Min Aung Hlaing Mandalay A Kal Lio Bomh Puahnak Le Kawlram Chung Thawngpang!

Min Aung Hlaing Mandalay a phak lio BPO phu nih Ralhrang Sakhan Bomb in an puah
=============
Ralhrang hruaitu Min Aung Hlaing Mandalay a phak lio ah Ralhrang Sakhan BPO phu nih Bomb in an puah tiah kan theih. November 4 tuzing 6:30 AM hrawng ah Mandalay Khuapi,Mahar Aung May peng, Mahar Aung May Lungvar zuar nak Sakhan in nichuah Chak lei kam Ralhrang Sakhan pakhat cu BPO phu, nih kut cheh mi Bomb pakhat in kan puah hnawh hna tiin BPO phu nih a chim.

Mah kaa zawn puah nak ah Tat-Kyat pakhat a thi i a Palek bawi hliamhma a pu. Ralhrang Council nih Lungvar man on ding in ca an chuah mi cung ah BPO phu nih an lehrulh mi hna asi tiin kan theih. Atu zawng ah Mandalay khuachung motorcycle le Motor pawl a hlei in check nak an ngei tiin Mandalay khuami sin in kan theih.

“78 lam lei ah check nak a tam Khun. A dang khuachung tamdeuh ah cun Motorcycle le motor zawng an check tuk” tiin khuami pakhat nih a chim. November 3 ah Ralhrang hruaitu Min Aung Hlaing Mandalay aphan cang. Mandalay khuachung ah Ralhrang nih a hlei in runven nak an ngei.

Ralhrang ngeihmi Mytel riantuannak hruaitu Chief Financial Officer bu-hmu hlun simi Thein Awng thah a tong. Yangon ramthen, Mayankung peng no.7 sang,meng 7, Tay-nuh-yin(တေးနုယဉ်) lam, inn number (26/A/G1) inn ah hmai lam chawhding in a chuakmi buhmu hlun Thein Awng mytel riantuannak hruaitu (စစ်Chief Financial Officer)cu nihin zinglei suimilam 7:30 hrawngah meithal kah nak in a thi tiah theih a si.

November 4, zinglei suimilam 7:30 hrawngah meithal a put mi pakhat nih bu-hmu hlun Thein Awng le a nupi cu lam an chuah hngak in a kah, meithal kuan nih voi 4 hliamh caah cuka hmun ah cun a thi, a nupi cu a ban,a tai le a kee ah kuan nih a hliamh ve tiah theih a si.

A tu ah ralhrang phu hna nih cuka sang cu an phih i checkhlatnak an tuah tiah sangchung ummi hna nih an chim.
A thi mi Thein Awng cu Mytel riantuannak ah hruaitu le bochanngaimi a si i, military university voi -28 nak dihmi ti lei ralkap a si, Cun tulio ah ti lei bu-choh-gyi Moe Awng he hawikom an si tiah theih a si.

Tanhsee (တန့်ဆည်) ah ralhrang phu umnak RPG in kah an tong ralhrang 4 an thi, Monywa palik pakhat PDF nih an thah. Sagaing ramthen Tanhsee (တန့်ဆည်) peng November 3, ah ralhrang phu hna cu RPG in doh an tong. Cun Monywa zong ah palik pakhat cu meithal kuan nih a hliamh caah a thi.

Tanhsee (တန့်ဆည်) peng, Innkokka(အင်ကုက္ကား) khua cinthlaknak zung ah hmunhma a khuarmi ralhrang phu cu November 3, chunhnu suimilam 1:00 hrawngah Taze People Comrades- TPC nih RPG in an doh hna caah ralhrang phu lei in minung 4 an thi, pakhat nih hliamhma a tuar tiah theih a si.

Cu kahdohnak ah cun TPC le CAF phukomh nih an doh hna, mipi ralkap lei in hliamhma tuar umlo in hnu kan tolh kho tiah TPC lei rianngeitu pakhat nih a chim. Monyua khua Nandawon(နန္ဒဝန်) sangah palik pakhat cu November 3, chunhnu suimilam 2:00 hrawngah meithal kah a ton caah a thi tiah theih a si.

PDF-South Monywa phu in rianngei pakhat nih ” palik pakhat kah a ton nak kong ah kan mah tuahmi a si, meithal in voi hnih kan kah caah cuka hmun ah cun a thi colh, a tak pum ah hriamthil a um theu lai tiah kan kawl na in a um lo, palik sinak card lawng ka hmuh” tiah a chim.

Thawai(ထားဝယ်) ah ralhrang phu bomb puahhnawh an tong, ralhrang 5 an thi hliamhma tuar zong an um. Taningtari ramthen Thawai (ထားဝယ်) peng Maykhandi(မြေးခန္တီး) khua pawngah November 3, zinglei ah ralhrang phu hna cu bomb puahhnawh in doh an tong tiah khuami nih an chim.

