Twan Mrat Naing; Hihi Chin Miphun Vialte Theihter Kan Duh Hna!!

Twan Mrat Naing Ni Bia Hi Chin Mi Pawl Theihter Kan Duh Hna
=======================================
AA hruaitu Twan Mrat Naing nih,” Hi bia hi Chin mi theihter kan duh hna. Chin mi nih cun nan theih hrimhrim ding a si, SAC ralhrang Tamadaw ralkap (Min Aung Hlaing) nih Tlangcung hriamtlai phu pawl an si afah ruangah le chan ti luan an dawi khawh lo caah hriam an tliah timi bia hi ning zah theih lo bia a si.

I faksak awk taktak a si. Hriamnam ngeih lo cun kan si a fak deuh timi bia hi kan sining le kan mah pumpak nunnak in kan theih hrimhrim mi bia a si ko.Chin mi pawl nih nan theih deuh ding a si. Chin mi pawl nih kan mak nakin na theih ding hrimhrim a si. Chin mi pawl theihter kan duh hna hriamnam nan ngeih lo ruangah nan si a fak.

SAC ralhrang Min Aung Hlaing nih hriamnam a ngei mi an kan chawnh biak dan le hriamnam a ngei lomi an kan chawnh biak dan a dang, Aa khat lo. Meeiting sawmnak lio zongah CNA/F sawn an si lo, Zeiruangah an sawm hna lo thazaang nan ngei lo. Hriamnam nan ngei lo cuta. Ralkap thazaang ngeih le hriamnam ngeih ko ah cun NCA minthut zong a hau lo. Hriamnam le ralkap thazaang tampi ngei usih Nay Pyi Daw le Yangon tiang hmanh AA nih kan laak lai.

SAC ralhrang Min Aung Hliang nih hriamnam a ngei mi le ralkap thazaang a ngei mi cu nan dam lo le nan zawt caan hmanh ah a mah pumpakin a inn ah sampioh a chuang lai i an dangh hna lai. CNF sinah chim ka duh. CNF/A cu Chin miphun hna nih bochan mi le hnetchanh awkmi hrimtlai phu pakhat an si.

CNF/A hi Chin miphun vialte nih tlaihchanmi, bochan awktlak le hnetchanh mi si hna seh ti mi hi Chin miphun nih nan duh ko a si ah cun Chin mino pawl CNA/F ah luhter hna uh. Chin miphun pi nih thazaang pee hna uh. CNF/A a thawn lawngah Chin mi nih nan duh mi nan ngahco khawh lai.

Chin miphun nih nan herh caan lawng ah CNF/A cu nan tliah chan hna nan auh hna i, Nan herh lo caan ah cun sual nan phawt hna, an thang nan chiat hna. CNA/F hihi tuah uh, Kha khah tuah uh nan ti hna. Sual nan phawt hna. Nan miphun ralkap CNA/F thawngseh ti nan duh a si ah cun, Chin miphun pi nih bomhnak pee hna uh, Dirpi hna uh. Cu lawngah nan duh herh mi Chin miphun nih nan co ngah khawh lai timi hi Chin mipi vialte sinah theihter kan duh hna.” tiah a chim.

Tluangcung mi vialte laak ah Chin miphun hi a tlawmbik kan si bantuk in aa thenthek bik mi le a lungrual lo bik le kei mah thinlung a keng bikmi cu Chin miphun hi kan si lai tiah ka ruah tampi chim a hau lo. A siin AA hruaitu Twan Mrat Naing hmanh nih Chin mi hi hmunkhat ah tangti hna seh, I fonh ton kho hna seh ti an kan duh piak. Cu laak ah kan nih Chin mi cu kan Vaivuan len rih hna, Hi bia pawl hi Chin mi nih cun kan theih bak ding mi bia si.Ka nun chungah kan philh bak lo ding mi bia an si. Nang tah Twan Mrat Naing a chim mi cungah na hmuh ning zeitin a si, Comments rak pee ve.

Relchap, (Phopto dang)Chaung U Ah SAC Ralkap Pawl Cu PDF Nih Bomb An Puahhnawh Hna I, Ralkap 12 An Thi! Sagaing ramṭhen, Chaung U ah SAC ralkap hna cu Chaung U People Defense Force(CHUPDF) nih bomb an puahhnawh hna i, SAC ralkap 12 an thi, tiah nihin August 9 ah CHUPDF nih cathanh an chuah.

