Tu zaan ah CNA kan pasaltha hna sin in thawngpang kan theih mi cu!!

Breaking News, Mizoram in Myanmar ram lei ah Helicopter a zuang!!
==============================
2022 October 1 zaan suimilaam 9:42 (Myanmar time) ah Mizoram in Myanmar ram lei ah Helicopter a zuang. Zeidah an i timh hnga ti ruah a phu ngaingai. Pakhat khat cu a si lai dah… Ka vun chuak i a mei dupdup ti lawng ka hmuh manh. A speed a rang ngaingai. Crd-Salai Tluangte

Relchap, Laung She Pengah SAC Ralkap Bomb Puahhnawh An Tong I Ralkap 2 An Thi, Magway ramṭhen, Laung She(လောင်းရှည်) peng Setutayar-Laungshi(စေတုတ္တရာ) lam cungah rallam a sialmi SAC ralkap pawl cu, bomb puahhnawh an ton caah ralkap 2 an thi, tiah Laung She Region People’s Defence Force nih an thanh. Nizaan September 30 zing sml 10:30 ah motor 1, cycle 7 le SAC ralkap 30 leng cu, bomb lung 8 in an puahhnawh hna. SAC ralkap cu Setutayar in a kalmi an si i, Kah Pah Sah 25 ralkap sakhan in a chuakmi an si, tiah theih a si.

“Kah Pah Sah 25 in a chuakmi SAC ralkap motor 1, cycle 7 le ralkap 30 leng cu, bomb lung 8 in kan puahhnawh hna caah motor cu kal kho ti loin a dir. Cuka ahcun kaphnih kar kahdohnak a chuak i, hriamngan in an kan kah ko nain kanmah lei a thimi le aa hliammi um lo tein hnu kan kir kho,” tiah Laung She Region People’s Defence Force in ṭuanvo ngeitu pakhat nih a chim. SAC ralkap pawl cu Laung She khua chungah lut an lut kho ti lo i, motor pakhat nih a rak don hna. Kut le ke a kiakmi SAC ralkap pawl tu cu mizaw phorhnak motor nih a rak don hna, tiah theih a si.

Sagaing Peng Sataung(ဆားတောင်) Palik Sakhan Cu PDF Nih An Kah Caah Palik 4 An Thah Hna, Sagaing ramṭhen, Sagaing peng Shwe Bo-Mandalay lam cung um Sataung(ဆားတောင်) palik sakhan cu, nihin October 1 zinglei ah kan kah i palik 4 an thi, tiah PAFD nih cathanh an chuah. Nihin zing sml 5:30 hrawng ah Sataung khua um palik sakhan cu, PDF ṭangṭi phu hna nih 40mm le meithal in an kah caah palik 4 an thih hi a si.

Sataung palik sakhan cu Sagaing peng Shwe Bo pengkomh Walet ramri ah a ummi a si. Atu kar hrawng cu PDF nih Shwe Bo-Mandalay lampi cu caan karlak chung an kham caah mi tlung kal an um lo, tiah tualchung mi hna nih an chim. Sataung palik sakhan kahdohnak ah People’s Army To Fight Dictatorship(PAFD) Companny DK PDF(MMU)၊ People’s knight Defense Force Myinmu (PKDF-MMU)၊ TAUNGTHA People Defense Force (TTAPDF)၊ D.B.B.F-MMU / Phoenix(SGG) hna i bawm in an kah, tiah theih a si.

Monywa Sipuazi Bank (စီးပွါးရေးဘဏ်) Ah A Ummi SAC Ralkap Kahdoh An Tong, 6 An Thi!!, Sagaing ramthen, Monywa sipuazi bank(စီးပွါးရေးဘဏ်) ah security a hngakmi SAC ralkap hna cu, Chindwin Attack Forcenih an kahdoh hna i SAC ralkap 6 an thi tiah Chindwin Attack Force nih an thanh. SAC ralkap hna hi zeitik dah an i thlahdorh bik caan a si ti cu tha tein kan i ngait i, cuti an daithlan lio ah kan kah hna tiah Chindwin Attack Force in ralkap pakhat nih a chim.
Cu kahdohnak cu, Monywa People, Defense Force Bataillon 2,3,4 nih an tuahmi a si.

