Ukraine cu zun 17,000 renglo an pek cang i tuhi an pek nawlh cuahmah!

Ukraine cu zun 17,000 renglo an pek cang i tuhi an pek nawlh cuahmah!
===========
Vawleicung raltuknak tank kahnak i a tha bikmi ngeitu ram, US, UK, France, Germany le Sweden nih Ukraine cu zun 17,000 renglo an pek cang i tuhi an pek nawlh cuahmah. Liangcung khinhmi lak a tha bikmi vanlawng kahnak zong zun 2,000 renglo an pek cang fawn i tuhi an pek nawlh cuahmah. Hihi Russia tank le motor nih an celhlo bikmi cu asi.

Anmah Ukraine nih tampi an rak ngeih ve cio RPG he le bang cun, asinain Russia vanlawng tha bikbik pawl SU-57 pawl khi cu an kap kho lo Patriot-105 US siam Km 100 kap kho tel cu an i ngeih a herh. Helicopter tu cu ai tha lo, vanlawng tampi cu a kah khawh i SU-57 zong niam tein le ai relh lo ahcun a kah khawh thiam ko. Hi pawl hi zeitluk in an that timi cu kan pehthan te lai!

Russia vanlawng kahnak Buk missile system Ukraine ralkap pawl nih an kah piak lio hna video asi. Hi vanlawng kahnak hi km 50 tluk hlat a kap kho i US vanlawng F-15 le F-16 a kah khawh tiah Russia nih cun an rak timi asi. 2014 lio i Malaysia Airlines Flight 17 Ukraine tapung pawl nih an rak kahnak kha asi.

Russia nih Ukraine bawmh dingin vawleicung bawmhnak ka halmi minung 16, 000 renglo nih bawmh dingin an um cang a ti ve ko hi. Lih le hrokhrawl a tawka a liah ter mi Syria president pa nih hranhram loin a rak bawmh mi kha asi ko lai cun. International ah Ukraine nawl i cawn in a hmai milh ai tim, ahohmanh nih an zum dom lai.

Kan ram thlennak ding caah kan inn le lo, kan ngeihchiah le nunnak tiang nih a tuar ve a herh. Misual Russia thlennak ding ah le Ukraine tuarnak kan bawmh khawh ve nak ding ahcun datsi cu zeizah paoh va kai ko seh a cohlan kan thiam awk asi ko.

Dua le Pathian nih kannih cu a tap le a hram cuahmah mi hna lakah himnak, nunnak le tuan khawhnak caantha a kan pekmi hi vuihram hna hlah usih. Taktak ngaingai lo ahcun midang harnak khi dawh kan chawn ve hna asi cuh, caan saupi, a kum a rau lai lo a tha than te ko lai.

1. Ukraine Hi Ralhrang Bawmtu Arak Si Bal Caah Ceiseh Kan Ti Awk Asi Maw? 2. Ukraine Buainak Laimi Kan I San Lo Maw? 3. Putin Lei Dirhmun In Cun A Mawh Ve Lo Nan Ti Maw? Ukraine Hi Ralhrang Bawmtu Arak Si Bal Caah Ceiseh Kan Ti Awk Asi Maw?

Naihrawng cu Laimi tampi kan pale telh in Russia nih Ukraine a tuk hi cei pah ko seh zeicatiah Myanmar ralhrang pei hriamnam a bawmh cu a timi kan tampi. Hihi a palh taktak mi khuaruahnak asi tiah ka ruah. Ukraine cu European ah a sifak bikmi le corruption tambiknak asi, cozah duhning in zeithil hmanh hi a kal kho tuk lo ti usihlaw kan palh lai lo.

Ukraine cozah bawi ngan pipi khi Russia minung an rak tamtuk thilsual le thil poi an tuah zongah an duhning in rian an tuan kho lo anmah le mah ai that viar ding phun khi an si. Nan vun fian khawhnak ding ahcun February 28 lio i Ukraine nih an i bochan taktak mi Russia he remhdaihnak caah an thlahmi delegation Denis Kireev cu Russia spy a rak si diam ko khah! Ukraine nih an thah colh ve.

