Karenni Kahdohnak Ah Jet Vanlawng Pakhat An Kahthlak Khawh
=========
Karenni ramkulh, Bawlakhe peng, Ywathit peng, Thanlwin tiva kam Border Guard Forces (BGF) Battalion 1005 pawng ah SAC ralhrang jet vanlawng pakhat cu an kahthlak khawh, tiah Karenni National People’s Liberation Front (KNPLF) hruaitu pakhat nih a chim.
Nizan June 30, zinglei suimilam 11:00 tluk ah an kahthlak khawh hi a si i, a pawng in a dang raltuknak vanlawng le helicopter hna pinah SAC ralhrang (Ke ralkap) hna nih an kulh hna caah a tlami vanlawng cu kan neih kho rih lo, tiah a chim. “Jet vanlawng kan kahthlak khawh nain atu tiang zeibantuk vanlawng (Phun) a si cu kan thei kho rih lo. Kahdohnak zong a faak ngai rih” tiah Khit Thit ah a chim.
SAC ralhrang thawngzamhnak nih “Karenni kahdohnak ah a tlami jet vanlawng hi a chia deuhmi K-8 phun a si i, seh meithal zong nih a kahthlak khawhmi phun a si” tiah a langhter ve. Kahdohnak cu Karenni National People’s Liberation Front (KNPLF), Karen National Liberation Army (KNLA), Karenni Nationalities Defence Force (KNDF), Bawlakhe PDF, hmunlai PDF hna fonh in an si i, kaphnih lei thimi le hliamtuar kong ah thawngfiang theih a si rih lo, tiah kan theih.
June 23 in SAC ralhrang nih Bawlakhe khuapi ah hmun 2 in rallam an sial hnu in meng 12 aa duhnak hmun ah hmun 4 ah i ṭhen ṭhan in rallam an sial caah kahdoohnak a faak, tiah theih a si.
Dothlennak Caan Chung Ah Minung 3736 An Nunnak Liam Cang; Minung 23651 Tlaihkhih An Tong Cang. 2021, February, 1 in SAC ralhrang nih hramhram in nawlngeihnak a laak hnu ah Democracy kan hmuhnak ding caah a dohtu hna le mipi chung in minung 3736 an nunnak a liam cang, tiah ramkhel lei thongtla bawmchantu le zohkhenhtu Assistance Association for Political Prisoners (AAPP) nih June 30 ah thanhca a chuah.
Cu pinah tlaihkhih a tongmi hna dihlak fonh minung 23651 an phan cang. Cu chung ah minung 19295 hna cu an erhkhumh rih hna i, minung 6621 hna hi thongthlak dingin nawl an chuah piak hna, tiah a chim. Myanmar ram dothlennak he pehtlai in 2023, June 30 tiang ah thih dan pek in thong an thllakmi hna minung 115 an phan cang. Thih dan an pekmi hna minung 42 hna telh in minung 121 hi dantatnak an tuah hna.
Cucaah thih dan an pekmi hna dihlak fonh minung 157 an si cang i, tlaihkhih a tongmi hna chung in minung 4356 nih luatnak an hmuh ṭhan, tiah AAPP nih thanhca a chuah. Myanmar ram fimcawnnak lei in cachimtu Saya/mah hna telh chih in cozah rianṭuan tu pa 221 le nu 249 (An dihlak fonh) minung 470 hna cu SAC ralhrang nih an tlaihkhih hna.
Tlaihkhih a tongmi hna chung ah Mandalay ramṭhen in minung 108 an si i, phungning lo phung ṭengnge (Poh-mah) in thongthlak a tongmi 118 an i tel, tiah Assistance Association for Political Prisoners (AAPP) nih cathanh a chuahmi ah a langhter chih.
SAC Jet Fighter Kan Thlak Khawh Tiah KPLF Hruaitu Pakhat Nih A Chim! Karenni ramkulh, Bawlakhe peng, Thanlwin tiva kam BGF battalion 1005 umnak pawng ah SAC ralkap raltuknak vanlawng pakhat kan kah i kan thlak khawh, tiah Karenni People’s Liberation Front(KPLF) in hruaitu pakhat nih a chim.
Nizaan June 30, zinglei suimilam 11:00 hrawng ah SAC ralkap raltuknak vanlawng pakhat cu kan a thlak, a tlaknak pawngkam ah cun a dang ral tuknak vanlawng, helicopter le vawlei lei ralkap nih an ventuk caah a tlami raltuknak vanlawng cu kan zoh kho lo, tiah a chim.
