Ram mi hna hram hram in ralkap chung ah a luh ter tu SAC nih a voi khat nak Military Service Law training cu nihin April 8,Zinglei ah a thok cang tiah theih a si.
SAC ralhraang nih hin rampi huap in Military Service Law cu a luancia February 10 ah khan a rak thanh i kawl titawih puai a dih in ralkap tla ding min cazin laak hram thok a si lai tiah a rak thanh nain a tak ah cun kawl titawih puai phaak hlan ah training a thok hi a si.
Kawlram Aa-Na-Shin hlun Than Shwe order in 2010 ah rak ser mi kum a tling cang mi ram mi poah poah ralkap tlak ding timi upadi cu Min Aung Hlaing tlaih mi ralhraang phu nih 2024 February 10 ah an nunter hi a si.
Cu upadi ning ah ram mi chung in Pa kum 18-35 kar,Nu 18-27 kar cu ralkap tlaak viar ding ti a si. Hi hna chung in Sibawi,Engineer le kutzung thiam le fim thiam nak a ngei mi poah poah cu Pa a si ah cun kum 18-45 kar le Nu a si ah cun kum 18-35 kar tiang ralkap tlak ding tiah aa tel.
A tu i SAC nih aa tlaih peng mi Laakhruak caan (A -Yi –Paw) caan a phaak ah cun an tuan dingmi pin ah kum 5 chap khawh a si tiah cu upadi chung ah aa tel chih.