Ralhrang phu hna cu Yephyu(ရေဖြူ) peng Titkado(သစ်ကတိုး) khua in Maykhandi (မြေးခန္တီး) khua lei an kal lioah bomb puahhnawh in doh an ton hi a si. Bomb puahhnawh in doh an ton caah bomb ralhrang phu lei in minung 5 an thi, 2 nih hliam an tuar tiah khuami nih an chim.

Ralhrang phu hna cu khuachung PDF phu nih bomb puahhnawh in an dah hna hnu ah kaphnih kar kahdohnak a chuak tiah theih a si. Bomb puahhnawh in doh a tong mi ralhrang phu hna cu November 2, in Yephyu (ရေဖြူ) peng Titkado (သစ်ကတိုး) khua ah umhmun khuarmi an si i ralhrang minung thazaang 100 hrawng an si tiah khuami nih an chim.

Mipi Vengtu Ralkap Le Ralhrang Phu Kar Fakngai In Kahdohnak A Chuak, Ralhrang 20 An Thi. Shan ramkulh le Kaya ramkulh ramri Phekhung (ဖယ်ခုံ) peng Khawngih(ခေါင်းအိ) khua le Satdaw(စက်တော်) khua pawng hrawngah nihin November 4, ah ralhrang phu le mipi vengtu ralkap kar kahdohnak a chuah caah ralhrang phu lei in a tlawmbik minung 20 hrawng cu an thi tiah Loikaw-PDF nih a langhter.

Kahdohnak chung ah aa telmi, mipi vengtu ralkap phukomh hna cu Loikaw-PDF, Phekhung-PDF, KA, Demawhsu-PDF, Mubae-PDF,(အလယ်ပိုင်းတိုင်း- PDF), KGZ le KNDF phu hna an si. Cu kahdohnak ah (အလယ်ပိုင်းတိုင်း -PDF) in minung pakhat nih hliamhma a tuar tiah Loikaw-PDF nih an langhter.

Ralhrang phu lei nih hriamngan faktuk in an hman leng ah khuachung mipi inn meikhangh in an hrawh, thilri an hrawh leng ah an fir, facang cinnak hmun hna cu pehtlai in an hrawh tiah Loikaw-PDF nih cathanh chuahmi ah an langhter.

Ralhrang Phu Nih (ပ.က.ဖ) Chungtel Minung 3 An Tlaih Hna,Tlaihmi Chungah Minung 2 Thah An Tong. Ralhrang phu hna nih nizaan November 3, kahdohnak chungah Kalay mipi vengtu ralkap phu chung in minung 3 cu tlaih in an kalpi hna tiah theih a si.

Hramhram nawlngeihnak la tu ralhrang phu hna nih tlaih in an kalpi mi hna mipi vengtu ralkap minung 3 chungah minung 2 cu Chawngkhuah(ချောင်းခွ) khua sianginn pawngah an kah hna caah an nunnak a liam tiah Kalay mipi vengtu ralkap phu nih cathanh an chuah.

Cun nizaan zaan suimilam 7:00 hrawngah ralhrang phu hna nih Hakhalay khua in sualnak ngeilo mipi minung 2 cu tlaih in an kalpi hna, a tutiang ah ralhrang phu hna cu Natchawng(နတ်ချောင်း) khuachung ah umhmun khuar in,khuachung ah an duhpoh in thilri an hrawh tiah an cathanh chungah an langhter.

Kachin ramkulh chung sianginn ah siangngakchia 3000 leng sianginn an kai. November 1, ni thok in Kachin ramkulh chung ah sianginn on a si i, siangngakchia minung 3000 leng nih sianginn an kai tiah theih a si. Kachin ramkulh ah peng kulh 12 in sianginn a kaimi siangngakchia hna cu minung 3000 leng an si ti tiah ramkulh fimcawnnak zung in min langhter lo mi pakhat nih a chim.

“October 28,ni Ministry of Education cathanh chuah ning ah Kachin ramkulh in pengkulh 12 chung sianginn ah Covid runvennak he a tlak ning in on ding ah nawlchuah a um i, November 2 tiangah sianginn kai ding a ap mi 3000 leng a si” tiah a chim. Ministry of Education nih cathanh a chuahning ah sianginn on ding hna cu phungki sianginn le private sianginn hna zong on ding ah telhchih an si na in tamdeuh nih cun sianginn an on rih lo tiah theih a si.

Kachin ramkulh chungah 2021-2022 cacawn kum chung sianginn kai ding ah min aa pe mi siangngakchia minung ting 1 leng an si, Chiphway(ချီဖွေ), Muhngin(မိုးညှင်း), Mukawng(မိုးကောင်း), Bamaw(ဗန်းမော်), Putaoo (ပူတာအို), Nawngmon (နောင်မွန်) peng hna ah cun Covid zawtnak a umrih caah sianginn an khar rih i, a dang pengkulh 12 ah cun sianginn hon a si cang ko na in minung 3000 tluk lawng an kai tiah theih a si. Credit: The Chin Post