Ukraine cozah zong kan leiah a rak ttang ve lem lo!

Salai Ceu Bik Thawng: Ukraine cozah zong kan leiah a rak ttang ve lem lo
=========
Russia nih a hun thuat hna caah Ukraine president le a mipi cu kan zangfak hna i kan dirpi cio hna. An faiceukulh ah teinak hmu hna seh tiah thla kan campiak cio hna.

Asinain tuanbia cu philh tuan ding si hnga lo. Kan ram mipi a that-nawngtu MAH Kawl Ralkap kha nikum 2021 May thla tiang hriam a bawmh hna. August thla tiangah khan ngol an itim lo. Chim ko ahcun Barma ram kongah thloh khawh lomi, chimh ngailo, thlachiat ruatlo timi ram cazin; Tuluk, Russia, Serbia le India a hun changtu Bularus le Pakistan hna cazin pakhat ah chiahmi an si.

(UN Special Rapporteur Tom Andrews report Feb 22th -2022) Ukraine va huat ding ti duhnak si lem lo. Asinain ahocio hi anmah le an ram le an miphun ca cio kha an rak ruat ko hna. Cucaah Laimi/Chinmi kannih zong kanmah dothlennak hi biapi ah chia ko hna usih, tuaktan ko hna usih, tibia.

Russia Parachute (လေထီး) ralkap hna nih Ukraine ramchung khuapi bik changtu Kharkhiv khuapi ah March (2) ah an tum ruangah Ukraine ralkap he fak taktakin kahdohnak a chuak tiah Ukraine ralkap nih an chim.

Russia vanlawng ralkap hna cu Kharkhiv khuapi ah an tum hnuin sizung pakhat cu an kah i, Ukraine ralkap he pehzulh in an i kap tiah Ukraine ralkap nih cathanh an chuah hi a si. Minung an tamnak hmunah Russia ralkap nih kahdohnak hi fak tukin an tuahmi hi timhcia tein an tuahmi a si tiah Ukraine President nih a chim.

Hi kong he pehtlai in ahohmanh ngaih thiam ding a si lo bangin ahohmanh philh khawh ding zong a si lo tiah Kharkhiv khuapi cu dung gyi hmangin vawi tamtuk an kah hnu in Ukraine President nih a chim. Kharkhiv khuapi cu March (1) ah Russia nih an kah chungah minung 10 nak tam an thih pinah minung 35 nak tam nih hliam an tuar tiah Ukraine ramchung runvennak zung nih cathanh an chuah.

Meng 40 tlukin a saumi Russia ralkap hna nih Kharkhiv khuapi ah kahdohnak tuah dingin an kal caah Ukraine mipi a thong thongin himnak hmunah an zaam.

Russia le Ukraine palai cu tu chun kha avoi hnihnak an i tong. Kan i kap rih ko lai ti hnatlaknak an nei kho. Asinain mipi (civil) hrial ding le an ikahnak khua(hmun) in kadang an i tthial karlak tibantuk caan paoh ah kah i ngol ding Ukraine lei halmi cu Russia lei nih an cohlan piak. Cu a si bu ah Ukraine palai nih an beisei ning a si lo, le kan i tong tthan lai tiah lungtlinnak an nei. Kap hnih palai an i ton kar ah French president nih Putin a chawnh le ngol cang ko, tiah a lungthlen ai zuam nain Putin nih kan hmuitin tlamtling lakin kan nor ko lai tiah a rak leh.

Ukraine president nih Putin he i chawnh le i ton ka duh ko tiah a hauh peng ve. Kan i chawnh lawng ah ral a dai/ dih lai tiah a chim. Zeibantuk thil indah Putin a lung thlenter ai zuam hnga, Putin he chawnh lawng ah ral a daih lai cu? Kan thei lo. Asinain Putin nih zei lehnak hmanh a tuah rih lo.

USA nih Minute Man III-rocket hneksak a timhmi cu Russia he theihthiam lonak a chuak sual lai tiah an leet. Cucu a tha ngaimi a si. Tu chun ah Pentagon nih Moscow he fawite chawnh khawhnak Direct Line a ser colh fawn. Ralkap cawlcanghnak le thil sining i ruahpalh sual lo nakding ah ti a si. Ukraine ralzam le mipi bawmhnak caah US$ 1.5 billion an hmuh manh cang. Cu pinah ram tam ngai nih ralzam lak ding timhtuahnak an ngei hna. Norway nih 1000 hrawng lak ding in a ruah i dawng linga cu an lak manh cang hna.

Russia mirum pawl vawleipi nih a phih dih ngawt cang caah an sung tuk, cheukhat cu zarh khat chung ah dollar billion tam pipi an sung. Cucaah a rannak in hi raltuknak cu ngol awk a si tiah an president an nawl cang (cu hlan an holh lo.). Mah mirum a tamdeuh cu Putin he naihniam an si hna. Zinan le Gas mirum deuh an si i chaw an leh khawh nakding ah Putin pumpak zal ah phaisa a senhtu an si ngawt an ti.

Putin nih India tawsawh in a van i la le Ukraine ah India siangngakchia pawl an tlaih hna le an hrem hna lawng si loin i khamnak ah an hman hna a van ti. Tlawmpal ah India ramdang minister nih thawngpang kan theihmi um lo, tiah a chim pinah Ukraine cozah he i bawm in kan rammi an kir len ko cang tiah a chim. Putin nih cun Ukraine ahhin Middle East in a rami hriamtlai tam ngai an um cang tiah a chim fawn. Cucu a si lai tiah an zumh caah nitlak ram pawl nih luh lo ding in ralrin a pek phot.

NATO nih a ralkap 20000 cu Russia innpa Nato ram pawl ah a kuat chap, American ralkap lawng 12000 an si. Asinain Russia nan kap hrimhrim hna la lo tiah nawl an pek hna. An rian cu Russia he i kah lo a si. A sullam cu Russia innpa Nato ram pawl dirkamh i Russia Russia he raltuk hrial ding si ko. Cucu Nato an website ah rel khawh si.
ICC ah Russia tazacuai ding in ram 30+ nih min an thut cang.

Ka ruahnak tam ka chim rih lo. Nai ah Ukraine ralkap nih Tank an mawngh thiam colh lai lo caah EU nih an pe hna lo ka timi kha a dikmi si, Tank an ser tharmi pawl hi siifak Ukraine nih an nei rih hna lo, a hlun pipi cu an nei sawk. Vanlawng hmanh an neihmi phun lawng an pek hna. Ca nan rel tikah nan relmi kong(ram/minung) Background tlawmpal nan theih ve lo cun hlan bantuk in fianh len ka huam lo. Credit: Salai Ceu Bik Thawng, Hlawnching Bawimang Lian