Nizaan August 8 ah Monywa pengkulh, Chaung U lamṭhen in a kalmi SAC ralkap hna cu, Kinmon (ကင်းမွန်) khua an phak ah CHUPDF nih voi 6 tiang bomb an puahhnawh hna pin ah meithal in an kah hna. Cu kahdohnak ah cun SAC ralkap 12 an thi i, midang 33 hliam an tuar. CHUPDF lei cu hliamtuar um loin hnu kan tolh nain kan bomb lung 16 cu SAC ralkap nih an kan lakpiak, tiah an cathanh ah cun an langhter.

Cu bantuk ṭhiam in Mandalay ramṭhen, Tapeihkyin (သပိတ်ကျင်း) peng ah, tuzing August 9 Sml 11:10 hrawng ahkhan Ayarwaddy tiva ah SAC ralkap riahcaw a phortu tilawng 6 hna security lakpiak ding in a kalmi SAC ralkap motor 3 cu Shiataw(ရှားတော) khua le Shwekyunpin(ရှေကျွန်းပင်) khua kar ah PDF nih bomb lung 7 in hmunthum ah an puahhnawh hna i, SAC ralkap 5 an thi, tiah theih a si.

Natogyi Khua, Sakremhnak Zung Ah A Ummi SAC Ralkap Cu Hriamngan In Kah An Ton Caah Ralkap 4 An Thi: Mandalay ramṭhen, Minchan pengkomh, Natogyi(နွားထိုးကြီး) khua, sakremhnak zung(construction office) ah chinlung a chuih mi SAC ralkap 12 cu, August 7 zanlei sml 5:00 hrawng ah hriamngan in PDF nih an hna caah ralkap 4 an thi, midang 5 hliamhma an pu, tiah Natogyi PDF nih an thanh.

“Tatma 99 tang ah a ummi ralkap 12 cu, chinlung an chuih lio ah hriamngan in kan kah hna i, ralbawi pakhat telh in 4 cu a hmun ah an thi colh. Bo thum pa le ralkap pakhat hi Myaikhtilar sii-inn ah an chiah hna,” tiah NPDF in ṭuanvo ngeitu nih a chim. Kah an ton hnuah SAC ralkap pawl cu khua kiangkap ah sentari an cawngh ter hna. Khuapau dohthlennak hi rianrang tein tei nan duh ahcun thazaang tampi in kan pe u, tiah Natogyi PDF nih forhfialnak an tuah.

Mansi Gyi Khuami Pakhat Cu Shanni Nationalities Army(SNA) Nih An Kahthah!: Banmauk peng, Mansi Gyi (မံစီကြီး) khuami pakhat cu “PDF he pehtlaihnak na ngei” tiah puh in, Shanni Nationalities Army(SNA) nih an kahthah. Nizaan August 8 zaanlei sml 3 hrawng ah kum 30 hrawng a simi Ko Kyaw Thet cu dawr thilri a cawk lio ah SNA nih an kahthah i, nihin August 9 ah a ruak hlam ding in an kan chimh, tiah Banmauk Revolution-BR in tuanvo ngeitu pakhat nih a chim.

“Mansi Gyi khua ah SNA cu an ra i minung pakhat cu an tlaih. “Ko Kyaw Thet khoika dah a um” tiah tukvelh buin an tlaih mi pa cu an hal caah Ko Kyaw Thet umnak ah cun a kalpi hna. Ko Kyaw Thet cu a zaam i, a ke ah meithal in an kah hnu ah motor cung ah an khin i an kalpi. Tuzing ah cun a ruak hlam ding in a kan chimh ṭhan, tiah BR in ṭuanvo ngeitu pakhat nih cun a chim chap.

Kawthaung Khua Ah Ngatlaihnak Tilawng Pathum A Kangh Caah Minung 1 A Thi, Ks. Sing 3000 Man Hrawng A Cia, Tanintharyi ramṭhen, Kawthaung khua, Aye Yaih Ngein sang, Shwe Watwan(ရွှေဝက်ဝံ) hlei ah pawng ah tilawng pathum cu nizan August 8 chun sml 1:30 hrawng ah a kaang, tiah tualchung mi hna sinin theih a si.

August 8 chun sml 1:30 hrawng ah kangh hram aa thawk i, seh tilawng pathum a kaang, tiah bawmchantu phu nih an chim. “A kanghnak a ruang cu, tilawng cu chuah aa tim i, mei lam an remh lio ah electric line a rawh caah a kaang,” tiah bawmchantu phu chungtel pakhat nih a chim.

