Tutan US Kan Pu Thimnak Cu Ka Khuaruah A Tamter Ko

Tutan US kan pu thimnak cu ka khuaruah a tamter ko
—————————————-
Nihin cu Inn umah US President tuanbia ka kau i a pa hranak paohpaoh harnak pek le thah an tawnmi ruahlo piin ka hmuh. Bianaah, 6th U.S President cu John Quincy Adams asi i a rian awt thawkin a tuanchung vialte buainak le zuamcawhnak he a khat i a donghnak ah President biachimnak khan i bia achim liopi ah a tlu i ni 2 hnuah a thi beh. 16th President cu Abraham Lincoln asi i misual kut in a thi. 26th President cu William McKinley asi i Socialist a doh caah thah a tong i a changtu Theodore Roosevelt zong thah an rak timh. 36th President kha John F. Kennedy asi i thah a rak si thiamthiam.

Atukum thimnak i a tling dingmi hi 46th nak asi lai vasi kaw a tutiang ri ahcun a buai ngaingai in kan um tikah pakhatkhat a cang hoi sual hngamaw ti a ka ruahter ngai. Credit: Peng Hlawnceu

Hi thawngpang hi relchap lo ahcun a pam tuk hringhran. December 1, 2020 ni ah khan US ramchung we the People convection (WTPC) pawl nih President Donald Trump sinah limited Veto Power hman dingin le ralkap nawlngeihnak tangah thimnak tuah than dingin hal an tuah hi a si. Press release an tuahmi cu Washington Times thawngzamh catlap khat bak in an chuah i phawtzamh a si. Legislation pawl, Court pawl le congress pawl hna nih constitutions an rem duh lo ahcun Vote Power hi hman hrimhrim dingin ca chung ahcun an langhter. Tukum thimnak hi buaibainak tam bik le US tuanbia ah hi bantuk vote buaibainak a ngan tukmi hi US mipi nih kan cohlan kho lo tiah an tial. Ralkap nawlngeihnak tangah thimnak thianghlim tein tuah than dingah President Trump sinah halnak an tuah hi a si.

Nihin ni tiang ah US thimnak kongkau ah zeihmanh result zong fiang tein a chuah kho rih lomi hi mipi pawl zong a simhtuk cang hna. President kan duhmi le mipi kan thimmi hi kan covo hrimhrim a si. Democratic Party pawl nih hi bantuk vote firnak le buaibainak an tuahmi hi mipi kan tuar kho hrimhrim lo an ti. Democratic party pawl ningcang loin cawlcanghnak pawl cu WTPC pawl nih cun Abraham Lincoln nih civil war lai ah an rammi himnak caah nawlngeihnak sang bik a ngeihchun mi extraordarny executive Power a rak hmanmi bantuk in President Donald Trump zong nih a kutchung ah a ummi Veto Power hi hman dingah forhfialnak an tuah hi a si. Cu bantuk in President nih a nawlngeihnak hi rak hman chung ahcun constitutions phunghrampi hi caan zeimawzat chung hman rih lo in an chiah chung lai i, thimnak an tuah than lai.

US officers le politicians pawl zong mipi nih aho hmanh an zumh kho ti hna lo. Hi thimnak hi tha tein le tluang tein tuah than khawhnak ding ahcun mipi pawl nih ralkap lawnglawng hi an zumh cang hna. Cu bantukin thimnak cu an tuah than ahcun computer hman ti loin paper vote of law lawnglawng an hman lai i, party pahnih palai pawl nih zohkhenhnak tangah vote tha tein an rel lai. Vote nak nawl covo a ngeitu register a tuahtu lawng nih an vote khawh cang lai. Hi thianghlim tein vote nak an tuah than i, Joe Biden a tling ahcun kan cohlan ko lai, nain vote fir nak le lih le hrokhrawl in an tuahmi in Biden a tling mi hi cu kan cohlan kho lai lo an ti. Mipi pawl nih nawlnak an tuahmi le an halmi hi President Donald Trump le White House lei nawlngeihtu hna nih cun zeihmanh bialehnak an tuah rih lo.

General Michael Flynn nih Trump nih hin tu lio caan te ah vote Power hi hman a herh bik caan a si tiah interview an tuahnak ah a chim ve. Democratic party pawl nih cun Veto power hi a hman sual lai ti hi an rak ruah cia mi a si tikah a rak soisel cia cang mi a si. Phunglam ning tein thimnak hi an tuah ahcun Donald Trump hi kan tei lai lo ti an rak fiang tuk cang caah a phunphun in an cawlcangh hi a si, tiah an langhter. CUn, vote diklo paper pawl a deu zong hi China kutchuah a si timi report zong an langhter chih cang. US tuanbia ah a um bal rih lomi vote firnak fakpi tiang a phan mi hi a poi taktak khi a si. Democratic pawl nih teinak le nawlngeihnak an hmuh ahcun US constitutions zong hi anmah duh ningin remh dih le biaknak lei zalonnak le speech of freedom timi pawl zong hi hloh dih an itimh tiah theih a si.

Democratic party nih nawlngeihnak an tlaih ahcun US rampi cu anmah duh paoh in an hruai lai caah, tih a nung tuk lai i, cheukhat cu um ngam hmanh a si ti lai lo, tiah an chim. Cheukhat nih cun tukum thimnak buainak hi second Evolution ti tiang in an auh cang. US ram chung media ngan pipi zong nih party pakhat lawng dirkamh in thawng an zamh mi le buaibainak an chuahter peng mi zong hi WTPC nih an nawl hi a si. A bikin US state 7 chung ah vote firnak le buainak kongah Pennsylvania state ah mipi hmai ah thawng fianternak an tuahmi nih vawleicung mipi khuaruahhar in a um ter dih hna. Arizona state chung zongah Pennsylvania state bantuk tein vote firnak le buainak an tuah ve hi a si. Georgia state zongah mipi hmai ah thawng fianternak an tuahmi ah hin Trump nih a tei thiamthiam ko. Media ngan pawl CNN, BBC le New York Time ti pawl nih hi bantuk in an cawlcangh tikah ngaihthiam khawh lo tiang in thawng dik lo cu an zamh peng. Joe Biden caah White House cu a hlat chinchin ko lai, tiah an langhter. US cu Civil war rim a nam deuhdeuh cang ti khawh a si. Donald Trump nih Veto Power hi a hman sual i ralkap pawl nawl peknak tangah thimnak maw an tuah than lai Civil war maw caan zeimaw chung a chuah lai ti hi thinphang a si cang.