Tun Myat Naing: Min Aung Hlaing le a ralhrang he biaruah kan itimh Lo!

Tun Myat Naing: Min Aung Hlaing le a ralhrang he biaruah kan itimh Lo!
==========
Tun Myat Naing hruaimi Arakan Army hriamtlai phu nih atu lio uknak hramhram in a latu Min Aung Hlaing le a ralhrang he kahdaihnak ceikhan ding kan itimh lo bantuk in ramkhel lei kong zongah tonbiaruahnak ngeih ding zong kan itimh lo, tiah March 5, 2022 ni ah fiang tein an chim cang.

Hi kong he pehtlai in Arakan Army lei nih thawng fianternak an tuah lio ah mipi lei nih biahalnak ah atu bantuk in an let hna hi a si. Ramkhel kong tonbiaruahnak ngeih dingmi cu mipi he tu tonbiaruahnak ngeih ding le phunglamning uk hruainak kongah Phungning tein uktu he lawng tonbiaruahnak kan ngeihte lai, tiah Arakan Army hriamtlai phu biachimhnak nawlngeitu Khaing Thukha nih a chim.

Ramkhel kong biaruah tikah mah duhning in thil a kal lo ahcun a si kho lo. Kahdaihnak kongtu cu kahdohnak ngol chung a si. Ramkhel kong biaruah ding cu phungning tein cozah a tlaitu he kan i ruah hnu lawng tlam a tling lai, tiah a chim.

Rakhine ramkulh chungah phungning tein uk hruainak caah cozah kan herh tuk cang. Mipi nih cozah tha an herhtuk cang caah atu lio hramhram in uknak latu Min Aung Hlaing le A ralhrang pawl he tonbiaruahnak ngeih ding cu kan itimh lo, tiah a chim chap. Atu lio cu Arakan Army hriamtlai phu le ralhrang pawl hi phungning tein kahdaihnak kan tuahmi cu a um lo, zei bantuk cahren hmanh a um lo, tiah Arakan Army hriamtlai phu biachimhnak nawlngeitu Khaing Thukha nih a chim.

Rakhine ramkulh chungah Arakan Army hriamtlai phu le Kawl ralhrang hi kum 2018 thawk in 2020 thimnak hlan tiang kahdohnak a rak um peng. Thimnak a dih hnu ah kaphnih karlak theihthiamnak in kahdohnak a um ti lo. Ka hnu thla chungah Mawngdaw pengchung ah AA hriamtlai phu le ralhrang phu karlak ah kahdohnak a rak chuak than. Mawngdaw peng chung kahdohnak ah hin kaphnih in a thi mi an um nain, nihin ni ahcun zei hmanh kahdohnak a um than ti lo.

CNF/CNA in Salai Htet Ni he Biaruahnak: “Khuapi dahlo Zatuak 75 hi cu kanmah kut ah um ko cang”. Karenni hmunhma lei ah ralhrang nih kahdohnak fak piin a tuah lio a si. Ralhrang nih caan tlawmpal ah Chin ramkulh lei ah raltuknak fak piin a tuah ṭhan lai timi thawngpawng a chuah caah, Chin ramkulh chungah ralhrang pawl cawlcangh ning, kahdohnak thawngpang le mipi hriamtlai nih zeitluk tiang dah hmunhma an tlaih khawh cang timi kong he pehtlai in, CNF/CNA biachimnak nawl a ngeitu Salai Htet Ni le Irrawaddy thawngzamh biaruahnak a si.

Irrawaddy: Chin ramkulh chung kahdohnak zeidah a lawh? Htet Ni: Chin ramkulh peng 9 ah kahdohnak hmete te an um dih. Kahdohnak fak cu a um tuk lo. A biapi in Matupi peng le a dang peng lei ah, hmunhma zohfelnak (silo ah hmunhma theih in lak duh ah) timi operation minbunh in ram tang le khuate chung ah lut in kahdohnak an tuah hnik tiah theih a si.

Irrawaddy: Chin ramkulh uknak lei tah zeidah a lawh? Chin miphun hramtlai hna nih zeitluk in dah uknak lei a tlaih khawh cang? Htet Ni: A tutiang ahcun, 75% hrawng cu kan kut cungah a um cang tiah chim khawh a si. Sihmanhsehlaw, March thla cun pau (thal) a chuah cang lai caah ralhrang nih kahdohnak an thok cang lai tiah ruahdamh khawh a si.
Chin ramkulh khuapi 9 ahcun ralhrang nih uknak an tlaih rih ko tiah chim khawh a si. Asinain, CDM a tuahmi ralkap, palik le cozah rianṭuantu pawl hi cu an kut cungah an um ti lo.

