Upat lo awk a ttha lomi Thantlang mipi hna Intuar Khawhnak!
Upat lo awk a ttha lomi Thantlang mipi hna Intuar Khawhnak
========
FB chung in Chin ramkulh khuapi dang pawl dai ngai in an ummi hmuh caan ah chikhat khi cu ka khuaruah a khal hnik tawn.
Kumpi kum 15 nak tam chuahtaak cang mi a si bu ah ‘ka khua’ van ti ding ah airolh tu a um kho rih lomi khua ngai ral mei i a ciamh dih i phundang tein Chin miphun lakah nunphung le sining a hring a cawm vemi sining pawl an ciamh dih ve lai ruah zong ah ui a um hringhran.
Tutan thilcang kong ah online ah hmuhning phunphun a leng. Khuami an ral a chia, khua upa an i palh, CDF pawl khuakhan an thiam lo tiah a phunphun in sualphawtnak a chuak. “Ka ti ttheu lo maw” a ti zong kan tam. Nain a mak tuk i ka ruahmi cu Thantlang mipi hna nih a iintuar an thiam tukmi hi a si. CDF sual an phawt hna caan ah a dirkamhtu, khua upa an mawchiat hna caan ah a aupi tu, sunghzatlak mi kong i sual an i phawt caan i mi a hnemtu lila zong Thantlang khuami, ralzaam dirhmun in a vakvai cuahmah mi hna lila an si mi ka hmuh ah ka khuaruah tu a har tawn.
Ngaihchiatnak lakah a ttha tiah ka ruah mi lak ah pahnih cu; Thantlang atu bantuk a cannak thawng in Mindat unau hna nih kanmah lawng Kan si lo ti tuan ah a fianter hna. Thantlang hi ti a sinak thawng in Camp Victoria a him deuh i caan rau a kal rih dingmi dohthlennak caah hnangam deuh in timhlamhnak a ngeihter hna.
A langpar in miphun ka dawt caah ti phun in ai chimter ttung i inn le lo a uinak, hriamtlai hna le mipi kar thilcang heh tiah a soisel tawn tu, boruak cuanh a hau tiphun in a au tawnmi a cheukhat bang khin Thantlang mi hi hei au ve hna seh law zeitluk in dek kan dohthlennak hi a hei hnursuan hnga? A herh tiah a pom kho i miphun le ram caah a si ko tiin a hmur a cip i kam seh in a ing i mah si khawh chung in hmainawr ai tim pengmi Thantlang khuami hna sining hi ruah ah upat lo awk an ttha lo.
Hei ti ko ahcun Thantlang mipi nih tutan dohthlennak kong i an hmuhning, a har iin an i timhning le lungdongh lo an i timh bantuk in peng dihlak in i tim hna seh law atu nakin dohthlennak a thazaang hi a tthawng deuh tuk hnga. Credit: Mang Hram Kung
