Tuchun cu Thawngpang phundang ngai a chuak!

Tuchun cu Thawngpang phundang ngai a chuak
=============
𝗗𝗮𝘄𝗻𝘇𝘂𝗸 – phayeti; Tuchun cu Thawngpang phundang ngai a chuak. Kawl ralkap in Northwestern Commander (anmah holh cun ‘taing-hmu’) a inn ah an hren tiin DVB Burmese nih a ti. Caan tlawmpal hnu ah, “an velhnak ah an kut a luan sual i a thi tiah thawngpang a chuak” an hun ti chap. Va dik sehlaw a va tha lai dah.

Northwestern Command ahcun Paletwa dah ti lo, Chinram pumpi aa tel. Sagaing ram zeimawzat zong aa tel i, an Headquarter cu Monywa ah a um. Tuchun an tlaih (a thi) tiah thawnpang a chuakmi pa hi Bohmugyoke Phyo Thant a si.
Chinram le Sagaing hrawng i, CDF, CNA le PDF he i kahnak ah Kawl ralkap tampi an thi, operation thathi in a hruai khawh lo ruang ah hiti an tuah hi a si, tiah DVB nih cun a tial (Cucu CDF-CNA nih a kan hmuh piak mi theipar ti khawh a si hnga).

Hi kong hi Kawl ralkap a chunglei minung nih an chimmi si, a ti. Hi a “chunglei” timi “phu” hi atu lio ahcun langsaar tuk tung lo hmual ngei ngai in cawlcangh dawh an si. Naitan i, Naypyidaw ah Kawl ralkap hriamnam cawzuartu zung le Defense Ministry zung ah bomb an puah hnawhmi zong kha a chung lei minung an si, tiah thawngpang an chuak.
A chung lei minung khi atu lio ahcun “pha-ye-ti” tiah an auh hna. Kawlca a relmi nih cun nan hun hmuh pah theo lai. CDM tuah loin a chung lei ah Kawl ralkap rawhralnak khua a rak khangtu, PDF sin ah thawngpetu le mipi lei tang mi khi an si.

“Phai-ye-ti” cu Thangtlang peng thlanglei nih cun “Dawnzuk” kan timi thei nganpi khi a si. A leng zoh ahcun a hring nain a thei van kheh ah a chung a sen; A color nih zei leitang dah an si, ti kha an tahchunh duhmi a si.Tuchun i, Northwestern Commander pa a thihnak kong hi thawng dik a si ko ahcun “Pha-ye-ti” cawlcanghnak cu ruah ning nakin a lian tinak a si hnga. “Military Operation thathi tawlrel khawh lo” ruang sawhsawh ahcun ‘Tainghmu’ pi cu an hrem in, an that hnga lo.

Hi thawngpang a va dik theng lo zong ah “Pha-ye-ti” cawlcanghnak tu hi cu a dik taktakmi a si i, a bik in Naypyidaw le Mandalay hrawng ahkhin thawn ngai dawh a si. Hmundang zong ah an um pah len. Khat lei in Kawl ralkap le Palek lei in CDM a lutmi an karh ziahmah. A chung lei in “Pha-ye-ti” pawl thate an i sersiam khawh ve ahcun ruahchannak a um ngai hnga.

Ziah tiahcun, atu lio mizapi nih kan i ruahchan bikmi cu Kawl ralkap an kehkuai i, anmah le anmah an i doh asiloah mizapi lei tang an karh ziahmah i an institution tiang hrawh khi a si cang. CDM nih a ngiang an thlongh pah ziahmah, “pha-ye-ti” nih a hram an chah ziahmah lai, mizapi ralkap nih a phaw an hawh ziahmah lai; Mah pathum hi lungthul lo tein a kal peng khawh ahcun Kawl ralkap institution a pur nak ding cu ruahchannak a tampi hnga.

