Tuchun Chinram Chung Kahdohnak Thawngpang Tawi!

News Update!
=====
1. Tuchun Falam peng Rihkhuadar khua pawng Țio le Haimual khua karlak ah CDF-Hualngoram, CNA țangți le Kawl ralhrang an i kap, Rihkhuadar khuami cheuthum ah cheuhnih cu India ram (Zokhuathar) lei ah an zaam.

Chin ralkap țangți CDF-Hualngoram le CNA lei siseh, Kawl ralhrang lei siseh a thi aa hliammi an um le um lo theih si lo. Zarh thawk ahkhan Tedim lei in Rih tidil pawng ralhrang camp ah Kawl ralhrang minung 50 an rak phan bal.

2. Tuzing Suimilam 10 hrawng ahkhan Kalaymyo in Laitlang lei ah Kawl ralhrang mawtaw 22 hrawng a kal. Mawtaw chung ah fangtun pawl le Kawl ralkap 5 cio (mawtaw pakhat ah) an um tiah theih a si.

3. Chauhțuh khua a ummi ralhrang nih hmun hlaat kahnak miakpi in Laitlang lei voi-tampi an kah caah Mindat peng Lilawng khua ah bom hnih a tla i, inn 2 a kaang. Photo: CDF-Hualngoram ralkap le Rihkhuadar khuami a zaammi hna. Credit: Salai Thomas Lian

Bungzung khua inn 180 leng nih an zaam tak! 2022 January 28 — Hakha le Gangaw kar ah ummi Senthang peng, Bungzung khua inn 180 leng nih January 28 tiang an zaam tak cang tiah thawng kan theih. Bungzung khua cu inn 200 leng khuasa an si i atu ahcun inn 20 hrawng lawng hi khua chung ah an um cang tiah theih a si.

Ralzaam caah hmunhma ser le dirh takmi buk a um lo caah khua a chuaktak mi le a zaam mi hna hi Bungzung kiangkap ram tang ah inn 10 cio hrawng fonh in buk sak i um cio a si tiah khuami sin in theih a si. “Bungzung khua a si i ramdang um mi pawl sin in bomhnak tete kan hmuh lawng si loin thawngpang a daih deuh lio ah khuapi lei ah thil zalh cia deuh a si rih caah tutiang cu kan har tuk rih lo” tiah khuami pakhat nih The Chinland Post ah a chim.

Senthang Peng, Bungzung khua hi inn 200 leng le milu 900 hrawng khuasa an si. 2021 June thla chung ah voikhat kahdohnak a chuah ruangah hi bantuk in khua chuahtak hi a si. Caan tlawmpal ah, lo ṭuan le lei ṭuan ruah ah khua chung i fuh panh ṭhan a si.

2021 September 7 ah NUG nih Kawl ralkap kan doh cang lai ti thawng a thanh caah le cu thawk in khat le khat i tlerhkhawnnak tete a um pah caah khuachung fuh tak lo in ramtang ah tlikzaam ṭhannak hi a si tiah thawng kan theih. Credit: The Chinland Post

Mindat Mipi Hruaitu Phu Nih Fiang Tein Thawngthanhnak An Tuah Cang! CDM A Tuah Duh Lotu Paohpaoh Cu Dantatnak Kan Pek Cang Lai Tiah Mindat Mipi Hruaitu Phu Nih Fiang Tein Thawngthanhnak An Tuah Cang! Chin ramkulh Mindat peng chungah Non-CDM pawl nih zarh hnih chungah CDM tuah/lut dingin min peknak tuah/ngeih cang dingin siseh CDM a tuah lo tu paohpaoh cu dantatnak kan pek cang lai tiah Mindat peng chung mipi hruaitu phu nih ralrin peknak cathanh cu mizapi hmuh dih dingin an chuah hi a si.

CDM ah nan tuahnak le luhnak, nan pehtlaihnak kong cu nanmahle umnak pawngkam ah a ummi Mindat mipi hruaitu phu nih rian a khinhmi ukbawi hna le peng chung ukbawi hna sinah rianrang in pehtlaihnak tuah cang u tiah cathanh an chuahmi ahcun an forh chih hna.

CDM tuah loin CDM tuahtu hna i pumpak konglam tibantuk cu nawlngeihnak latu SAC ralhrang ralkap sinah thawngpang a petu hna zong nih hi bantukin nan thil tuahmi ruangah nanmah pumpak hrimhrim nih tuanvo nan ngeih caah fak taktakin dantatnak kan tuah cang lai tiah cathanh an chuahmi ahcun an langhter chih.

Nizan Falam peng kahdohnak; Falam peng chung hmun pakhat ah CNDF nih mine an domi cu January 19 ni ahkhan SAC ralhrang hna nih voithum bak an lamh sual caah SAC Kawl ralhrang 7 an thi i minung 10 hliam an tuar. SAC Kawl ralhrang lei i, Captain pakhat cu a kehnih a bul i, cu hna Kawl ralkap hruaitubik cu a mit a caw tiah thawngpang theih a si.

January 23, 2022 ni ahkhan Falam peng, Zawnglei khua pawng ah CNA, CNDF ṭangți nih SAC Kawl ralhrang a ra liomi cu chunnitlak an rak kah hna caah, SAC ralhrang lei in minung 13 an thi i, 11 hliam an tuar. CNDF lei in paralṭha pakhat a nunnak a liam i, țangți Chin ralkap lei in hliam faak lemlo hmumi 4 an um.

Cun January 25 ahkhan CNDF le CNA ṭangți in SAC Kawl ralhrang he an i kap țhan i, Kawl Ralhrang 4 an thi i, minung 5 hliam an tuar. Pathian kilvennak in Chin ralkap țangți lei in hliamtuar an um lo tiah theih a si. Anung Pathian nih hup pheng ko hna seh ralhrang hi lo dih cang ko hna seh.

1. Matupi peng Kaisi Tlangthluan Kawl ralhrang Camp cu CNA le CDF Matupi fonh nih an va kah hna i, Kawl ralhrang minung 8 an thi i, 10 renglo an i hliam lai tiah theih a si. Kawl ralhrang (၃၀၄ တပ်ရင်း) Sakhaan hi Matupi le Paletwa kar ah a ummi a si i, Ralhrang lei nih zanlei Sml 5 tiang kha hriamngan he hriam hme he an puah peng. CNA le CDF Matupi lei in thi le hliam an um lo.

2. Nizan Jan 25 ahkhan Rihkhuadar khua ah Kawl Ralhrang minung 50 hrawng an phan i, zanlai ah hriam ngan voi 5 hrawng an puah tiah theih a si. “Rihkhuadar khuachungmi thinphang thlalau in an um caah kum upa lei deuh telh in minung 200 hrawng Țio ral Zokhuathar(India) lei ah an hung zam. Tuchun cu meithal puah thawng kan thei ti lo” tiah Zokhuathar khuami pakhat nih a chim.

3. Tonzang peng hmun pakhat ah kahdohnak a um i, Mipi ralkap CDF- Tonzang lei in minung pahnih an nunnak a liam.
4. Zotung Tlang Rezua khua ah ralhrang minung 200 renglo an um cuahmah ti a si. Rezua khua le Hnaring khua (Thantlang peng) hi Meng 27 hrawng lawng aa hlaat caah an hung lan sual te hnga maw ti ruah lo awk a țha lo. Credit: The Federal Times