngai an kah. An kah le cangka in vanlawng a zuangmi khu bantukin hriamngan kuan khuvai tampi a chuak. Hriamngan kuan cu Timit tlang let ah a tla i a puah thawng hi Hakha in a thang ngai,” tiah tualchung mi pakhat nih a chim.

SAC ralkap nih nihin November 20 chun zong ah hriamngan an kah i, Biakinn ah ai pumi mipi zong an lau ngaingai caah ṭhutsia rem loin an um, tiah theih a si.

20 Nov: Tuhi Rungtlang in Timit lei ah an kahmi hriampi/bom a si,An hriam ngan bikbik an hman thluahmah ko cang. Cucaah kan ralkap hna caah thlacam daithlang hlah usih.Adolf Hitler hmanh uai le ttilh ni a ngei, hi ralhrang lubo MAH hi a par peng lai lo.Nihin 20/Nov ah Timit lei kiangkap ah UC le kan ralkap an i kah sau ngai,thi hliam a fiang lo,HK in hriampi an kah uahmah ko rih. UC hi Sapha an phan cang tiah kan theih

Chin ramkulh ah SAC ralkap le Chin ralkap kar kahdohnak a chuak i, SAC ralkap nih Jet Fighter hmang in ni 5 chung kahdohnak an tuah, tiah theih a si. Chin ramkulh, Tibual SAC ralkap sakhan cu drone in voi 300 leng bomb in kan thlakhnawh caah SAC ralkap 30 hrawng an thi, tiah CNO/CNDF nih cathanh an chuah.

A luancia November 15 zing sml 5:30 ah CNDF nih Tibual SAC ralkap sakhan cu hrianngan, hriamhme le drone in an kah caah kahhnih kar kahdohnak sml 3:00 chung a rak chuak, tiah theih a si. Zing sml 9:00 hrawng in Jet Fighter nih bomb voi 3 le zanlei sml 6:00 hrawngah voi 4 a thlak. A voihnihnak an thlak bomb ruangah SAC ralkap sakhan pawng ummi inn 2 a kaang. November 15 kahdohnak ah SAC ralkap 8 hrawng an thi, tiah theih a si.

Cu kahdohnak ah ZFU/PDF-Zoland, CDM-Siyin le Chin hriamtlai phu fonh CJDC zong nih an bawmh hna, tiah theih a si. November 16 zinglei siseh, zanlei sml 2:00 hrawngah siseh kaphnih kar kahdohnak a zual ṭhan i, zanlei sml 2:55 ah Mi- 35 vanlawng in minutes 20 tluk a rak kah hna. Cu ni kahdohnak ah Chin hriamtlai phu hna nih SAC ralkap 5 an thah hna tiah theih a si.

November 17 zing sml 9:30 le zanlei sml 2:00 hrawngah kaphnih kar kahdohnak a chuak ṭhan i, Mi-35 vanlawng hmang in minutes 45 tluk a rak kah than hna. Zaan ah ṭangṭi phu a si mi MEDF nih drone in bomb an thlak caah SAC ralkap 6 an thi, hliamhma pumi zong an tam, tiah theih a si. November 18 zinglei ah CNDF nih SAC ralkap sakhan cu hriamngan in an kah ṭhan caah SAC ralkap 4 an thi chap.

Cun nizan November 19 zing sml 5:00 hrawngah Tibual SAC ralkap sakhan cu, CNDF nih an kah ṭhan i CDF-Lautu zong nih an rak bawmh ve hna. SAC ralkap Jet Fighter 2 le raltuknak Helicopter 3 nih Tibual sakhan um ralkap pawl cu an bawmh ve hna pinah ralkap thazaang an rak chap, cun SAC ralkap a thimi ruak le aa hliammi hna cu Helicopter in Kalaymyo sii-inn ah an kalpi hna, tiah theih a si.

Cuni zanlei sml 5:00 hrawngah Tibual SAC ralkap bawmh ding in vanlawng nih a rak thlakmi ralkap hna cu, CNDF nih Bualte khua ah lamhruang in an kah ṭhan hna caah SAC ralkap 6 an thi, cu hnuah SAC ralkap nih Bualte khua cu an khangh, tiah theih a si.

One Championship nih thonghman zei zat a pek hna hi a thanh bal lo. Sinain Media pawl nih an dotthlat i an theih than tawn( dikthlir cun si kho ve lo). Aung La Nsang nih Champion a si lio ah thonghman hi dollar sing 2 a hmuh tawn. Nain champion a si ti lo hnu cu dollar sing khat lawng a hmuh. Teinak a hmuh tu ah cun laksawng dollar sing khat chap a si tiah thawngla tu Rauf Chaudhry nih a chim.

Tutan ah Yushin Okami a tei i dollar singkhat a hmuh. Teinak a hmuh caah dollar singkhat pek chap a si. Round khatnak ah a tei caah laksawng dollar thong 50 hmuh rih ding si nain rikhiahmi nakin a rih deuh caah an pe lo. Tutan thonghnak ah a hmuhmi dihlak dollar sing 2 a si( Tulio dollar thlen in kan tuak ah cun Sing 5000 nak tam a hmuh ti khawh a si).

FIFA World Cup 2022 Cu Tuzan Ah Thawk A Si Cang Lai, Caan saupi pumpululh zohtu(fan) hna nih kan i ngaih bik mi FIFA World Cup 2022 cu Qatar khuapi Doha ah thawk a si cang lai. Tutan FIFA World Cup an chuihnak hi Middle East ram lin/lum a si caah vawidang bantuk siloin nikhua a kihdaih deuh caan November-December ah chuih a si lai.

Middle East ah World Cup an chuih a vawikhatnak zong a si lai. Hi ruangah hin vawleicung ram tampi league chuih lio mi cu a hnursuan i, players zeimawzat zong hliamkhuai an ton ruangah World Cup an chuih kho lo.

Cu pin ah vawleicung nihrin covo phu hna sin in tutan Qatar World Cup hi soisel a tong ngai fawn. FIFA World Cup dong ding in an i timhsaihnak ah Qatar nih nuhrin covo a buar; Qatar cozah fel lo ruangah rianṭuantu tampi nunnak a liam, ti a si. Muslim ram a si bantuk in zu khapnak ram a si i, stadium chung ah beer zuar le din an siang lo.

Cucaah sponsored zeimawzat nih an chuahtak hna, tiah thawngpang a leng. Muslim biaknak nih nudawk padawk(Gay) a cohlan lo bantuk in certual ah gay dirkamhnak langhter lo ding Qatar siangpahrang nih FIFA a rak theihter cang. Cucaah nuhrin covo a dirhkamhtu hna nih a doh ngai i tutan World Cup cu ka zoh lai lo a titu minung zong an tam.

Tutan World Cup donnak ah hin Qatar cu $229 billion bak a dih i, vawleicung tuanbia ah a dihheu bik World Cup a si. Stadium(Certual) dawhdawh cu muisam phundang ngai in an sak i, riahbuk(hotel) ṭhaṭha zong an sak. Ram hme te an si nain Oil le Gas ah a rummi ram an si caah an i timhsaihnak ah phaisa an dih hringhran.

Hramthawk puai(Openning Ceremony) cu tuah cuahmah lio a si cang i, pumpululh chuih taktak cu Myanmar caan zaan suimilam 10:30(9:30 IST) ah inn ngeitu Qatar le Ecuador nih an chuih lai. Tutan World Cup ah hin ahodah bualco lai? na ruahnak zalong tein comment ah chim khawh a si. Crd-The Chin Post