Tu lio Chinram chung cawlcanghnak cu lung hmui tak an si

Tu lio Chinram chung cawlcanghnak cu lung hmui tak an si. Khua kip ralkap duhlonak an langhter ning zoh tikah, atu bantuk nakin mipi iṭhangh phawknak a um theng ti lai lo. Biaknaklei hruaitu pastor te hrimhrim uar an um kho tuk.
Atu bantuk caan ah hriamtlai nih uknak chut ve hna sehlaw a ṭha hnga maw? Mah hihi ruah ngai hau a si. Lak kho dirhmun si cun a ṭha tuk hnga teh. Tu lio nak chance ṭha cu um ti lai lo.

Chinram chungah Kawl raap buk, buk zeizat dah an um ti theih an hau hnga. Chin hmaisuang ralkap pa zeizat dah an um ve ti zong theih hau hnga. Serious deuh in khuatuaktaantu le Gen Z pawl ruahnak aa dan lo a biapi men lai. Lai ralkap nih milu thazaang in Chinram chung hmun khuar Kawl raap an zat lo kho men. Cucaah Lai ralkap le Gen Z cu dirṭi ding an si. Chin miphun vialte dirṭi caan a si. Kawl raap buk bomb in va puah hnawh cu sual si loin ho paoh nih kan pom cio. Raap a tomtom in hloh khawh si sehlaw, Chin ralkap nih Chinram uknak innpi an lak khawh ahcun, Cuti “The State of Chinland” Zalennak thawng an thanh khawh ahcun zei tluk in dah Chin miphun vialte kan lung aa nuamh hnga.

Vawlei zong nih ram ngei miphun tiah an von kan theih cang lai. Pathian nih a kan pekmi ram ah mahte dir khawhnak ni khua a ceu vuaimai ko hnga. Cu bantuk dirhmun le na chunmang a tlin khawhnak dingah keyboard fighters pawl kan iralrin deuh ah ṭha men lai. Pumpak nih an Facebook i an itarmi kong ah soisel bak hna hlah u law ṭha. Lung ihmuh thiam lonak phun nih dothlennak thazaang a zorter sual khawh men.

Ti zut lo bakin cawl lawlaw hna usih ti nan duh ahcun, CNF/CNA kha sual va phawt caan si lo. A forh tu in forh caan an si deuh men lai. “Pasal, ka biakam le ka tlah ṭem” ti in miphun caah a rak dir ngammi an si. Ram le miphun caah nunnak thap in Kawl ralkap uknak kan doh lai aa rak itimi an si. 1947 Panglong Agreement ah hlen kan rak tong cang. Tutan ah Chinram lak khawh ṭhan a si ahcun, Kawl he biakamnak cu, mipi tam deuh nih an duh ko ahcun, a thar in ser khawh si cang lai. Credit: Salai C Alexander