Khat lei belte in hun i ralrin awk ngai cu, “pha-ye-ti” cheukhat hi Kawl ralkap caah “Double Agent” phun an si kho ve. Pha-ye-ti muisam i bunh in Kawl ralkap lei tu ah a rak tang mi, phun dang chim ahcun “pha-ye-ti” muicuang “dalan” kan ti lai. Cu bantuk an tam sual ahcun a kan teinak tactics phun khat a si kho ve. Cucaah “pha-ye-ti” he i pehtlaih tikah ralrin ngai a herh ve hnga. Credit: June Nilian Sang

Atulio Ka Lemh Duh Lo Ngaimi Bia Chawkvai Hna! Thantlang khuapi an chuahtak hnu ah khuachung ahcun kahding asi loh timi le tlangcungmi dihlak hmunkhat te ah ral kan tho ttung lo ahcun daitein um hi attha deuh. Kanmah lawng cun zeitindah ral cu kan tei khawh lai timi bia siphainak aum pah len. Keimah sin zongah achimmi an um pah, politics le raltuknak lei athei lomi hna an bia hi cu ka ngaipiak duh lem hna loh, Biadangtu ah kapial pi hna. Asininain, mifim le cathiam pipi nih bia si anphai ahcun fak nawnin ka el ve ton hna.

Kanmah nakin thazaang atthawngdeuhmi ral kantuk tikah ralkap thazaang kha, kan tthencheu hmasa hna ahau, Cuhnu lawngah ral kha kan tei lai. Cutin va tthencheukhawhnakding ahcun khuapi ah vakah khi ahau, Khuaipi ah kan kah hnatikah khuapi humhimnak caah ralkap thazaang tampi hman ahau colh. Khuapi an veng khawhlo ahcun uknak kha arawk colh ve lai.

Hi ruang ahhin ral pawl nih uknak rawk kha, an ttih tuk caah khuapi humhim hi abiapi tukah an chiahnak hi asi. Khuapi an humhak tikah ralram ah akaldingmi ralkap thazaang tampi kha azor i, ralkap thazaang kha aitthencheu cang, Culio te cu caanttha kan lak i kan tuk hna ahcun teinak lam aum ngai.

Atulio kahdohnak kan zohtikah cuhlanbantukin ralhrang pawl hi tlangcungmi umnak ah thazaang an chap kho ti loh, Aruangcu; PDF pawl nih Kawl khualipi tampi ah ankah hna tikah,’ cu khualipi humhak ding ahcun ralkap thazaang tampi ahman hna caah asi. Kan Chinram zongah ralkap thazaang an hunchap kho lomi khi khuapi vendingah ralkap tampi achiah hna caah asi. Cucaah khuapi chungin kan kah khawh hna khi an thazaang kan tthencheunak hna ahrampi khi asi. Cucu kan theih ahau.

Nihin kan dohmi ral hi ‘defence war’ IKHAMNAK RAL asi. Hihi kan theihlo ahcun saram ruahnak tlukhmanh kan si lailoh, Arpi nih afa le ahruai hna lio ah amahnak in aletin angandeuhmi Uico le Vok nih afa seh piak antimh tikah thih ngam in acol i acuk ve hna, Khi tin ava cukmi hna khi ikhamnak ral adoh mi asi. Vok le Uico aum sawhsawh ko mi hna khi Arpi nih ava cuk bal hna loh. Anunnak arak hnursuangmi hna tukha ava cuk hna, chimduhmi cu; saram hman nih ikhamnak ral adoh ahcun minung asimi rilmal mi nih ikhamnak ral kan doh ve lo ahcun Saram lungput hmanh kan tluk loh tinak khi asi.

MAH ralhrang pawl nih akan tlaih, akan hremh, akan thah, thawng akan thlak. kan inn le lo akan hrawh/khanghpiak, Cucaah hi vialte chungin kan luatnak hnga ‘kanmah ikhamnak ral kan thomi hi asi, Hiral kan dohmi hi athiangmi ral dohnak asi, International law ah mah ikhamnak ral doh cu athiangmi ral ah pom asi.

Acunglei ka bia ah luttthan ninglaw upa lungfim pipi ah ruahmi hna le cathiam mi hna nih raltuknak strategy theih loin azai mi hna nih zei atheihlo mipi tamtuk lungthin nan hrawh nan zor ter hna, Hihi kan miphun dernak virus ngan taktak asi tikha nanphilh lo ah attha lai.

Angaite ti ahcun Saram hman nih amah aivennak ikhamnak ral adoh. Minung asi ko mi nih mah ikhamnak ral hmanh kan doh ve lo ahcun Saram lungput hmanh kan tluk hnga loh. Nihin kan dohmi ral hi ‘defence war’ mah ikhamnak ral kan doh tihi kan lungthin ah hrenhchih ahau, Culo ahcun vaivuanh lam zawh sual afawi ngaite. Van Neih Thang