Chin Miphun MAA Fighter Joshua Van UFC Aa Thong Cang Lai
=================================
TMix Martial Art Fighter Chin miphun Joshua Van cu a ra lai mi June 24 ah a hmasa bik UFC puai cu American ram ah aa thong cang lai tiah theih a si. MMA lentecelhnak ah zohchun awktlak a si mi “The Fearless” tiah an auh mi Joshua Van cu American ram, Florida peng, Jacksonville khua ah a um mi VyStar Veterans Memorial Arena Hall ah June 24 (Zarhte Ni) zaan ah Zhagas Zhumagulov he an i thong lai.
Joshua Van cu 2022 December 18 ah an tuah mi Fury Fighting Championship (Fury FC) ah McLean a tei i cu hnu ah Ultimate Fighting Championship (UFC) ah teltumnak nawl a ngah hi a si. Joshua Van hi kum 17 a si lio ah Martial Arts a rak cawng i boxing lentecelhnak a ngeih hnu ah Fury FC puai 8 aa thong i puai 7 teinak a hmuh hnu ah MMA lentecelhnak ah min a hun ngeih hi a si.
Elon Musk le Mark Zuckerburg Nih UFC ah I Phomh An Duh-Vawleicung mirum minthang pahnih Elon Musk le Mark Zuckerburg cu social media ah an i singkhaw i thirkulh(cage) chung ah kuttum he i phomh an duh.nTestla, SpaceX company le Twitter ngeitu mirum minthang Elon Musk nih cun amah social media Twitter ah “Zuckerburg he thirkulh(cage) chung ah i ṭhuat ka duh” tiah a taar.
Meta(Facebook le Instagram) company ngeitu Mark Zuckerburg nih cun “Na duhnak hmun chim” tiah a leh ve colh. Elon Musk nih “Vegas Octagon” tiah a vun leh. Elon Musk nih a chim duhmi cu “Las Vegas i UFC thirkulh(cage) chung ah i phomh usih” tinak a si. Ultimate Fighting Champioship(UFC) hmunpi hi Las Vegas, Nevada ah a um mi a si.
Kum 52 mi Elon Musk nih cun, kuat ṭha ngai mi “The Walrus” ka thiam i, cu kuat ka hman cang ahcun ahohmanh an cawl kho ti lo, tiah a ti. Culio ah kum 39 mi Mark Zuckerburg hi MMA training a tuah peng mi a si i, a luancia ni tlawmpal zong ah Jiu-Jitsu zuamnak ah bual a co.
UFC president Dana White zong nih a rian a ṭuan colh ve. Hi hna pahnih(Musk & Zuckerburg) hi ka chawnh veve hna i, an pahnih in an i biatak tuk veve. An i ṭhuat ahcun vawleicung tuanbia ah a ngan bikmi ‘fight’ a si lai, tiah a chim.