Update News; Rihkhawdar kahdohnak thawngpang fiang!!

SAC Ralkap Nih Bomb An I Lamh Caah Hriamngan Le Hriamhme He Duh Paoh In An Kah
=========================
Chin ramkulh, Falam peng Rihkhawdar No.2 sang tlangpar ah umhmun a khuarmi SAC ralkap pawl cu, khua chungah riahcaw lak dingin an kal lioah MEDF nih bomb an hmanhmi an i lamh caah a puak, tiah theih a si. Nihhin October 26 zing sml 8:30 in bomb puah thawh thawng a thang i, sml pakhat a rauh ah bomb 5 a puak cang i meithal thawng zong a thang, tiah tualchung mi hna nih an chim.

Tualchung mi pakhat nih, “Uico ralkap nih RPG, seh meithal le sniper in an kah thawng kan theih. Kaphnih in an i kah thawng cu a si lo. Uico ralkap aa hliammi an um caah a si lai,” tiah a chim. Rihkhawdar No.2 sang tlangpar um SAC ralkap pawl cu No.1 sang um SAC ralkap he khua chungah riahcaw lak dingin an kal lioah bomb an i lamh hi a si, tualchung mi cu a thimi le aa hliammi an um lo, tiah theih a si.

Rihkhawdar Pawng Ah SAC Ralkap Bomb Puahhnawh An Tong, 5 An Thi, India-Myanmar ramri Chin ramkulh, Falam peng Rihkhawdar khua pawng ah SAC ralkap hna cu bomb puahhnawh in doh an ton caah SAC ralkap 5 an thi, hliamhma tuar an tam tiah Mountain Eagle Defence Force (MEDF) hna sin in theih a si.

October 26, zinglei suimilam 8:30 ah Rihkhawdar no.2 sang tlangcung ah umhmun khuarmi SAC ralkap hna cu khuachung ah eiding riahcaw an lak i an kir lei ah bomb puahhnawh in doh an ton hi a si tiah theih a si. “Padeta bomb kan hmanhmi cu a hlatnak hmun in kan puahhnawh hna, a thimi SAC ralkap ruak cu an pawngkam ah an hmuhmi bawm ah khumh in mei an khangh hna” tiah MEDF in ṭuanvo ngeitu pakhat nih a chim.

SAC ralkap bomb puahhnawh in kahdoh an ton hnu ah, meithal tamtuk an thlah na in tualchung hriamtlai phu lei hliamhma tuarnak umlo in hnu an tolh kho tiah theih a si. Rihkhawdar cu Myanmar-India ramri ah a ummi a si i, India, Mizoram ramkulh le Myanmar Chin ramkulh kar ramri ah a ummi khua a si. Crd-The Chin Post

Monywa-Ayartaw Lampi Ah SAC Ralkap Motor Bomb Puahhnawh An Tong I, Ralkap 3 An Thi, Sagaing ramṭhen, Monywa-Ayartaw motor lampi cungah SAC ralkap phurtu thir in khammi motor pakhat cu, PDF nih nizan October 25 zinglei ah bomb in an puahhnawh caah SAC ralkap 3 an thi, tiah theih a si.

Monywa in a chuakmi SAC ralkap motor cu Black Dragon Special Task Force nih bomb lung 6 in an puahhnawh caah ralkap 3 an thi, hliamhma pumi zong an um. Bomb puahhnawh nak tlamtling tein an lim hnu ah hnu an tolh kho, a thimi le aa hliammi um lo tiah theih a si.

Kum 50 Leng Tak Aa Kholh Ti Lomi Kum 94 Tarpa A Nunnak A Liam, Kum 50 leng tak aa kholh ti lomi vawlei cungah a caak bik le a thurhnawm bikmi kum 94 tarpa cu nizan October 25 ah a nunnak a liam cang, tiah theih a si. Iran rammi Amuharji cu ka tak kai kholh cun ka zaw lai a ti i, tak kholh loin kum 50 leng a um cangmi a si.

