Tuchun thawngpang ah a laar bikmi cu Capitol Hill a cawngtu US ralkap thong 5,000 hna cu an duh na loin motor chiahnak ttuang

Thawngpang Neknawi
******************
Tuchun thawngpang ah a laar bikmi cu Capitol Hill a cawngtu US ralkap thong 5,000 hna cu an duh na loin motor chiahnak ttuang, garage i an ihter nak hna hmanthlak nih mi thinlung a fahter ngaingai. Ralkap pawl le ralkap chungkhar vialte an thinhung dih ti a si. Republican congressman pawl nih an riahnak hmun ah an rak hnemh hna ti a si. Mah ruangah tuanvo ngeitu bik, Nancy Pelosi cu social media le main stream media nih faak ngai soisel a tong.

President Hlun Trump le Facebook; Facebook ngeitu Mark Zuckerberg nih President hlun Trump account an phih piakmi cu on than khawh zong a si kho” tiah tuchun ah a thim. Facebook Oversight Board meting kan thu lai I, thil sining vialte hlathlainak tuah dih hnu ah biachahnak kan tuah lai” tiah a chim. Mah Board ahcun experts, scholars le Journalist pawl an I tel. Mah pawl nih tha tein thla thum chung zohfelnak an tuah hnu ah an ceih lai I, biachahnak kan tuah lai tiah tuchun ah a chim. Facebook le Twitter cu Donald Trump an phih ruangah an market value $51 billion renglo an sung cang.

President Hlun, Donald Trump Impeachment; President hlun, Donald Trum cu Capitol Hill buainak ruangah House nih impeachment an tuah I, a sual tiah bia an chah. Mah bia an chahmi cu Senate nih tazacuai ding a si. Hmaizarh cacawn nikhat ni January 25 ah khin House Speaker Nancy Pelosi nih Senate Majority leader Chuck Shumer sin ah Article of Impeachment cu a pek lai I, tazacuai an thawk cang lai. Senate Democrats hruaitu Schumer nih a chimnak ah Republican hruaitu hna he free and fair tein tazacuai tuah khawhnak dingah biaruahnak kan ngei cang. Tazacuainak kan tuah lai, senate nih a sual le sual lo biachahnak an ngei lai” tiah tuchun ah a chim.

President hlun Donald Trump taza an cuainak cu “ The Article of Impeachment for Incitement of Insurrection ti a si. Capitol Hill buainak ah a chunglei in a cawlcangtu le a bawmtu hna a si tiah an puh. Senate ah Impeachment a tuahtu ding hna cu House I democrats palai hna a simi, Jamie Raskin, Joaguin Castro, Eric Swawell, Ted Lieu le Diana DeGette hna an si lai. President Trump caah sihni a tuantu ding hna cu, South Carolina I a ummi, Law Firm, Butch Bowers pawl an si lai. Mah hna hi minthang ngaingai mi law firm an si. South Carolina Gov. Henry McMaster le Gov.hlun, Nikki Haley ca zongah sihni a rak tuan balmi an si.

Presidnet hlun Trump tazacuainak cu US Supreme Court hruainak in tuah a si lai. House in impeachment an tuahtu hna nih managers an tuah lai I, Donald Trump an sualnak kong telhte he an chuahpi dih hnu ah Trump sihni hna nih a sual lonak an chim ve lai. Mah hnu ah Senate ah debate an tuah than lai I, a donghnak ah a sual le sual lo Senator minung 100 nih vote thlak a si lai. Senator dihlak cheuthum cheu hnih hnatlaknak lawng in sual phawt khawh a si. Sual a phawt hmanh ah thongthlak a um lo, President hlun hna nih an ngah dingmi covo le benefits pawltu cu a ngah ti lai lo.

Senator minung 67 nih a sual tiah vote an tlak ahcun Donald Trump cu sual ah chiah a si te lai. Asinain Senate ah hin Democrats le Republican senator 50 veve an um. Cucaah Republican senator minung 17 nih Democrats lei ah an ttan a hau. Republican Senator minung 17 nih Donald Trump an kal taak ding hi cu a si kho lomi a si caah Democrats pawl nih Trump taza an cuaimi hi an hlawhtlin lai ka zum lo. Credit: Salai Lairamthang