Tuchun tthiam ah Myanmar Hackers pawl nih ralkap website (military-run websites) an hack tthan

Tutan “Myanmar’s Uprising” hi cu voidang he a phi chuak ai lo hrimhrim lai lo. Social Media chan asi pin ah mipi a hrihhawh tu, tactics a chuah tu, organize a tuah tu Generation Z pawl hrim an thiam tuk. Systematically te in thil an kal pi tik ah hmual a ngei taktak ko. Mipi lamzawhnak le CDM an tthuanh ter. Tlawmpal ah ralkap nih business an ngeih mi pawl boycott tuah ding an van au pi tthan. Ralkap companies pawl in chuah mi zu, kuak le a dangdang cawk lo ding, din lo ding, ei lo ding tiah boycott an tuah. Tlawmpal ah tax nan pe lai lo ti asi tthan. Mahhi pawl hi mipi nih lungrual in tuah ahcun ralkap an thahri pi a cat taktak ko lai.

Tuchun ah method dang an van chuah tthan i motor vialte lam ah an dir ter, drivers pawl nih “mechanical failure” an ti i an dir dih. A tak ahcun motor cu ai rawk lo cuh, cozah rianttuan pawl rian kal kho hna hlah sehlaw CDM ah itel dih hna seh ti khi si ko. Tuchun tthiam ah Myanmar Hackers pawl nih ralkap website (military-run websites) an hack tthan. An hack mi chung ah Central Bank of Myanmar le ralkap cozah agencies tampi an itel. Hackers pawl nih kan itinh mi cu ralkap uknak thlak kha asi i ralkap thahri asi mi business le department vialte an hram pelh lak in online in kan doh lai tiah an ttial. Hi hackers pawl cawlcannghnak zong hi hmual a ngei bak fawn lai.

Mipi nih ralkap ngeih mi banks le companies pawl boycott an van tuah taktak tik ah ralkap ta asi mi Myawaddy Bank cu an phaisa dih deng dawh in a um. Myawaddy Bank ah phaisa a chia mi mipi nih an phaisa an lak tluahmah. Phaisa la tu an tamtuk caah zung zong 11 A.M tiang lawng an on. Nikhat ah customers 200 lawng an cohlan i minung pakhat nih ting 50 cung chuah khawh asi lo tiah ri an khiah piak hna. Tlawmpal ah bankrupt (bank a nung kho ti lo) asi te kho. An thahri a cat cuahmah ti a lang ko. Atu cu cozah bank pahnih Central Bank of Myanmar le Myanmar Economic Bank khi an i channak asi ko rua. Khi pahnih zong khi ralkap nih phaisa a tomtom in an chuah ti asi le tlampal ahcun phaisa a dih ve te kho mi asi.

A lam kip in method a phunphun in doh asi tik ah mipi nih teinak co ding hi ruahchannak a um ko. Ralkap nih an tei sual ahcun ruahchannak a dih bak, state emergency in kumkhat kan control lai i cu khawh cun election kan tuah tthan lai an ti mi khi an itimh mi taktak hmanh rak si sehlaw, tu ning cun election hrim an tuah ngam ti lai lo. Zeicatiah mipi thinlinh le lungfah ning a fak tuk cang i election an tuah ahcun fak chinchin in an sung ding kha an ruah ve lai caah ralkap uknak in kum tampi a kal tthan lai tinak asi. Cucaah mipi nih tei hrimhrim a hau. Sangukceu Zinhlawng. Source: The Irrawaddy (17.02.21)