Kaphnih kar kahdohnak ah SAC ralkap hna cu KPLF, KNLA, KNDF, Bawlakhe PDF le Central Region PDF phufonh nih an kah hna. Kap hnih in a thi mi le hliamhma tuarmi hna kong fiang tein theih a si rih lo.
A luancia June 23 in SAC ralkap nih Bawlakhe ah hmun hnih in rallam an sial pin ah meng 12 hmunhma zong ah hmun li in rallam an sial i kaphnih kar kahdohnak a fak ngai, tiah Khit Thit Media nih a ṭial.
Sagaing Ramṭhen, Samon Khua Um PDF Hna Meithal Le Zen-Kuan Vialte SAC Ralkap Nih An Laak Dih! Sagaing ramṭhen, Sagaing peng, Samon khua ah a ummi PDF hna meithal, zen-kuan le an motor cu June 29 ah kan lakpiak hna, tiah SAC nih an thanh pinah PDF lei zong nih SAC ralkap nih an kan luhhnawh i kan hriamnam an kan chuh, tiah an langhter ve.
PDF sakhan cu SAC ralkap nih an luhhnawh hna lio ah nu pahnih zong an nunnak a liam, tiah theih a si. Nu pahnih thihnak kong he pehtlai in SAC nih fianternak le thanhnak an tuahmi zeihmanh a um lo.
“Samon khua um PDF hna hriamnam le zen-kuan a lakpiaktu SAC ralkap pawl cu Samon khua ah a um ti lo, kadang ah rallam an sial cang. A luancia ni tlawmpal ah PDF a bubu in a thattu SAC ralkap kha an si,” tiah PDF ralkap pakhat nih BBC ah a chim.
Thailand Myanmar Embassy Zung Hmai Ah Min Aung Hlaing Chiatserhnak Tuah An Timh! Thailand ram Bangkok Myanmar Embassy zung hmai ah Min Aung Hlaing chiatserhnak le SAC duhlohnak ah, Thailand phan Myanmar mi hna nih thilthuam nak i hruk in lam zawhnak tuah an timh, tiah theih a si.
A ra laimi July 3, chun suimulam 1:00 in zaanlei suimilam 3:00 tiang Min Aung Hlaing chiatserhnak cu tuah timh a si i, cuka hmun i a kal kho mi poh nih Min Aung Hlaing thih hnu pin lei ca ah chiatserhnak bia chimcio ding in le a nak mi thilthuam i hruk ding in thawng an thanh.
Sagaing Peng In Ni 5 Chungah PDF 31 Le Tualchung Mi 5; An Dihlak Minung 36 Thah An Tong! Sagaing ramṭhen, Sagaing peng ah rallam a sialtu SAC ralkap nih June 25 – 29 tiang ah PDF telh in tualchung mi 36 an thah hna, tiah tualchung mi hna nih an chim. SAC ralkap nih hin PDF chungtel 31 le tualchung mi 5 an thah hna, tiah theih a si.
June 29, zinglei ah Sagaing peng, Samon khua cu SAC ralkap 50 leng nih hriamngan le hriamhme kah buin an luhhnawh i hriamngan hliamhnak in tualchung mi 2 an nunnak a liam pinah khuami 2 hliamhma an tuar, tiah khuami pakhat nih a chim.
June 28, zinglei ah Sagaing peng, Sintgaing khua pawng ah SAC ralkap le tualchung hriamtlai phu kar kahdohnak a chuak. Cu kahdohnak ah cun PDF 14 mei khangh in an thah hna pinah meithal zun 12 an laak, tiah tualchung hriamtlai phu chungtel pakhat nih a chim.
June 25, zinglei zong ah SAC ralkap thazaang 50 hrawng nih Kintaw khua pawng ah PDF nih caan karlak umhmun an khuarnak sakhan cu an luhhnawh hna i PDF 17 an thah hna, tiah Sagaing peng PDF lutlai pakhat nih a chim. Cu hnu ah Kintaw khua mi Ko Myint Kyaw Tu(kum 37), U Maung San(kum 50) le Myinsi khua mi U Pauk Sa(kum 69) cu SAC ralkap nih an thah hna, tiah tualchung mi nih an chim. Credit: The Chin Post