Twan Mrat Naing; Rakhine Tatmadaw Ralkap Aa Ti Dah Lo Cun!!!

Rakhine Ramah Rakhine Tatmadaw Ralkap Ti Dah Lo In A Dang Hraimtlai Phu Um A Herh Lo Tiah Aa Nih A Chim
===================================
Rakhine ram chungah AA ralkap ti dah lo cun a dang dohthlennak tuah hriamtlai kan herh lo tiah ULA/AA nih tuni August ni 11 thawngzamh thianhhlimnnak ah a chim. Rakhine ralkap lei in hlan deuh ah Rakhine ram Aiawh tu dohthlennak tuah hriamtlai phu cu fonh hna dingin kan i zuam ko nain a sinpi lo tiah AA in chim nawl ngeitu Khaing Thukha nih a chim.

” Rakhine ramah hriamtlai phu tampi kan herh lo. Rakhine mipi nih an cohlang mi Rakhine Tatmadaw Ralkap a um ah cun a za cang. Cu ruangah kan mah lei nih 2009 in 2015 tiang mi fonhtom dingin kan rak i zuam. A sinain a sinpi lo.” tiah a chim.

Rakhine tatmadaw a si mi ANC/AA cu ULA/AA he ifonh ding aum lo nak kong Western News nih a hal hna lio zongah AA ralkap cu kal tak in fonh ding a si i, kap hninh ceihhmai tonbiaruahnak tuah in i fonh nak lam a um lonak a ruang cu ANC/AA in Ralbawizik Min Htun nih a chim.

A tu lio ah AA nih ALP pawl tlaihkhih ti bantuk a um i, hi bantuk thil tuah hi SAC ralhrang he tangtinak lam a siam tu, Rakhine mipi hna i, humhimnak a dohmi riantuannak a si nak kong zong Khaing Thukha nih a chim.” ALP pawl kan tlaih hna timi cu, an mah lei nih SAC ralhrang he i bom in Rakhine mipi pawl humhim loin an tuah mi hna zong a um.

Paletwa lei zongah ALP nih lamhmuhsak tuin lam an hruai hna i, SAC ralhrang pawl zong an auh an kal pi hna. Cu ruangah kan mah lei nih kan tlaih hna. Zohtelnak tuah hnu ah thlah than mi zong an um.” tiah a chim. Rakhine ram ah Rakhine ram aiawhtu ralkap ALP/ ANC/AA le ULA/AA an um i, Ramkhel party lei zong in State party tampi an um.

ALP party cu 1967 April thla ah India ramri ah hunnak an rak tuah i, Thein Sein chan lio 2002 April thla ah kahdoh daihnak min a rak thu mi an si.

Relchap, Zipia Palik Sakhan In Palik Pahnih cu Myaing Pah Kah Pha Sinah Hriamnam He CDM An Tuah, Magway ramṭhen, Pauk peng Zipia palik sakhan in palik pahnih cu nizan August 10 zanlei sml 2:00 hrawng ah Myaing peng Pah Kah Pha sinah hriamnam he an lut, tiah theih a si. Palik pahnih nih BA-63(G3) zun khat, kuan bawm pahnih, BA-64(G4) zun khat, kuan bawm pali, kuan 470, kutcheh bomb lung khat le zen-kuan he CDM an tuah, tiah Myaing peng Pah Kah Pha nih an langhter.

CDM tuahmi Palik pahnih cu phaisa laksawng kyats sing 100 veve an pek hna i, a himnak hmun ah an chiah hna, tiah theih a si. CDM a tuah rih lomi SAC ralkap le palik zong mizapi sin i fonh ding le CDM tuah ding in Myaing Pah Kah Pha nih sawmnak cathanh an chuah.

Naypyidaw Vanlawng Tual Ah SAC Ralkap Pahnih Anmah Le Mah An I Kap!, Nizaan August 10 ah Naypyidaw vanlawng tual i security a latu SAC ralkap 2 cu zu an ri i, anmah le mah an i kah caah an pahnih in an thi, tiah vanlawng tual pawng a ummi pakhat nih media ah a chim.

August 10 zinglei ah SAC ralkap motor le palik motor 5 hrawng cu SAC ralkap pahnih an i kahnak hmun an phan i, checkhlatnak an tuah hnu ah Naypyidaw vanlawng tual cu SAC ralkap tam nawn nih security an lak, tiah Naypyidaw ummi pakhat nih a chim.