Ukraine nih NATO luh a duhnak bik pakhat cu kha bantuk an ramchung i Russia misa thianhlim kha asi cuh. NATO ah a luh ahcun NATO nih hriamnam cawk le zuar kongah phunglam thatein an ngeih caah ralhrang cu hriamnam a bawm ti lo hrimhrim. Cucaah Kawl ralhrang hriamnam in a rak bawmtu asi caah ceiseh ti nak in NATO ah lut lawlaw sehlaw Myanmar ca zongah a thahnem mi asi ve cang lai kha kan ruahpi awk asi deuh rua ka ti.

Ukraine Buainak Laimi Kan I San Lo Maw? Laimi tampi nih Ukraine kong hi ruah le chim a herh lo kanmah kong hmanh kan chim khawhlo lio ah kan ti, a hmantukmi a lo nain a palh cikcek mi asi rua tiah ka ruah. Ukraine ral ruangah vawleicung pumpi ti tluk nih datsi kongah cawp le cilh in harnak kan tong colh. Company tamtuk nih Ukraine le Russia ah hram an bunhmi an phih dih i harnak tampi ton colh asi. WWII hnu in WWIII a vun naih bik caan kan phan i hi thil nihin caan donghnak a phakter kho tu dirhmun hman a phan kho dengmi thil asi caah ruah a phu, chim a tlak, i celh len a herh mi thil asi ko tiah ka ruah.

Cun Laimi a tam deuh hi thil kan theihlo tuk i thil kan theih tam deuhnak caah hi kong hi media le catialtu nih cun dongcat loin nan/kan tial awk asi ko. Amah belte kan ram kong chim le phuan belte hi cu philh hna hlah usih, kan rak hi a pakhatnak ahcun chia cio hna usih.

Putin Lei Dirhmun In Cun A Mawh Ve Lo Nan Ti Maw? Laimi catialtu le media tampi nih Russia nih Ukraine a tuk hi 100%100 in a palh ko nain amah lei dirhmun in cun a mawh ve lo, a timi ka hmuh len hna. Hihi a dik ngaimi a lo nain a palh taktakmi ruahnak asi tiah ka ruah. Crimea hi autonomous pe ti cu a palh tuk hnga lo, Asinain Ukraine ram I a biapi tukmi Luhansk le Donetsk hi independence pe ti cu asi kho ti lo.

Hi region hi Russian an tam caah ram dangah na chiah lai ti cu a ho fa dah duh lai? Cucu ai za rih lo i na Constitution kha na remh than lai i zeitik hmanh ah NATO ah na lut lai lo a ti rihmi cu zei he dah kan tahchun lai ti ahcun: Laipa pakhat hi zuu a rit paoh hin an nu vuak dingin an nu sualnak a kawl zungzal. Voikhat cu zuurit buin a hung lawi i an nu sualnak a hmuh ti lo caah hi tihin a ti “voi thum ka rel lai I kuak na zual manh lo ahcun ceilak in kan vuak lai” a ti i zeitihmanh in a zual manh lo caah cei cikcek tein a vuak!

Russia zong nihhin asi kho lomi ka hal lai i a dih lai lo i ka tuk te lai ti khi ai timhmi cu asi bik ko. Nangmah le keimah hmanh hi Ukraine president si ve usihlaw Russia kan tihtuk bu ko zongah cucu asi kho lomi khi asi cu mu. Cucaah Russia Ukraine a tuk hi mi lei he amah lei he zakhat ah zahnih in a palh I misual khuachia bantuk asi. Riantuan ceicer ka si caah tlamtling tein tial caan ka ngei lo caah ka ruat thiam ko ne u. Credit: Chelsea Bawi