Zung kip in rianṭuantu hna le mizapi i bawm in meithat motor 8 he mei cu an phalh i, zanlei sml 2:30 hrawng ah an phalh khawh, tiah theih a si. Cu tilawng kanghnak ruang ah Zin Lin Htun, kum 35 cu mei hma in a nunnak a liam, Ayng Kyaw Moe cu a ke pahnih ah mei hma a pu. Paing Soe cu a ke pahnih le a lu ah mei hma a pu ve. An pahnih in an hliamhma a faak ngai, an nunnak ca ah ṭihnung a si ko, tiah theih a si.

Moe Shwe le Thein Naing Win zong hliamhma an pu i, Kawthaung sii-inn ah an chiah hna, tiah bawmchantu hna nih an chim. Tilawng pathum a kaangmi cu, Kawthaung khuami pakhat nih a ngeihmi a si i, kyats sing 3000 man hrawng a sung, tiah meithat zung in ṭuanvo ngeitu nih a ruahdamh.

Tamu Ah SAC Kuttang Um Phyosawhti Pahnih Cu Anmah le Anmah An I Kap!, India-Myanmar ramri, Tamu Myoma (မြို့မ) 12/b block, Pahe (ပါးဟဲ) hleidawnh pawng ah Phyosawhti ruak 2 cu August 7 ah palik nih an char hna, tiah khuami hna nih an chim. Cu thil a can nak a ruang cu August 6 zaan ah Phyosawhti 2 cu zu dawr ah ṭhu in zu an din lio ah bia an i el i, meithal in an i kah caah an pahnih ning in an thi tiah theih a si. A thimi hna cu Myoma 12/b sang i a ummi kum 20 hrawng a simi Aung Zaw Lin le Myo Min Htun hna an si.

SAC ralkap hna nih a thimi hna cu PDF nih an tuah mi a si ko lai, tiah an chim i, Pahe hleidawnh ah security an lak tiah khuami hna nih an chim. Security an lak lio ah cycle in aa chawk mi pakhat cu SAC nih dirter an timh i, a dir duh lo caah meithal in an kah. Cu hnu ah an tlaih i, kutcheh bomb lung 4 an tlaih chih, tiah SAC media nih a langhter.

US President hlun Donald Trump inn, Florida i a ummi cu FBI nih nizan August 8 ah an luhhnawh i, Fireproof box an bauh, tiah Donald Trump nih a chim. Donlad Trump kut chung ah a biapi ngai mi catlap (Document) pakhat khat an kawl mi a si kho, tiah thawngpang a leng.

Hi chekhlatnak an tuahmi hi Trump nih White House in Florida a inn ah aa kalpi mi biapi catlap he pehtlaihnak a ngeih caah a si, tiah US media hna nih an langhter. FBI Agent nih Trump ken mi Document cheukhat zong an laak, tiah Trump sihni pa nih a chim.

Thawng theihternak um loin kan inn an luh hi thil dawhcah lo ngaimi a si. Hi bantuk thil an tuahmi hi President i zuam ṭhannak ca ah dawn khantu a si, tiah Trump nih a chim. Trump cu 2024 ah President si i zuam ṭhan ding in timhtuahnak a ngei, tiah nitlak lei media hna nih an langhter.

Pakokku Thonginn Ah Mindat Khua In Tlaih A Tongmi 70 Leng An Chiah Hna, Magway ramṭhen, Pakokku thonginn ah Mindat peng in tlaih a tongmi 70 leng cu an chiah hna, cu chung ah thih hlan lo thong tla ding zong an i tel, tiah theih a si. Mindat peng cu SAC ralkap nih martial law an chiahnak a si i, Pakokko thonginn ah an chiahmi hna cu Mindat SAC ralkap biaceih zung nih bia an khiah piak hna i Pokokku ah an kuat hna.

“Pakokku thonginn ah a ummi chung in Mindat peng in a rak phanmi hi 70 an si. A luancia zarh zong ah 10 an rak phan chap. Thong tlami hna chung ah kum upa hna zong an i tel. A tlawm bik dan an tatmi hna hi rianhrang ṭuan le thong kum 3 tla ding an si,” tiah thonginn he naihniam mi sin in theih a si. Ralkap uknak tang in biaceih khawhmi sualnak hna cu SAC nih nawlpeknak(order) No. 3/2021 in 2021 March 15 ah cathanh an rak chuah.

Cu cathanh an chuahmi chung ah rampi rawiphiarnak, dohnak, cozah hlimhang thlaknak, ralkap rianṭuan dohkalhnak, ralkap sin rianṭuantu thlauhnak, Yazatatkyi section 505, zung rianṭuantu pakhat khat cu sual tuah ding in lemnak, a dik lomi thawngzamhnak hna aa tel, tiah theih a si.

