Twitter, Google le Apple pawl nih Conservative an tuahto dan hna cu a fak taktak

Twitter, Google le Apple pawl nih Conservative an tuahto dan hna cu a fak taktak. Ralkap nih mipi cungah crackdown tuah he aa lo cang. Twitter nih President Trump account an thahpiak hnuin Twitter bantuk a simi Parler ah a lungfah pitu an i thial thluahmah hna. A rannak in Google nih Google Play in Parler app cu a hlonh colh than. Apple zong nih an store in hlonh an timh rih.

An authawng (voice) a thawng chin lengmang sual lai ti an phang. An hlonhpiaknak hna ruang an chimmi cu buainak khua le bia an chim an khaang sual lai an ti. Ralkap tha lo nih a mipi a tuk a den hna i an zamnak kip zong ah thah le nawn ding a dawimi hna he aa lo cang. An tuahto ning hna cu a fak bak cang.

Thil Thar Tete Theih A Duhmi Hna Caah; Twitter nih zungzal in Trump twitter account cu a kham cang. Million 80 leng zultu a ngei i, mipi he pehtlaihnak tha bik a ngeihnak a si. Trump leiin biachimnak a um rih lo. Facebook zong nih an kham fawn. January 20 leng tiang hrawng kham an i tim rih. Twitter bantukin an tuah men te lai tiah an zumh.

Kim Jongun nih a thli a vun thlah pah than cang. Biden nih a tlai thiam te lai maw kan zoh tuah lai. A tlaih khawh lo cun Trump cungah mawhphurhnak an khin te hoi lai. Virus kong a siah a zei poah a siah an ti khawh lomi poah cu Trump ruangah ti lengmang a si men te lai. Obama buainak le hnawmthur vialte a thianhpiak hna i, Biden le a hawile nih a ngaibok ah an ser than te ko lai.

Republican ah bochan ngaimi Lindsey Graham cu a kir lei Airport a phak ah Trump tanhtu pawl nih ‘leirawitu pa’ tiah fak piin an au hnawh. Tar nu Nancy Pelosi cu tar leisang kan ti cu a khuatuak fak cang i, Trump nih nuclear hna a puah sual lai ti a phang tuk an ti. Ralkap inn pi tiang in a chawnh hna tiah theih a si.
Trump impeachment tuah than ding aa timh cuahmah lio a si tiah theih a si fawn. Congress hi nu an tam deuh deuh; a hnok deuhdeuh.

Trump lawng si loin Republican upa zong Democrats pawl nih rial chih dih an timh cang hna. Electoral college vote a dohtu vialte chinchin cu thawl vial ding an auh hnawh len cang hna. Georgia ah Democrats nih vote fir leiah an bochan ngaimi Stacey Abraham cu Tennessee University football coach pakhat nih a soisel sual i a rian an phuah colh.

US flight union nih buainak sertu Trump tanhtu poah vanlawng citter hna lo ding tiah an kham hna. Democrats le an hawi le pawl nih buainak caan tha lak in Trump a siah Republican Upa an siah an mipi an siah a reh chih chin lengmang cang hna.

Republican lungrual lo ning cu lungrawk an si. Anmah le anmah he tiah an i seh i, an palhnak le chambaunak an venpiak duh lo. Vote rel zaan hna kha vote doh ding an tam ngai nain an i let pa dih ngawt. Let loin vote firnak kong kha an doh ding hrimhrim si. Anmah tu thinhun in an i la i Trump zong lak awktlak loin an phomh i, an biskam zong an i let dih.

Democrats cu an lungrual a rak tha tuk. Biden le a fapa sualnak zong an langhter in an chim duh lo. A ven in an ven lehlam hna. Taluk sungthoh nu he pehtlaihnak a ngeimi Democrats Congress pa zong a luat thai ko. Illhan Omar zong a luat thai ko. Tutan Republican upa pawl cu lungrawk bak an si. An mipi an deuhning hna a fak tuk. Credit: Luther Tin Hre