Tu nak fak deuhin khua kan ruah a hau hih!

Tunak fak deuhin khua kan ruah a hau hih!
============
Kan ram cu hi dirhmun kan phan cang tikha tampi chimhau loin nan theih dihmi si ko, abikin Chinram kong kan hun tial lai. Chinram ah kahdohnak fak a um bal lo tikah mitampi nihcun CNA/F kan mawhchiat peng hna, raldo ngam lo cu e kha e tiah rak phunhsaih cio an si.

Chin ralkap CNA/CDF nih an hun tukdoh cang tikah Chinram cu chunlai ah Ni tla hnik dingin a hun um. Chinmi ralzaam, Mizoram le ram innpa pinah IDP camps hna ah 30% kan zaam lio si. Chinram ah 30% tiang ralzaam dirhmun kan phak hi tukum hi avoikhatnak si lai.

Chin ram mizapi in ralzaam dih kan si kho lai lo,zaam duhlo, zaam kho lo tibantuk kan um te lai tikah abik in mangttam nih akan den te chih lai. Raltuknak ramah riantuan khawh silo, chaw kawl khawh silo pinah Kalaymyo le Gangaw lei in eidin ralhrang nih an kan phih te rih lai.

Mah vialte cu zeitin dah kan kham khawh ning si lai, duhthim awk dang kan ngeih ti lo caah ralhrang kha thazaang dihlak in doh lawlaw i Chinram kha kan pen/uk hau.

Chinram pen/uk nak dingah tiah a bikin ramleng nih tangka heh tiah thawh a si i $ 10 million tluk si lai tiah chim cio si. $ 10 million hi AK 47 meithal zun 2500 lawng acawk khawh, bomb le zenkuan aa tel rih lo; Ral le kan thawhka lawng sirih, mipi kan thadih caan a um te lai caah mizapi kan thadih hlanah Ramchung ramleng Krihfabu vialte he tangka thawh zok i kan tangka hlumter/fonh ter i kan raltuk zok haumi dirhmun ah kan dir.

Krihfabu kip nih cheuhra ah cheu li (4/10) pek sian dih hau. Chinmi cu abikin Krihfabu ah kan thazaang hi 90% aa funnak si caah Krihfabu kip nih thazaang an rak chuah cia mi pinah ahlei in hun chuah rih a hau ko.

Tutan kan raltuknak ah hin CNA/F le CDFs lawng lairel tu siloin Chin mipi aiawh in palai ser ve i CNA/F le CDF he tiah hriamnam kong, ralkap eidin le thildang ah tuanti le khuakhan ti biapi tuk. A ruang cu CNA/F le CDFs hna ral kong an ruah tikah thildang ah an duh zat ningin caan an pek khawh lo a um ve lai, cucaah Chin mipi aiawh palai nih tikhawhnak cio le ttuan khawhmi an ngeihmi pahrang kha hmannak lam ser piak ve hau.

Tulio cawlcanghnak le aliamcia caan zongah Krihfabu le peng, khua tibantuk nih rak dirkamhmi asi ko, tuhnu pinlei kan caan zoh tikah ahlei in hun i hnek rih le dirpi chin ahau ko tikha catial tu ka tinhmi cu si.

Rialti Khua Pawng ah an Hmuhmi Mithi Ruak cu Thlacamnak tein Zaanlei ah an Vui Cang! Rialti khua pawng, motor lamthlang pe 10 hrawng ah nihin zinglei ah pa pakhat ruak an hmuhmi cu Falam-Hakha karlak mengtung 144KM zawn ah Lungpi Baptist Church pastor David thlacamnak in nihin zaanlei ah an vui.

A ruak a rawh cang caah atu tiang aho si timi theih a si lo. Aho a si timi an theih tik ah chungkhar nih hmailei ah fawi tein a ruhro an hlam khawh nakhnga mengtung 144KM zawn ah a ruak an vui hi a si.

Mindat le Matupi kar ah CDF-Mindat le CDF-Matupi nih ralhraang panga an thah hna. Chin ramkulh Mindat in Matupi lei ah a kal mi raltuknak motor (Armoured Vehicle) le motor 70 leng a rak dongtu Matupi ralhraang hna cu October 21 ah Mindat- Matupi kar meng 78 zawn ah CDF-Mindat le CDF-Matupi i bawm in an kah hna caah ralhraang panga an thi i bomb in hliamh mi tampi an um tiah kan theih.

Cu kahdohnk a chuah lio cu; Mindat in a ra mi ralhraang motor pawl cu meng 56 zawn ah lam a cim i an taan lio a si caah hmaikal ke ralkap 150 hrawng nih meng 70 ka tiang an ra i an rak bawmh hna tiah kan theih. A luancia October 14 thawk in Mindat lei in a ra mi ralhraang hna nih meng 23 zawn i a um mi inn pawl an hrawh an bauh, Sia paruk an thah i an ei pinah riahcaw ah an i ken rih tiah kan theih.

Rangoon Sanchaung Palek zung an kah. Rangoon khuachung, Sanchaung ah a ummi palek sakhaan i humhimnak tuanvo latu ralkap cu nihin (October 23) ah motor aa cit mi nih meithal in an kah hna tiah kan theih.

