Hakha Le Thantlang Kar Kahdohnak Ah SAC Ralhrang 30 Leng An Thi; 30 Tluk Hliam An Tuar
===========
Thantlang peng chung humhak ding le thazaang chap dingin aa tim mi SAC ralhrang hna cu Hakha le Thantlang kar ah Chin ralkap tangti phu hna nih lan kho lo in an kham lio hna a si. May tla dih lai in tuni tiang Hakha le Thantlang kar kahdohnak ah SAC ralhrang 30 leng an thi i 30 tluk hliam an tuar tiah CNA chimphuannak nawlngei tu Salai Htet Ni nih a chim.
“May 29 in a tuni tiang kahdohnak chungah mipi ralkap CNA le CDF chungin minung 17 an nunnak a liam cang, minung 10 leng hliam an tuar. Ralhrang lei zong a thi mi le hliam tuar an tam ve.
Kan theih tawk ah ralhrang lei hliamtuar 30 hna cu siizung an phan, A thi mi zong 30 leng an si tiin kan theih. A si nain nikhua chiat tuk caah biafiang tak kan hngal thlu rih lo, a thi mi hi 30 leng cu an si lai tiin kan ruah ko” tiah Salai Htet Ni nih a chim.
“Hakha in a chuak mi SAC ralhrang rallam sial mi phu hnih ah a rak i then mi hna cu a tuah cun phukhat ah i fonh in an cawlcangh lio a si. A tu lio cu nikhua a chiat pin ah ralhrang hna zong hnu pil kho lo, hmai fong kho lo in an um lio a si. A si nain ral timi cu zeitik caan paoh ah ready tein kan um a herh ko” tiah a cunglei upa nih a chimchap. Crdd; Lungmili Post