Kalay PDF Battalion 7 Nih Mizapi Sin Ah Bawmhhalnak An Tuah, Sagaing ramṭhen, Kalay peng thlanglei ah kahdohnak pehtlai in a chuak lengmang. Tharyarkung khua cu SAC ralkap nih an rak khangh caah inn 50 leng a rak ciam. Kalay Battalion 7 nih cun, “Kalay peng thlanglei ah kahdohnak a zual.

SAC ralkap nih innlo an khangh pin ah phone le internet line zong an phih dih. I pehtlaihnak le umkalnak a har. Cu lio ah raltuk pah a si caah a har ngai ko. Kuan le zen zong kan chambau,” tiah nihin August 11 ah an langhter.

SAC ralkap he kan i kahdohnak ah a bik in kuan le zen kan herh tuk hringhran. A caan ah cun kan kuan zen a dih caah kan hmai te ah a um komi SAC ralkap hmanh kap loin kan zoh sawhsawh hna caan a tam tuk. Cucaah kuan le zen cawknak nan kan bawmh naklai kan in nawl hna, tiah mizapi sin ah nawlnak an tuah.

August 1-10 tiang ah kyats sing 60 hrawng lawng kan hmuh rih caah AK Kuan 5000 cawknak ding ah zatuak 25(25%) lawng a si rih. Dohthlennak cu meithal i put in, hmaisuang ah ral a tu cuahmahtu ralkap lawng kan si lo. Mahle si khawhnak lam cio in mizapi nih nan kan bawmh a hau.

Uknak ṭha lo donghter ding le tei khawhnak ding ah mizapi nih faak piin nan kan bawmh a hau. Cun, a fek fuanmi dohthlennak a si khawh nakding ah cun mizapi nih kan hnulei in nan kan dirkamh zungzal a biapi tuk, tiah Kalay PDF Battalion 7 nih an langhter.

Farkawn Le Zokhawthar Um Myanmar Ralzaam Ngakchia Cu MZP Nih Text Book Le Bible An Pek Hna, India-Myanmar ramri, Mizoram ramkulh Champhai peng, Farkawn le Zokhawthar ah aa dormi Myanmar ralzaam ngakchia cu, Mizoram cacawnnak text book le Bible cauk hna cu Mizo Zirlai Pawl(MZP) nih Hualngoram Peoples Organization(HPO) Education Working Committee sin ah August 9 ah an pek, tiah theih a si.

Hualngoram Peoples Organization(HPO) Education Working Committee nih NUG lamhruainak in ralzaam ngakchia ca le kan Nuhrin holh cawn khawh nakding ah MZP sin ah bawmh an hal i, Mizoram cawnnak text book cu tang khat in tang hra tiang, subject pakhat ah uk 100 le Mother of Chin Relief Committee (MCRC) nih ngakchia ca ah an pekmi Bible cauk hna peknak an ngei, tiah theih a si.

KNU Brigade 3 Hmunram Chung Kahdohnak Ah SAC Ralbawi Pakhat Telh In SAC Ralkap 30 An Thi! KNU brigade 3 hmunram, Ngaunglaypin pengkulh, Kyaukkyi peng, Kyaukkayit khua lei ah August 7 zanlei hrawng ah khan kahdohnak a chuak i, SAC ralbawi pakhat Way Myo Aung telh in SAC ralkap 30 hrawng an thi, tiah KNLA nih an thanh.

SAC ralbawi Way Myo Aung cu Kyaukkayit kahdohnak ah a thi i, cuka hmun cu kanmah lei nih felfai tein security kan lak caah a thimi ruak le ralbawi Way Myo Aung ruak zong an la ngam lo . A thaizing August 8 zinglei ah kan umnak pawng hrawng cu hriamngan in an kah i SAC ralkap a thimi hna ruak cu vanlawng in a char hna. Ruak a chartu SAC vanlawng pakhat cu Sniper in kan kah caah Kanginkyo khua sianginn pawng ah a tum i, atu tiang a um ko rih.

Cu ruak chartu vanlawng cuangmi ralkap 3 cu an thi i, ramdang mi 2 an i tel. SAC ralkap hna cu vanlawng a dirnak pawng ah umhmun an khuar, tiah KNLA ralkap pakhat nih a chim. Kahdohnak a chuahnak hmun khua kiangkap ah a ummi, Pyetaung, Lingpyin, Kyaukkayit, Taungpu, Intainkung le Taungkyia in tualchung mi hna cu a himnak hmun ah an zaam hna, tiah KNU nih an thanh.