Sezin Khua Kahdohnak Ah Tualchung Mi 18 Cu KIA Le PDF Nih An Chanhchuah Khawh Hna, Kachin ramkulh, Hpakant peng, Sezin khuate ah SAC ralkap sakhan pakhat cu nizan August 8 ah KIA le PDF nih an laak khawh. Cu sakhan ah a ummi, SAC nih an tlaihmi minung 18 cu an chanhchuah khawh hna, tiah tualchung mi hna nih a chim. Sezin khuate um SAC ralkap sakhan pakhat le Humalin peng ramri um Shwepyimyint(ရွှေပြည်မြင့်) khuate pawng ummi, Shan tapung(SNA) sakhan pakhnih cu KIA le PDF nih an laak khawh, tiah theih a si.

Tualchung mi pakhat nih, “July 20 le 23 lio ah SAC ralkap le SNA ṭangrual phu hna nih an rak tlaihmi tualchung mi 18 cu an va khamh khawh hna. Cun, an sakhan zong an laak,” tiah a chim. Sezin khuate ahhin a luancia July 16 in kahdohnak a chuak i, July 21 ah tualchung mi ral an hrial khawh nakhnga kahdohnak an rak ngol chung. Kahdohnak ruang ah Sezin khuami 2000 leng cu Ṭamakhan, Moehngin le Humalin peng ah an zaam, tiah theih a si.

Monywa PDF Sakhan Pakhat Cu SAC Ralkap Nih An Laak, Khuami Pathum An Thah Hna!: Sagaing ramṭhen, Monywa peng Tapepin khuate komh PDF sakhan pakhat cu, SAC ralkap nih August 8 zinglei ah an laak, tiah tualchung mi hna sin in theih a si. Zing suimilam 6:00 hrawng ah Monywa Economics Sianghleirun ah umhmun khuarmi SAC ralkap 40 hrawng cu Kaingtaw(ကိုင်းတော) khua ah an kal i, lakphakti dawr ah lakphakti a ding lio mi pa pakhat cu an tlaih. Cu hnu ah Tapepin PDF sakhan cu an va laak.

Tualchung mi pakhat nih, “Kaingtaw in Tapepin khua lei ah SAC ralkap cu an ra i, PDF sakhan pakhat cu an khangh dih,” tiah a chim. SAC ralkap nih 40 mm lung thum in an kah hnu ah PDF sakhan cu mei in an khangh dih, tiah theih a si. Cu pinah an kut an ṭemmi pa pahnih le khual pa pakhat cu an lu ah an tuk chih hna i, an thah beh hna. An ruak cu an phum hna, tiah Monywa thawngpang fiantertu phu nih cathanh an chuah.

Institute of Chin Affairs(ICA) Nih Myanmar Ralzaam Thiamhlei Panga Cu Ca Cawng Ding In A Auh Hna, Tukum October 3 thawk in Aizawl khuapi, Mizoram Sianghleirun ah kherhhlainak Fellowship training kai ding in Mizoram ah a um mi, Myanmar ralzaam chung in cathiamhlei siangngakchia panga cu Institute of Chin Affairs (ICA) nih a thim hna, tiah theih a si.

Fellowship training cu 2022 October in 2023 October tiang cawn a si lai i, thla 18 chung tiang kai khawhnak lam a um. Siangngakchia hna an dih heumi, umṭhutnak le sianginn thilri hna cu an rin dih hna lai. Cu pinah siangngakchia hna cu ramkip thiam sang hna he pehtlaihnak an tuahpiak hna lai i, ramkip sianghleirun le fimcawnnak phu in thiam sang hna nih an hruai hna lai, tiah theih a si.

Israel Le Palestine Nih Kahdaihnak An Tuah, kahdaihnak an tuahmi cu lunglawm tein kan don hna, tiah UN nih August 8 ah an chim. Egypt cozah nih a karlak in remnak ser ding in a forhfial hna caah August 7 ah kahdaihnak an tuah, tiah theih a si.

Middle East kongkau i ṭuanvo ngeitu UN Coordinator, Tor Wennesland nih, “Kahdaih biakamnak le biahrennak cu a rawh a fawi. Kahdohnak a chuah ṭhan ahcun ramkhel ṭhanchonak a nuar tuk lai,” tiah a chim. Israel-Palestine kahdohnak ahhin Palestine lei in 44 an thi i, 360 hliamhma an pu. Israel lei in 70 hrawng hliamhma an pu ve, tiah UN nih an langhter.

Videozohnak-