Tulio Kawlram dirhmun hi UNSC nih a tlangtlak hnga maw?

Tulio Kawlram dirhmun hi UNSC nih a tlangtlak hnga maw?
=====================================
Tutan ralkap nih uknak an lak hi Kawlram tuanbia ah a voi 3 nak asi. 1962 ah General Ne Win hruainak in ralkap nih uknak an rak lak. 1988 ah General Saw Mawng hruaimi ralkap nih uknak an lak tthan. January 01, 2021 ah General Min Aung Hlaing hruaimi ralkap nih a voi 3 nak an lak tthan. Tutan Aung San Suhkyi a voih 2 nak inn-thong ah an hren mi le uknak an chuh nak kong ah UN, USA, UK le EU nih fak piin ralkap an mawhchiat hna, Kawlram politics kong ah an thinphan nak zong an chim.

President Biden nih US cu democracy phung tukdennak/hliamkhuainak a um nak khuazei hmun poah ah kan dir zungzal ko lai tiah a ti i US nih economic sanctions a phoih cang mi zong rianrang zoh tthan a hau lai tiah a ti. UN Secretary-General nih UN Security Council zong Kawlram kong ah emergency meeting tuah ding in timhlamhnak an ngeih nak kong a chim ve. China hi Kawlam ralkap a kilhkamh tawn tu asi. UNSC ah Kawlram kong an chuah pi poah ah veto power a hmang tawn tu asi. Tutan thil kong ah kaphnih i theihthiamlo nak kha phisin ding in a forhfial hna (urged all sides in the country to resolve differences). Combodia, Thailand, Philippines nih anmah ramchung buainak kong asi (internal matter) an ti ve.

UN Security Council kong tlawmpal in van chim ta sih. UNSC ah ram 15 members an um. Cu lak ah USA, UK, China, Russia le France hi permanent members an si i thim tthan lengmang a hau lo mi an si. A dang ram 10 tu hi members sawhsawh an si i kum 2 dan in UN General Assembly ah thim tthan lengmang an si. Vawleicung UN memebrs asi mi ram pakhat khat cung ah buainak a chuah tik ah ramdang in ralkap le hriam hmang in ithlak nak nawl le sipuzazii phihkharnak nawl a chuah kho tu cu UNSC lawnlawng hi asi. Permanent members ram 5 kha veto power a ngei mi an si i UNSC biachahnak kha an hnatlak lo ahcun an veto power hmang in UNSC cu an kham khawh.

Tutan term ahhin UNSC ah Norway zong member asi ve. Norway hi vawleicung ram deihnak kong ah biatak tein a cawlcang zungzal mi asi i UNSC zong fak piin influence tuah khawh ai zuam ve. Ram fate asi nain democracy principle a dir pi mi kong le vawleicung ram deihnak kong ah biatak tein a dir mi asi. UNSC tang ah subordinate bodies tam pi an um, cu hna cu sanctions committees, expert groups, ad hoc-committees, working groups ti pawl an si. Norway hi tu lio UNSC nih sanctions a tuah mi hna North Korea, ISIL, Al-Qaida kong le Syria le Afghanistan ram mipi harsatnak kong tawlrel tu le hruaitu ttuanvo khinh lio mi asi.

Aung San Suhkyi le Norway ram an i pehtleih ning hi phundang te asi. Nobel Peace Prize a pe tu ram an si pin ah Suhkyi nih Kawlram thlennak rian ah cawlcangh hram a thokka tein Norway nih fak piin an dirpi. Norway nih Kawlram politics le dirhmun an cuanh ning hi Pi Suh dirhmun ah ai hngat ti khawh zong asi. 2010 ah inn-thong in an rak chuah i 2012 ah election ah a lut i teinak a rak hmuh thok in Norway nih Kawlram in UN quota refugees a lak tawn mi a ngol bak ve ko. Tutan ah Suhkyi an van tleih tthan i, buainak a van chuak tik ah Norway nih biatak tein an dirpi nak kong an chim lengmang. Norway ram former PM asi mi Kjell Magne Bondevik hi Suhkyi he ai daw ngai mi an si i a mah pumpak hrim in Sukkyi a va tong lenmang mi asi. Cu pa zong nih cun biatak tein UNSC ah Kawlram kong ceihkhaan ding in forhfialnak a chim lengmang. Cucaah Norway hrim nih hin UNSC ah Kawlram kong cu an chuah pi lai tiah zumh a um ngaingai.

UNSC nih zeitindah hma an lak lai ti hi ruah phu te asi. A liamcia caan ah UNSC biachahnak he NATO ralkap nih Libya ram an tuk i Gaddafi le a hnuzul pawl an hram in an phuk nak te hna, Arab Spring buainak ah UNSC biachahnak in ralkap (military force) he a luhnak le a hnuzul thil vialte an zoh tthan tik ah an iruah ning bantuk a phichuak asi lo ning tampi an chim lengmang. Cupinah Libya le Middle East hrawng ah superpowers pawl nih «National Interest» an ngeih mi le Kawlram kong cu tamtuk in ai dang. Cucaah ralkap le hriamnam hmang in UNSC ai thlak ding cu a lam a um lo ah ka ruah. A lam a um bik mi cu economic sanctions hi asi ko.

Toe Zaw Latt (chief of DVB) nih, «Ralkap nih hin economic sanctions hi hrial khawh asi lai lo ti cu an theih tuk mi asi ko, nain nitlak ram pawl nih sanctions tuah ding khi zeihmanh ah an rel lo. Western ram pawl sanctions tuah ding nak in China, Japan le South Korea nih zeitin an lehrulh hna lai ti tu khi an buaipi deuh mi asi» a ti i zumh a um ngai. Cucaah a fiang ngai mi cu UNSC nih hriamnam le ralkap hmang in Kawlram buainak hi an tlangtlak lai lo nain sipuzii phihkharnak ttheu in an lehrulh te hna lai i cu nih cun ralbawi pawl le mirum pawl cung ah zei san a tlai lai lo i a tuar mi cu mipi lengmang kan si hoi te lai. Mipi kan rawlttaam le kan sifah a zual tthan te lai. A poi taktak ko. Credit: Salai Sangukceu Zinhlawng