CNA/CNF Hruaitu Nik Biakam Nak A Tuah
==========
May 9 ah CNA/CNF Hruaitu hna nih Ram le Miphun caah biakam nak a tuah tiah theih a si. Zei bantuk thil cang hmansihlaw ram le Miphun caah nunnak pek biakam in fak pi in rian tuan an nih timh. Cun a biakam nih cun zeituk in Ramle Miphun an dawt ti kha an langhter. Nihin May 9 i an biakam Cu “Kan Mah Kan Ram, pupa Ram Chin Ram Caah kan Thi tiang Rian Kan Tuan Lai. Cung Zing Nu kan Pathain Kan Um Pi Peng Ko” tiah CNA/CNF hruaitu nih ram le Miphun caah Biakam nak a tuah.
Khah Lah Yah 274 Ralkap Nih Hriamngan An Kah Ruangah Mindat Peng Khuate Ah A Tla; Mindat khua ah hram a bunhmi Khah Lah Yah 274 in SAC ralkap nih hriamngan an kah ruangah Mindat peng khuate ah a tla i a puak, tiah The Mindat Post nih a ṭial.
Nihin May 9 zinglei ah SAC ralkap nih hriamngan cu an kah i Mindat khua nitlaklei khuate ah a puak. Mindat peng ah SAC ralkap nih phone line an phih ruangah hriamngan kahnak in a rawkmi a um le um lo fiang in theih a si rih lo, tiah tualchung mi hna nih an chim.
Nyaung Tiva Ah Tilawng Aa Let I A Thimi SAC Ralkap 6 Chung in Ruak 3 Hmuh An Si; Mandalay ramṭhen, Madaya peng Muaiponekan khua nichuahlei Nyaung tiva ah May 7 zinglei suimilam 2:00 hrawngah tilawng aa let i, SAC ralkap 6 an thi. Cu chungah ralkap ruak 3 cu ti cung ah an vuan, tiah Tawgyi Muaipuai phu in ṭuanvo ngeitu nih a chim.
A thimi SAC ralkap pawl cu Kyiattoeyuai khua a khangtu an si i, May 6 ah Madaya peng ah rallam a sialmi an si. May 7 zinglei ah tilawng in tiva an tan i tilawng cu aa let, tiah theih a si.
SAC ralkap a thimi 6 lakah 3 an ruak cu ti cung ah an vuan i an rawk ngai cang. May 8 zinglei ah an ruak cu kan hmuh hna i ralbawi Brigadier 1 zong aa tel, tiah Tawgyi Muaipuai phu in ṭuanvo ngeitu nih cun a chim.
Kyiaphyu Company 1 Sakhan Ah SAC Ralkap Nih Bomb An Thlak! PDF Ralkap 3 An Nunnak Liam; Mon ramkulh, Ye peng Thanphyuzayet peng Kyiaphyu Column 2, Company 1 sakhan cu Fighter nih bomb a thlak ruangah PDF ralkap nu 1 le ralkap pa 2 an nunnak a liam, tiah Kyiaphyu Company 1 nih an langhter.
“May 7 zan suimilam 11:00 hrawngah Fighter nih pound 500 a ritmi bomb lung 2 in kan sakhan a thlak i kan ralkap 3 an nunnak a liam. SAC ralkap sinah thawng petu an um caah bomb an kan thlak hi a si. A kan liamtakmi kan ralkap 3 hna ca ah teirul kan cham lai,” tiah Kyiaphyu Company 1 in ṭuanvo ngeitu nih a chim.
SAC ralkap Fighter nih May 7 zanlei le May 8 chun suimilam 12:00 hrawngah Kyiaphyu Company 1 sakhan ah bomb an thlak caah sakhan chung ummi thilri vialte zong an rawk dih, tiah theih a si.
Kyiaphyu Company 1 cu NUG runvennak zung kuttang ah a ummi hriamtlai phu an si ve, tiah theih a si. Fighter nih bomb thlak ruangah ralkap 4 hliamhma an pu nain an nunnak ca ah phan awk a um lo, tiah theih a si.
Thonginn Chungah Tangka I Khon In PDF Sin Ah Sing 5 Bawmhnak An Pek; Myanmar ram khua pakhat thongtla mi hna nih an chungkhar hna sin in tangka an vun kuat tawn mi hna cu i khon cio in Magway ramthen mipi hriamtlai a si mi PRA-Magway sin ah sing 5 bawmhnak an pek tiah PDF upa tuanvo ngeitu pakhat nih a chim.
“Ka khuaruah a har i kam khat lei ah kalung a tha lo, a lawmh zong kan i lawm fawn. An mah sin bawmhnak an kan pek mi nih kan thazaang an kan thawn ter chinchin, hi nak in kan i zuam chinchin lai i kan lungthin zong kan thawn ter chinchin” tiah PRA-Magway Commander Ha July nih a chim.