Update; PDF-Kalay, CNDF Le Ralhrang Kahdohnak Thawngthanh

Oct 3: PDF-Kalay, CNDF Le Ralhrang Kahdohnak Thawngthanh
===============
Oct 3, tuni ah Kalaymyo in chaklei ah a kalmi ralhrang mawtaw le chungkhar mawtaw, a dihlak mawtaw 8 hna cu Kalay GTC pawngah chikhat an dir i lamkam ah bomb an kawl lioah timhcia tein hmanhmi bomb cu PDF Kalay nih an puahhnawh hna. Ralhrang pakhat a thi.

Ralhrang nih cun ruahdamh in an kah len hnuah an cheklei ah an lan i Thayagone khua pawngah PDF Kalay nih an kah than hna. Ralhrang mawtaw pahnih a rawk i ralhrang pathum an thi, tam nawn hliam an tuar. Ralhrang hna cu Siitha khua pawngah an vun i funtom than i a taangmi mawtaw 6 he an lamthluan an peh.

Asinain 11:00 am ah Pamunchaung hlei le Aung Chian Tha khua karlak ah PDF Kalay le CNDF nih an kah nolh hna i ralhrang mawtaw 3 le chungkhat mawtaw Parado 1 cu an rawk cikcek. A chungah a ummi ralhrang 10 nak tlawmlo an thi. PDF Kalay le CNDF hna cu hliamtuar le a thimi um lo tein an i zukphiak kho.

Kalay-Gangaw le Kalay-Tamu lam ah zeitik caan paoh ah kahdohnak a um khawh caah ahohmanh mawtaw in tlunkal rih lo dingah PDF Kalay nih ralrin peknak ca an chuah than.

Putao Ah Min Aung Hlaing A Rat Ahcun Kan Kah Lai Tiah PDF Nih Ralrin An Pek. Kachin ramkulh Putao khuapi ah ralhrangbu hruaitu Min Aung Hlaing cu kal aa tim i “Putao ah Min Aung Hlaing a rat ahcun kan kah lai” tiah Putao PDF nih Oct 3, tuzing ah ralrin peknak cathanh an chuah.

Ralrin peknak cathanh an chuah lawng a si lo. Putao khuapi luhnak i ralhrang nih mi lut-chuak an check nak Mulashidi Gate cu Oct 3, tuzing suimilam pakhat hrawngah Putao PDF nih hriamngan he hriamhme he an kah fawn.

Putao PDF nih cun Mulashidi gate an kahnak ah ralhrang lei a thimi an um kho, ralhrangbu hruaitu Putao rat aa timhmi cu kan duh lo, a rat chih ko a si ahcun kan kah hrimhrim lai tiah cathanh an chuahmi a si.

Hi cathanh an chuah hlan zongah Putao ah Min Aung Hlaing a ra lai ti thawng a len hmasa lioah Putao PDF nih kahdohnak thok dingin timhcia kan si tiah an rak thanh bal cang.

Ralhrang Nih An Kahthahmi Pastor Cung Biak Hum Nupi le Fale Sinah Baptist Church of Mizoram,Sangau Nih Bulhnak An Pek. Thantlang khua ah ralhrang nih an kahthah i a kutdong hrolh an lak duh ruang ah a kutdong tiang an tanpiakmi Thantlang Baptist Pastor, Pastor Cung Biak Hum nupi Pi Sui Tha Par le a fale pahnih cu Sangau khua ah an rak i dor ve i, Mizoram Presbyterian Church, Sangau Sunday School hall ah an um lio. An rak phanh kaah quarantine colh an si i, nihin ah Covid-19 zong an va i test i an nufa rual hin an negative dih.

Nihin October 2, 2021 ah Baptist Church of Mizoram,Sangau Khrihfabu hruaitu hna nih cun Pastor Cung Biak Hum bulnak ahhin a nupi Pi Sui Tha Par le a fale sinah phaisa Rs. 10,000 an pek.

Pi Sui Tha Par hi pum lawng lo naupawi lio a si i, November thla donghlei ah aa then lai zumh a si.A fale he inn hlan ding an hmuh rih lo caah Mizoram Presbyterian Church, Sunday School hall, Sangau ah hin khua an sa rih. Credit: The Chin Post