Tulio theipar kan zun cuahmahmi ramkhel LIH zumhnak!
==========
Kawlram tapung lakah Khun Sa kha hlah maw mipi zaran nih upat bikmi a si hnga, ka ti. Khun Sa cu amah pennak ram chungah cun rampi uktu pawl nak hmanh in an rak upat i an rak dawt deuh. Thairam chung hmanh ah amah philhlonak memorial museum an tuahpiak. Zei ruangte ahkhin si lo. Mipi zaran pawl pawcawm nun khuasaknak, ngandamnak le fimnak an hmuh khawhnak ding tiangin a rak tuah tawntu pa menlo a rak si ve caah si ko.
Tapung dang pawl khi zeidah mipi caah santlaihnak nan tuah bal tiah hal tuah hna u, an seihkuyin (federal phunphai) lawng an chim khawh lai; mipi sin i chiah hranhram an kholhmi le phaisa an halmi hna kong an ichim ngam lai lo.
Cu pa cu US cozah nih that uh, a rak ti hna. Phaisa tampi a rak thaap. Kawl Newin te phu raap cozah sinah Khun Sa thah khawhnak ding US helicopter zong free bak in an rak bawmh hna. An va thah taktak ko. Helicopter in bom le zenkuan he a umnak hmun ah ciam dih cikcek in an va phomh. Khun Sa a thi cang tiah, US minthang media pipi nih an thanh lulh. Kawlram lei zong nih an thanh. Nain, a thi lo tiah a rak tuak ziartu pa a um. Cu pa cu Bertil Lintner a si. Sweden miphun ramkhel kong a dikning te bak i caṭial huam a si.
Mr Lintner nihcun Khun Sa ton ah a tlek a baoh a kaang dih an timi an sakhan lei ah cun a va choi. Khun Sa nihcun kak zuai in a rak don. “Na thih cang ṭung, ziah kan hmuh ne?” tiah a hal. Mah thamtham, media pawl ral an ituknak sawh khi si ko cuh tiah Khun Sa nihcun a rak leh.
Tulio Kawlram chungah ral ai donak bik hmun cu Thantlang le Kawkarait lei kiangkap deuh an si. Cobra ralkap timi phu nih TV tung umnak Kue raap sakhan an lak deih. An ralbawi pipi zong an hrilh hna. Mahka hmun cu ralhruang ihumzualnak ah strategic a sinak zawn deuh si rua. Kue raap nih biatak tein laak ṭhan ai zaal. Nizan nai ahkhan, an la kho nemmam loh. Raap ralhrang tham an ruak thanhnak ca hmanh lih in an ṭial, ti si.
Raap leikap nihcun, kan laak khawh ṭhan cang tiah an thanh ve. Ka thai duhmi cu tulio ahhin LIH propaganda a tam tuk. Raap zong nih LIH an thanh. Tapung zong nih Seihkuyin LIH an thanhmi a tam tuk ve. Nizan tihni Thantlang thilcang zong cu thil sining dik aho nih theih khawh si rih lai lo dah. KT media thanhning hna kha cu a rel nuam ngai; “Raap pawl cu siizung ah a thi dingmi khi tampi an um rih,” ti si.
Zei a va si ah, ho lei kap hmanh nih tulio ah thil dik an thanh lai lo. Cu zong cu raltuknak i a fah khunnak, Jesuh cawnpiak ning nun duh lo, vawlei sualnak zulh man theipar pakhat a si ve, kan ti men lai dah! Kan miphun te hi, a si khawh ahcun, Jesuh cawnpiak ning te tu in kal ciahmah rih ko usi law kan caah himnak bik a si rih thluangthluan lai tiah ka zumh.
Pasator phunphai, Evan phunphai cheukhat le milar mizaa phunphai pawl nih siapi an kan thliarpimi te hi cu Jesuh duhning zong a si deuh rua lo. Kue tei khi a fawi tuk. Kue nih an kan ṭihzah khawhnak ding lam cu thluak nei nih nan theih dih. Cu lam te tu cu zulh ah a ṭha bik ko, ti kha ka thai tawn duhmi te cu si. You know what? Lai cathiam mifim mino pawl nih meithal in an doh cuahmahmi sachia ralhrang pawl khi Kue chiahru, fa damiah phun, mihrut uico phun lawngte an si cuh.
Level ai khat lo tukmi ikah khi a si. Cu i uico thah khawhmi miphun va si ding hrim khi inautat tuk awk si cuh. Nan vei (siangpahrang mahawtada) pawl nih an thei maw thei lo tiah cun, keimah zumhnak ahcun an theih tuk lai ti hi si ko. An theih tuk bu in an in pahter hna. Anmah pumpak phaisa ruh khawh lam isialnak caah ti in ka hmuh ning a si (online thisen chawkhawl vairuang phunphai ka ti duhnak si lo; annih pawl cu anmah level hmuh khawhnak tein ai pumpe bak vemi an si i mu).
Tutan bantuk lawng hi si lai lo. Tampi a ra rih lai. Tam chinchin in chiatnak nih a kan tlunh rih lai. Lairam chung khuasa kan miphun hna i chiatnak le harsatnak, paamnak le zaamnak an ton deuh paoh ah phaisa tam deuh ruh khawhnak a hmu dingmi pawl khi a ngai tiah cun, MAH nakin a let in an sual deuh. Ka bia philh hlah uh!
Ruah awk: Jeremiah nih Judah miphun cungah a tlung dingmi kong a rak hmuh tuk. Mi sopaw an uktu siangpahrang fapa le pawl nih mihrut zoh in an rak zoh i thongah an rak thlak. Jeremiah a rak nihsawhtu pawl kha thah, mit khoih le sal canter pet an rak tong khah! Israel/Judah na si lo: Bible hi Zentel hna kan ca zongah fimchimtu a si. Nain, nang le kei cu Pathian Jehovah thimmi Israel (Judah) kan si lo. Mah cucu ithei. Zentel kan si.
Jesuh nih a vel a kan hrawmhmi innlak fa phun kan si ti khi mah le mah ihngal. Bible ka char le cangka Joshua bianabia le David bianabia hna ichar ve hlah. A zawn ai dang khih. Bing Siangpahrang minchiapa si nain, Kawlram tapung ah hi pa tluktu ho phu hmanh an um rih lo. Hi pa a rak luh balnak phu kong bel upat tlak an sinak ka von thai te lai. Credit: Salai C Alexander