“Nihin chunlai sml 2: 00 tluk ah a si. Motor pakhat in an ra i an kah hna. A thok ahcun bomb a puak mi ah kan ruah. Meithal thong voi 5 renglo kan thei. Tlawmpal ah lam cung in palek pawl an tlik len kan hmuh. A khen mi hna an um. Pakhat a thi tiah an chim. Ralkap motor tlawmpal ah an phan. Cun mizaw phorhnak a rak phan i an kalpi hna,” tiah kahnak a chuah lio ah a hmutu pakhat nih BBC ah a chim.

Tuzingka dei hlan zong ah Butahtaung ah Yangon – PDF nih ralkap an kah hna i ralkap minung pali an thi tiah thawng an thanh.

Rangoon khualai ah ralkap umnak hmun an kah; ralkap 4 thi. Tuzing (23 October 2021) zinglei khuadei deuh hlan ah PDF – Yangon nih Botataung um Maha Bandula lam cung ah runvennak a tuah mi SAC ralhrang ralkap an kah hna i minung 4 kan thah khawh hna tiah PDF – Yangon nih thawng an thanh.

“Minung pa 4 an thi. Kanmah lei in a thi mi le aa hliam mi kan um lo. Tlamtling te in hnu kan kir kho,” tiah S21 tiah a min aa sak mi PDF – Yangon chungtel nih Media sin ah a chim.

Kawlrawn lei PDF pawl hi anmah kumthar (tading-kyut) chung cawlcangh an i dinh hna hi an kumthar a dih in fakpi in SAC ralhrang dohnak thok than ding in timtuahnak an ngei cuahmah cang.

CDM tuah tu bothum pa Captain Aung Myo Htet. LID – 66 timi tah-mah 66 tang ah a umi mi LIB – 80 (kha-la-yah 80) in Captain Aung Myo Htet cu SAC ralhrang kaltak in CMD a tuah tiah kan theih.

LID – 66 hi ralkap nih uknak a lak hnu in ral doh ah hman bik mi le kaa kip in kuat mi ah an i tel. Chin ramkulh zong ah hmun tampi ah an rak kuat i September 29 i Thantlang ah kan pa le pahnih a kah that tu hna zong LID 66 tang a ummi in an si.

Pyin Oo Lwin Palek Sianginn in Duh Ye-oh Ye Yint Naung CDM A Tuah (Burmese Below). Pyin Oo Lwin – Zee Pin Gyi ah a ummi Palek bawi training peknak sianginn ah Duh Ye-oh a tuan lio mi Ye Yint Naung – Pa Biak cu palek rian chuah tak in CDM a tuah i a himnak hmun a phan cang tiah kan theih.

Pa Biak hi palek fimthiamnak lei ah cawnnak sang tampi a ngei mi a si caah palek sianginn lei le palek bawi pawl training peknak ah an hman ngai mi le an bochan ngai mi a si. Ahram thok te in CDM tuah a duh nain a umnak hmun in pehtlainak tuah le vun chuahnak lam a har caah atu ceo lawng ah a himnak hmun a phanh khawh hi a si tiah amah he aa naihniam mi chungkhar sin in kan theih.

Hmun Kip CDF Hruaitu Upa Pawl Nih Organization Bantuk Pakhat An Dirh. Chin miphun cihmih a kan timtu Kawl ralhrang nih an kan thah, an kan tlaih, an kan nawnnak le an kan neknak vialte hi kan duh lo ruang ah a tu bantuk in CDF/CNDF tiah min i bunh in ralhrang kan doh hna.

Hi lio ah mipi khuaruat kholo deuh pawl cu kan lung a dong pah deng lengmang. Kan hmurka zong in a chuak pah tawn. Lungdonghnak nih a chuahpi mi cu sungh zatlaknak lawnglawng a si. Lungsau nih nun a sersiam i ram a sersiam lai. Lungdong deng nawn in kan um lio ah thawngpang tha taktak pakhat hun theih hi cu a nuam kho taktak ve si.

Zei dah si tiah cun, Chin ram ah Myo 9 hna i CDF hruaitu upa vialte cu zarhkhat ah voikhat tluk deng, ni 10 ah voikhat tiin tonnak, bia ruahnak an ngei. A fawinak in kan chim ah cun ralhrang teinak ding ah lungrual tein khua an khangti tinak a si. A si mi zong a si.

Hi tonnak ah min an bunh mi cu ”Join Military Comment” tiah min an pek. Hihi Organization phunkhat bantuk in an dirhmi a si tiah kan theih. Min an bunh mi hi official in thawngthanh mi a um rih lo ruang ah ka palh sual siah cun ka ruatthiam hram uh. An dirhnak hmun le hma zong mipi nih theih a herh tik ah kan theih te lai.

CDF hruaitu hna nih a tu bantuk in ton bia ruahnak ngei in lungrual tein ralhrang kan doh lai tiah an khuakhan mi hi Chin mi kan ral teinak phunkhat a si. Mipi nih CDF/ CNA ah raltha taktak in i hngat ko hna usih.
Hihi mipi nih kan theih khawh cio ah a tha. Credit; Chum Nawl