N.Korea Cu S. Korea President Yoon Suk Yeol Nih Ralrin A Pek, N. Korea nih ngiarnak a tuahmi le aa hrocernak hi American le ṭangṭi ram hawikom hna nih ṭha tein kan sersiam lai i a phi kan kawl lai, tiah S. Korea president Yoon Suk Yeol nih nihin October 1 ah a chim.

N. Korea nih nuclear hriamnam a hman ahcun S. Korea le American nih fak bikmi dantatnak kan tuah lai, tiah ralrinnak a pek. Nihin October 1 “S. Korea Ralkap Ni” ni sunglawi cu S. Korea ram thlanglei ralkap headquater ah ah an tuah i, atu bantukin President Yoon Suk Yeol nih a chim hi a si.

N. Korea cu vawleicung ram tampi nih an soisel cuahmah ko bu ah nuclear hriamnam le Missile bomb serchuahnak le hneksaknak a tuah cuahmah rih ko, tiah S.Korea president nih cun a mawhchiat. Korea ram chungah a dikmi daihnak hmuhkhawhnak caah nuclear hriamnam hrawh ding hi N. Korea nih a tawlrel ding a si, tiah a chim.

Russia President Putin nih Ukraine ram hmun 4 cu Russia hmunram a si cang tiah a thanh mi kongah American le NATO nih an cohlang lo!! Moisku, Kremlin ah, Russia nih a lakmi Ukraine ram cu, kanmah ram a si cang tinak minsen thutnak puai cu, nizaan September 30 ah an tuah tiah theih a si. Cu puai ah cun, Russia nih a thimmi hruaitu hna nih, hi ram hmun 4 cu Russia hmunram a si cang tiah minthunhnak an ngeih.

Russia nih Ukraine ram hmun 4 a lakmi hna cu, Donetsk, Luhansk, Kherson le Zaporizhzhia hna an si. Putin nih Ukraine ram hmun 4 cu kan hnunram a si cang tiah a thanh hnuin Ukaraine cu seh thilri dollar 13 billion man bomh rih ding le Ukraine ram a latu Russia telhin, Russia lei ah a tangmi ram hna zong caan tlawmpal ah dan pek dingin American President Joe Biden nih cun a chim.

Ukraine Ram Thlanglei Ah Russia Nih Tualchung Mi Motor An Kah Caah Minung 23 An Nunnak A Liam, Ukraine ram thlanglei Zaporizhzhia hmunram ah har tongmi bawmhchanh dingin a kalmi motor cu, Russia ralkap nih rocket in an kah hna caah tualchung mi 23 an nunnak a liam, tiah Ukraine nawlngeitu hna nih an chim. Nizaan September 23 zinglei ah Ukraine ram Zaporizhzhia hmun khuapi ah kahdohnak a chuak ṭhan i minung 28 hliamhma an pu, an dihlak in civil mi lawngte an si, tiah theih a si.

Russia ralkap nih rocket in an kahmi motor chung ummi hna cu Russia nih an lak cangmi hmun ah har tongmi va bawmhchanh dingin a kalmi mi bawmchantu an si, tiah theih a si. Cu kahdohnak cu Russia nih kanmah kan si lo, Ukraine ralkap an si, tiah an puh hna.

Russia President Vladimir Putin nih, Ukraine ram chung ah zeimawzat hmunhma an lak cangmi hna cu Russia ram he i fonh ding in biachimnak a ngeih lai ah Russia ralkap nih atu bantukin Ukraine rammi 23 an kah thah hna hi a si. Ukraine ram chung ummi Zaporizhzhia le Kherson khua hna cu Russia President Vladimir Putin nih September 29 ah zalong tein um khawhnak nawl a pek cang hna, tiah theih a si.

Tachileik-Kyaingtone(ကျိုင်းတုံ) Motor Lampi Ah Motor Pakhat Horkuang Ah A Tlak Caah Minung 4 An Thi, 2 Hliamhma An Pu, Shan ramkulh, nichuah lei Tachileik pengkonh, Nayawng(နားယောင်း) khuakomh Pakha Nwe(ပါးခါးနွဲ့) khua pawng Kyaingtone-Tachileik motor lam kam horkuang ah civil motor pakhat cu, nihin October 1 zinglei ah a tla i, ngakchia 1 telh in minung 3 an nunnak a liam, tiah theih a si.

