Update, CNA Le CDF Hualngoram nih ZRA camp an phomh nak kong!

CNA Le DF-Hualngoram Le ZRA Kar Kahdohnak A Chuak!
========================
Nihin March 30, zing suimilam 11:30 hrawng ah Tedim peng Mualhlum khua ZRA Elisa camp cu CNA le CDF-Hualngoram nih an va kah tiah theih a si. ZRA nih kan kah dingmi hi thawng an rak theih ciami a lo timhcia tein a rak kan bawh kaphnih kar kahdohnak a fah cuahmah lio pi a si.

An Sakhan zeimawzat zong kan khangh khawh ZRA lei in a thimi le a hliammi zat cu fiang in theih a si rih lo, tiah tuanvo ngeitu pakhat nih The Chin Post ah a chim. Tutiang kaphnih kar kahdohnak ah Chin ralkap lei in thimi le hliamtuar an um lo. Cu kong he pehtlai in “Khai Tawng” timi Facebook acc a hmang mi pa nih CNA lei in minung 2 an nunnak a liam, tiah a tial. Thawngpang dik di hram hlahseh. Bawipa nih kilveng ko hna sehlaw.

CDF-Matupi nih, Matupi-Paletwa lam ah SAC ralkap a dohtu CDF-Matupi ralkap hna ca ah eidin tirawl an chambau caah mizapi sin ah bawmhhalnak an tuah, tiah theih a si. March ni 20 thawk in Matupi-Paletwa lam ah SAC ralkap le CDF-Matupi kar ah nifatin ti awk in kahdohnak a chuak. Kan ralkap hna ca ah eidin tirawl le mehhang an har tuk caah mizapi nih nanmahle si khawh tawk in nan kan bawmhchanh naklai kan in nawl hna, tiah CDF-Matupi nih nihin March ni 29 ah an langhter.

Cu pin ah SAC ralkap nih thazaang tam ngai an chap caah zeitik caan paoh le khoika hmun paoh ah kahdohnak a chuak khomi a si. Atu lio hi CDF-Matupi kan har tuk lio caan a si caah mizapi nih nanmahle nan si khawhnak zawn cio in nan kan bawmhchanh naklai kan in nawl hna, tiah an langhter.

Matupi-Paletwa lampi Htaybwe sakhan kal aa timmi SAC ralkap leilawng 3 le ke in a kalmi 80 leng hna cu Chin ralkap nih March ni 20 in an rak kah hna i March ni 26 tiang pehtlai in an rak kah hna. A luancia March ni 20 in 26 tiang SAC ralkap leilawng cu Matupi-Paletwa lampi mengtung 14/16 kar ah Chin ralkap hna nih bomb voikhat an rak puahhnawh hna i, voithum tiang an rak kah hna caah SAC ralkap 13 an thi, hliamhma pumi zong an rak tam.

India-Myanmar ramri ah a thimi Pu B. Lalṭhafamkima chuahnak khua, South Lungpher Branch YLA nih cun S. Lungpher khua i a ummi ralzam hna caah phungphai thar an ser i, bianolh a um hlan cu khuadang in Lungpher khua ah ralzaam luh an kham, tiah theih a si.

S. Lungpher khuatlang hruaitu pakhat nih cun, “Kan pengtlang YLA hruaitu(Bualpui Sub-HQ) hna cathanh pehzulh in atu bantuk in ralzam hna ca ah phungphai kan ser mi hi a si. Zeitik tiang dah kan pehzulh lai ti cu chim khawh a si rih lo, kan umtu ning kan zoh lai i, a caan a za cang kan ti tik ah kan phoih ṭhan te lai,” tiah The Chin Post ah a chim.

Ralzam hna zulh ding phung an ser mi cu a tanglei bantuk hin a si. 1. Atu thawkin bianolh a um hlan cu S. Lungpher khua ah, zaan riak ding in maw thildang ruang zong ah khuadang in ralzam luh sian a si lo. 2. 125 bike hrimhrim khuadang in luhchuah sian a si lo. Khuachung i a um mi 125 bike zong chawhvah sian a si lo.

3. Khuatlang hruaitu VC le YLA theihpinak tel loin khuachung i a ummi ralzam hna cu khualtlawng le a lutchuakmi kan um ahcun a herh ning in ṭuanvo kan lak lai. Hi phungphai hi khuachung i a ummi ralzam vialte nih zulh ding in kan in theihter hna, tiah YLA S. Lungpher Branch nih cun nizan March 29 ah cathanh an chuah.

Sagaing ramṭhen, Pale peng Inmahti khua pyusawhti sakhan ah a ummi SAC ralkap le pyusawhti cu March ni 26 zing suimilam 10:00AM ah bomb in kan puahhnawh hna caah 3 an thi i, 6 hliamhma an pu, tiah Tiger PDF nih March ni 29 ah cathanh an chuah.

Pyusawhti sakhan pawngkam ah ralvengtu SAC ralkap le pyusawhti cu Inmahti khua pawng ah PDF nih kan hmanhmi bomb in a puah hna, tiah PDF hruaitu pakhat nih a chim. “Royal Eagle nih Inmahti khua in nitlak chaklei ah an hmanhmi bomb nih a puahhnawh hna caah SAC ralkap 1 le pyusawhti 2 an thi i 6 hliamhma an pu,” tiah PDF ṭuanvo ngeitu nih cun a chim.

Cu kahdohnak ah Yinmarbin pengkomh Battalion 7, Pale peng Battalion 1, Rohal Eagle Company 2, Pungtaung Tiger PDF hna i bawm in an puahhnawh hna, tiah theih a si.

Sagaing ramṭhen, Myinmu peng Sagaing-Monywa lam ah SAC ralkap leilawng cu voi li tiang bomb kan puahhnawh caah 13 an thi, tiah Dog Killers People’s Defense Force Myinmu- DKPDF in ṭuanvo ngeitu nih a chim.

Nizan March ni 29 zan suimilam 9:40PM hrawng ah Sagaing in a chuakmi SAC ralkap leilawng run 40 hrawng cu, Myinmu le Wunpih khua kar ah a voi khatnak bomb in an puahhnawh hna. Wunpih le Alakapar khua kar ah voi li tiang bomb in an puahhnawh ṭhan hna caah SAC ralkap 13 an thi, tiah theih a si.

“SAC ralkap pawl cu Sagaing in an chuak i lamthluan kip ah meithal an puah. Bomb in kan puahhnawh hna i a thimi hna cu leilawng chung ah an chiah hna,” tiah Dog Killers People’s Defense Force Myinmu- DK PDF in ṭuanvo ngeitu nih cun a chim.

Cu kahdohnak ah People’s Army To Fight Dictatorship (PAFD) Company DK PDF-MMU, People’s Knight Defense Force Myinmu(PKDF MMU) le (D.B.B.F-MMU) ṭangṭi phu hna i bawm in an kah hna. Ṭangṭi phu lei in a thimi le aa hliammi an um lo, tiah theih a si. Crd-The Chin Post