Tutan Kalaymyo khuachung ral thawh dan hi ruah deuh ahau in ka hmuh ko

Kalaymyo Kong Ka Ruahnak
——————-
Tutan Kalaymyo khuachung ral thawh dan hi ruah deuh ahau in ka hmuh ko. Kawlram chung khua ngan deuh vialte Kalaymyo dirhmun in rak cawl cio ve hna seh law cu phun dang deuh asi. Anmah Kalaymyo lawng bak in meithal țha te zong i ngeih dih lo, meithal ngeih hmanh ah raldo training akai bak lomi zapi tam deuh nih cozah ralkap pi khua khat ah dir onh peng ding hi caan sau caah cun asi kho deuh lai lo. Ral doh dan (strategy) thleng hna seh law ka duh piak hna.

1. Mipi chung in hliamhma pu le mithi (casualty) atamtuk nak hnga lo meithal tlai paoh hi contact i tuah hna seh law hmaitonh i tuknak ngol in ngaithleem i tuknak (Ambush) i tuah phun deuh in an cawl ah ațha deuh lai tiah ka ruah.

2. Cun abupi in khuachung ah hmaitonh in dir onh hna loin pikpak in kenkip in rak cawl ah ațha deuh men ko lai, cu lo ahcun ISIS le Taliban pawl nih mipi le hngakchia kha i khamnak (Shield) ah an hman hna i ral an tuk phun khin Kalaymyo mipi kha i khamnak ah hman mi dirhmun ah an um sual lai ti phan aum ngai.

3. Khuachung i do peng ahcun meithal khu, bom khu in khuami tamtuk kum upa deuh le hngakchia cu zawtfahnak caan saupi tuar khawh asi. Aran deuhnak in raldohning -strategy an thlen ah ațha ko lai tiah ka ruah ko.

Tutan Kalaymyo nih ralkap an doh dan cu, Mirang nih Laitlang arak chim i an ngeih mi hriamnam paoh in an rak doh hna bantuk kha asi i Kawl ralkap uknak doh cu ngol hrimhrim lo ding asi. Kan doh ve hna ning in kan tei khawh hna lo zong ah kan tei khawhnak hna lam aum mi paoh in kan doh peng ko hna lai. Bawipa nih Kalaymyo mipi in umpi hna seh law in veng peng hram ko hna seh! Credit: Victor Khen Sang