Update Thar; Falam – Hakha kar ah aa tap mi ralkap Hakha khuachung an lut

Falam – Hakha kar ah aa tap mi ralkap Hakha khuachung an lut
====
Falam le Hakha karlak ah zarhkhat tluk aa tap mi ralkap motor 40 fai, tank pahnih le JCB pakhat cu nihin zanlei sml 3: 15 tluk ah Hakha khua an lut kho cang tiah thawng kan theih. Falam in October 13 ah Hakha lei aa thawh mi ralkap cu CNA, CNDF le CDF nih lam an kham hna i an kah hna caah zarhkhat fai lampi ah an i tap.

Chin ralkap nih SAC ralhrang a tlawm bik minung 20 an thah hna, 40 renglo an hliamh hna pin ah an motor 16 an hrawhpiak hna. Ralhrang hna nih Rialti khua ah biakinn telh in inn 13 an khangh pin ah Thlanrawn khua inn 13 a khanghpiak rih hna. Cun an biakinn zong an hrawhpiak hna.

October 19 zan ah ramthlo biakinn pahnih (AG le Baptist) biakinn ah an riak i ramthlo khuami satil an thahpiak hna pin ah inn 100 tluk an baoh piak hna tiah kan theih. Ralhrang hna nih Rialti, Thlanrawn, Lungrang le Ramthlo khua hna ah mipi thil tampi an firpiak rih hna.

Falam ah Ralkap bokhat pa nih tangka le nupi a zaampi. Chin Ramkulh, Falam LIB-268 Battalion in Ralkap bokhat Ye Yint Thu nih nizan October 19, chun sml. 12:00 hrawng ah, Palek Sakhan chung ah a um mi MEB Bank ah Ralkap Zung tangka Kyats sing 200 leng a thoh hnu ah nupi a fir i an zaam tiah theih a si.

“Bank cu Palek Sakhan ah an thialnak a sau cang. Cuka ah cun a va thoh. Ralkap tangka sing 800 hrawng a um. Cu chung ah sing 200 a thoh i a zaampi. A motorcycle cu Cinmual sang ah an hmuh. Ka ruahnak ah a nupi motorcycle asiloah motor in an zaam i a si lai. Hriamnam cu aa ken lo tiah theih a si,” tiah Falam khuami pakhat nih a chim.
Ralkap a zaam mi pa nih ramri ah a um mi CDF pawl sin ah pehtlaihnak a tuahnak a um rih lo tiah kan theih.

Uknak chuttu Min Aung Hlaing ralkap hna nih inn an bauh, thil an fir lawng si loin Sia pakhat an kah. Min Aung Hlaing hnuzul Ralhraang pawl nih Hakha le Falam kar um Falam Peng, Tlangzaar khuachung ah lut in inn an bauh pinah sia pakhat an kah thah tiah theih a si.

Khuami pakhat nih, “Khuachung an phak in inn kip ah an lut i fir an kawl. Inn an bauh. Inn chung thilri pawl an lehthal dih cikcek. Tangka le man sung thil a tlau mi tu cu fiang in theih a si rih lo. Sia pakhat zong an kah i a sa can lo in an chiah taak,” tiah a chim.

Hakha lei panh in an rat lio ah Min Aung Hlaing ralkap hna cu Hakha le Falam kar ah CNA, CDF le CNDF hna i fonh in an doh hna i an motor 16 an khanghpiak hna. A thimi zong an tam tiah kan theih. Nihin October 20 zaanlei sang in Hakha khua ah an rak lut cang i hmun cheukhat ah bomb thawng zong theih a si.

Mizoram, Sangau khua Auto Rickshaw Association nih Myanmar ralzaam bawmhnak ah nikhat an hmuh mi tangka an pek. Mizoram Sangau Dustrict chung Auto Rickshaw Association hruainak in 2021 October 17 ah an hmuh mi dihlak Rs. 8000 cu, Myanmar ralzaam bawmhchanhnak ah an pek.

“Hi ni an hmuh mi dihlak h Rs. 8000 a si i ralzaam bawmhnak ah an pek dih,” ti in Pu L. Z. Ringlawt nih The Hakha Post ah a chim. “2021 kum chung hi cu, Ralzam hna nih rickshaw taxi hman man zong 50 % thumh an si lai” ti zong a chim chih.

Sangau khua Auto Rickshaw Association ah hin member 20 an um. October 11 lio zong ahkhan Charity service an tuah i ni khat an hmuh mi dihlak Sangau khuachung Myanmar ralzaam an pek hna. Charity service hi ralzam bawmhchanhnak ah an dirh mi a si. MZP, Mizoram ramkhel party, Biaknak phu, Mizapi, hlasak thiam pawl le pumpak nih an ti khawh tawk cio in Myanmar ralzaam bawmhchannak hi an rak pek cio cang.

Hi bantuk in kan unau an si tiin an kan fimtawlnak cungah hmur le ka in chim thiam awk ah a har mi dawtnak, zawnruahnak kan cung ah an ngeih mi hi, Bawipa Pathian nih bongmalzaa sawm ko hna seh, tiah Sangau khua ah aa dor mi Myanmar ralzaam pakhat nih a chim.