“Nihin zing sml 6:00 hrawngah minung 6 phortu Vigo motor pakhat cu Nanma(နမ်းမ) horkuang ah a tla. Motor khaltu nih rang tuk in a khalh caah horkuang chung a tlak hi a si. Ngakchia 1 le upa 3 an nunnak a liam i, minung 2 hliamhma an pu,” tiah mi bawmchantu pakhat nih a chim. Tachileik-Kyaingtone kar lam hi tlangcung motor lam a si pinah nawncek a tam i lam a nal ngaingai ko nain horkuang ah motor a tla i, a thimi hi cu an um bal hraw rih lo, atu hi a voikhatnak a si, tiah tualchung mi hna nih an chim.

Karen Ramkulh Nithum Chung Kahdohnak Ah SAC Ralkap 20 Hrawng An Thi, Karen ramkulh, Myawaddy peng Wamihta(ဝါးမီးထ) khua pawngah SAC ralkap hna cu, VENOM Column nih nithum chung an kah hna caah SAC ralkap 20 hrawng an thi, tiah theih a si. Wamihta khua thlanhmun pawngah umhmun a khuarmi SAC ralkap sakhan pakhat cu Venom phu nih a luancia September 27 ah an kah hna, tiah theih a si.

“Wamihta khua thlanhmun pawngah umhmun khuarmi SAC ralkap pawl cu kan bawh hna nain thawngpang an theih caah Taungni lei in a rami cu an kir dih ṭhan. September 28 ah SAC ralkap nih Wamihta sii-inn in meithal an puah i rallam an sial caah kaphnih kar kahdohnak nithum chung a chuak,” tiah VENOM hruaitu Saw Win Myint nih a chim.

Nithum kahdohnak ah SAC ralkap 20 hrawng an thi i, VENOM lei in a thimi le aa hliammi kan um lo, tiah cathanh an chuah. VENOM Column le SAC ralkap an i kahnak Wamihta khua he mengkhat hrawng aa hlatnak ah a ummi Uhkayit Hta(ဥကရစ်ထ) sakhan cu a luancia July thla ah VENOM le ṭangṭi phu hna nih an rak kah i an lak khawh.

Myanmar ram a lut dingmi motor ah, rithaisi sernak ah an hmanmi Acetone hang litter 6000 hrawng an tlaih! Puahkehnak le rithaisi sernak ah an hmanmi Acetone hang litter 6880 cu, Mizoram ramkulh, Kyianphai(ကျန်ဖိုင်) pengkomh palik nih September 29 ah an tlaih tiah theih a si.

Myanmar lei kal ding motor pahnih chungah, Acetone hang an rawnnak pung 34 cu kan tlaih. Cu hang cu, Mizoram rithaisi dohtu phu nih Red List ah an chiahmi a si caah, motor khaltu pahnih zong kan tlaih hna i a herh ningin hma kan lak hna lai tiah tuanvo ngeitu nih a chim. Mizoram chungah Kawlram mi sinin rithaisii tlaih a tam chin lengmang tiah theih a si.

CDF-Matupi nih SAC ralkap 2 an thah hna, 2022 September 24 ah Matupi-Hakha lam in rallam a sialmi SAC ralkap hna le CDF-Matupi kar kahdohnak a chuak. Cu kahdohnak cu Ngaleang khua pawng ah a si i, a luancia September 29 zaan sml 6:30 in 7:30 tiang kahdohnak a chuak tiah theih a si. Kahdohnak ah SAC ralkap 2 an thi i 5 hliam an tuar, CDF-Matupi lei cu hliamtuar um loin hnu kan tolh kho tiah CDF-Matupi nih nihin October 1 ah cathanh an chuah.

Mawleik kahdohnak ah SAC ralkap 8 an thi, meithal zuun 8 an lak!! Sagaing ramthen, Mawleik peng, Dwinpin(တ့န်းပင်) khua pawngah, Mawleik-PDF le SAC ralkap kar kahdohnak a chuak i, SAC ralkap 8 an thi, Mawleik khua i Phyosawhti hruaitu le a dang ralkap hna zong hliam an tuar tiah theih a si. MA3 zuun 1, MA2 zuun2, Kavai 2, Setlet(စက်လက်) 1, Tadawnghto(တတောင့်ထိုး)2, bomb lung 3, MA3 kuan bawm 17 an lak khawh tiah theih a si. Crd-The Chin Post