UN Security Council Meeting Pi Cu Tuluk Nih Veto Power A Hman Ruangah Kan Sung Hoi Cang

UN Securty Council nih Ralkap pawl cu fakpi in dantat nak pek dingin timhtuahnak an ngeihmi cu China Ambassador Zhang Jun nih a cohlang lo caah veto power a hmang. Kawlram thil sining kong he pehtlaih in March 31, 2021 ni ah an tuahmi humhim nak lei riantuantu UN Security Council nih a biapi tukmi meeting ah Kawlram ralkap pawl cu dantat dingin an ti mi cu Tuluk ni an cohlang lo, tiah thawng theih a si.

Kawlram democracy aa thlennak ding caah le hmailei mipi nih daihnak hmuh khawhnak ding caah, rian fakpi in kan tuah lai tiah kan i ruahchan tiin Tuluk ram aiawktu Zhang Jun nih a chim. Kawlram kong cu Tuluk nih naihniam tein kan zoh peng ko. Kawlram ralkap pawl hremnak nan tuah dingmi hi ralkap nakin mipi tu an fak deuh lai. Cun, mipi caah chawlehthah zong fahpi in a rawk lai caah hihi cu Tuluk cozah nih kan cohlang kho lo tiah Zhang Jun nih a chim fawi.

Kawlram chung a dirmun cu, Tuluk pawl an thin a phan ngaingai ko. Ralkap ralhrang phu nih mipi thisen tamtuk an luangter tikah UN Security Council zong a thin a phang tuk cang. Cucaah, tutan meeting an tuahmi zong hi Kawlram mipi caah thathnemnak tampi a chuakpi lai tiah ruahchannak ngeih cio a rak si. UN Security Council nih ralkap pawl cu dantat nak an pek taktak ahcun ralkap nakin mipi pawl nih an tuar ing deuh lai tiah Zhang Jun nih a chim chih.

Vawleicung ramkip nih Kawlram chung ralkap nih uknak hramhram in an lak nak kongah UN Security Council nih dantat nak a phunphun tuah loin ton biruahnak lei in a kalpi ahcun a tha ko lai tiah China Ambassador Zhang Jun nih a chim. Kawlram chungah ralkap nih uknak an lak hnu mipi sandahpiahtu hna cungah ningcang loin thil an tuahmi ruangah vawleicung ramkip lungretheih ngai in an um cio hna. British Cozah nih Kawlram kong ceihkhan dingin an hal bantuk in UN Security Council innkaa kharkhumh in meeting an tuahmi cu March 31, 2021 ni ah an tuah hi a si. Source: VOA