Khuapi 9 hi cu an tlaih chih ko. Peng khat le peng khat kar lampi cung pawl ah cawlcanghnak an ngei. Khuate pawl le ram tang ahcun cawlcanghnak an ngei kho ti lo. Khuapi ahcun an cawlcanghnak tete a um ko. Asinain, cozah zung pawl cu rian a ṭuan kho ti lo. 100% ah 30% hrawng lawng hi rian a ṭuan. Cozah rianṭuantu hna hi 10:00am ah zung an kai i 12:00pm hrawngah zung an ṭin. Mi an tlin ti lo caah nawlpeknak zong zeihmanh an tuah kho ti lo. Himnak caah a chiahmi ralkap pawl lawng rian an ṭuan kho cang.

Irrawaddy: A tulio kahdohnak ah, CNA/CDF caah zeibantuk harnak pawl dah a um kho? Htet Ni: Hman tein kan chim a si ahcun, hriamnam hi a har bik a si ko. Cun, a bawh (ambush) in a bawhtu phu pawl le mipi hriamtlai pawl nawlpeknak ahhin harnak tete a um. A dang cu a tlamtling ngai ko. Kan ngeihmi lai meithal pawl zong a sikhawhnak bik in hmanter thiam le doh a si ko.

Irrawaddy: Chin Miphun Ni kha Ralkap (SAC) nih a tuah ve mi cung ah tah, mipi pawl an hmuhning zeidah a lawh?
Htet Ni: CNF nih Kum 74nk Chin Miphun Ni cu tinhmi pathum he kan tuah lai tiah thawng kan thanh. Hramhram uknak hrawh, Chin miphun sersiam le Federal ramkomh ser timi hmuitinh hna ruat chih buin ram chung, ram leng Chin miphun hna nih Chin Miphun Ni hmang ding in thawng thanh a si. Khuapi ah ralhrang nih Chin Miphun Ni tuah ding in timhtuahnak a ngei ko nain hohmanh nih zei ah relpiak a si lo.

Hramhram uknak lak a si hnu ah NUG he hnatlaknak kan ngei. Cun, Chin miphun hriamtlai hna, CDMers hna le ram chung ramleng Chin miphun kan zapi lungrual tein hramhram uknak hrawh ding, Federal ramkomh ser ding in timhtuahnak biatak tein kan ngeih caah kan cawlcangh liopi a si.

Irrawaddy: Pau a chuak cang i ralhrang nih kahdohnak a tuah khawhmi a si caah, zei bantuk timhtuahnak dah nan ngeih? Htet Ni: 75% hrawng cu kan kut cungah a um cang timi hi Paletwa peng telh loin (a si), a dang khuate hna ahcun, sianginn, khuachung cawlcanghnak le Siikhaan hna hi kanmah tein on le kai a si cang. Asinain, mipi himnak caah mah pawl a um lawng ah tuahkhawhmi thil a si.

Raltuknak lei ah mipi himnak zeitluk tiang dah kan tlaihkhawh timi cungah aa hngat. A luancia kum nakin atu kum hi hneksaknak a um deuh hrim lai tiah ruah cia a si. Cucaah, raltuknak leiah, a ṭha bik in timhtuahnak kan ngei.

Irrawaddy: Chin ram ahcun raktuknak a dai. Sihmanhsehlaw, Karenni le Sagaing ramṭhen lei ah kahdohnak a fak ngai. Ralhrang pawl he aa tongmi hriamtlai phu hna caah zeidah biacah na duh hna? Htet Ni: Ralhrang pawl an raltuk dan kan zoh a si ahcun hmunhma pakhat ah thazang nganpi in raktuk le teinak lak hi a si. Hmunhma tamtuk ah raltuknak an tuah a si ahcun an thazaang a der lai. Hmunkhat lawngah kahdohnak fak piin a tuahmi hi kan i ralrin a hau. Cucaah, kanmah nih raktuknak hmunhma tampi kan tuah a herh.

Ralhrang nih thazaang tampi a hmankhawh lo nak hnga kanmah nih an thazaang cheu i hmun tampi ah kan tuk a herh. Cucaah mipi hriamtlai timi hi Chin miphun hriamtlai lawng a si lo. Khuapi lei in PDF pawl, hmun dang kaa dang i hriamtlai phu pawl le tlangcung hriamtlai kan zapi lungrual tein kan doh a herh. Mah lawngah an thazaang kan cheu khawh lai. An tuah tawnmi raktuk ning kha kan theihcia a si, mah cungah kan ngeihmi thazaang hmang in lungrual tein ṭuanṭi a herh.

Atu bantuk caan ah, tlangcung hriamtlai pawl, mipi hriamtlai pawl le CDMers kan zapi tein kan i fian a herh. Zeitindah kan lehrulh lai ti a si ahcun, ralhrang nih a thazaang ṭhawng tuk in hmunhma pakhat ah raltuknak a tuah khawh lo nak hnga a ruang tein raltukṭi a herh. Credit: The Chinland Post