Iran thlanglei Phas ramkulh ah khua a sa mi Harji cu khuami nih tak kholh ding in an lem lengmang ko nain a cohlang duh lo. A luancia thla tu ah khan tak kholh ding in an lem lengmang caah a rak cohlan hna. Kum 50 leng tak aa kholh ti lo hnuah a voikhatnak tak aa kholh i, a zawt beh caah a luancia zarh ahkhan Harji cu a nunnak a liam, tiah theih a si.

Kum 2014 lioah Tehran Times nih Harji cu biahalnak an rak tuah i, saram a raangmi sa ka duh tiah a rak leh hna. Harji cu vawlei khur pakhat ah tlakrawh in a rual i cu chungah khua a sami a si. A ruang cu midang nih hnahnawhnak an ka pek sual lai ti a phan caah amah lawng in a um hi a si.

Kum 50 leng tak aa kholh ti lomi Harji cu a takvun ah a chah pipi in an bo i an kak dih cang. A ei dinmi zong a hnawmmi lawngte a si. Khuami hna nih Harji cu tak kholh ding le a thianghlim mi tirawl pek ding in an i timh paoh ah a thin a hung i, a lung a rawk tawn. Cu hnuah khuami nih amah duh ning tein an chiah, tiah theih a si.

Cyclone Thlichia A Hran Ruangah Bangladesh Rammi 16 An Nunnak A Liam, Sing 5 Hrawng An Zam, Bangladesh ram ah Cyclone thlichia a hran caah rammi 16 nak tlawm lo an nunnak a liam i, sing 5 hrawng a himnak hmun ah kan ṭhialkam hna, tiah ṭuanvo ngeitu pakhat nih a chim.

Rili kam ummi pengkomh 15 chungin rammi sing 10 leng cu electric mei a rawh ruangah sianginn an khar, tiah theih a si. Cyclone thlichia a hran lengmang nak a ruang hi khua caan aa thlen ruangah Pacific rili ah atu le atu Cyclone thlichia a hrannak hi a si, tiah Seintist hna nih cun an langhter. “Cyclone thlichia cu nizan October 25 ah Bangladesh ram a phan i, rammi sing 5 hrawng cu a himnak ah kan ṭhialkam cang hna,” tiah an thanh.

Bangladesh ram chaklei Jamuna tiva ah tilawng pakhat a pil i minung 2 an nunnak a liam. Thingkung cungin minung 14 an tla i an nunnak a liam, an dihlak 16 an nunnak a liam, tiah Bangladesh cozah nawlngeitu Jibon Naha nih a chim.

Bangladesh rammi sing 5 hrawng a himnak hmun ah cozah nawlngeitu hna nih ṭhialkamnak an tuah hna nain, Myanmar ram in a zammi Rohingyia 33,000 leng cu an umnak ralzam camp ah an chiah ko hna, tiah theih a si.

Wetlet Ah PDF Ralkap 2 Cu Bomb Nih A Puahhnawh Hna Caah An Nunnak A Liam, Sagaing ramṭhen, Wetlet peng ah PDF ralkap 2 cu bomb an sersiam lioah a puah caah an nunnak a liam, tiah theih a si. October 24 zing sml 11:30 ah rallam a sialmi SAC ralkap va doh ding in an kal lioah bomb ihliam sualnak in BLACK WOLF – ARMY phu in ralkap Saw Kyaw Zaw Shing le ralkap Ṭi Kaung cu an nunnak a liam, tiah theih a si.

Ralkap Ṭi Kaung cu bomb a puah hnu October 24 zing sml 11:30 ah a nunnak a liam i, Saw Kyaw Zaw Shing cu a hliamhma he zan sml 7:00 ah a nunnak a liam ve, tiah BLACK WOLF – ARMY nih an langhter. Crd-The Chin Post