Trump nih Amah a Leirawitu a Ngaihthiam!

Trump nih Amah a Leirawitu a Ngaihthiam!
2016 US thimnak ah Trump cu Russia nih a thli in a bawmh ti in Democrat pawl nih tehte zeihmanh um lo in mee fir an rak puh i cu kong cu an rak hlathlai ti cu nan theih cio ko lai. Trump i a riantuanhawi hna zong nih Trump cu Russia he an i pehtlai ko an ti ti in bia an tuah i US mipi nih ngunkhuai an thawhmi chung in 32 million hmang in hlathlainak kha an rak tuahter hna. Hi hlathlainak cu FBI nih tuanvo la in kum hnih renglo an tuah nain zeihmanh an hmuh lo tikah a lingtelet in Democrat lei tu kha cu kong he pehtlai in an hlathlai than hna.
Cu tikah Hillary Clinton le FBI lutlai pawl nih phone in an i kuatmi ca (text message) pawl an zoh tikah Democrat pawl FBI lutlai pawl he hrokhrol in an tuahmi a si ti kha fiang tein an hun hmuh than. (Hi kong ah Obama nih, “Kei cu ka tel lo,” tiah aa phehnak video zong Youtube ah a um ko.) Cu tikah Trump cu Russia he an i pehtlai ko tiah 2017 December (1) FBI sihah lih a rak chimtu Trump i riantuanhawi Ralbawi Michael T. Flynn kha tazacuai a si.
Flynn hi Obama president a si lioah Kilvennak Hlathlainak ah Lutlai (Director of Defence Intelligence Agency) a si i pension a lak hnu ah Trump nih president a si le cangka in Miphun Humhimnak Ruahnakpetu (National Security Advisor) ah a rian a pekmi a si. Sihmanhsehlaw Flynn tu nih cun amah a cawisangtu Trump kha FBI sinah a rak leirawi diam ko. Cucaah FBI zong nih an i zumh i kum hnih renglo an rak hlathlai. American mi tampi zong nih Trump cu phunglo in president a tuanmi a si ti in a president sinak an co hlang duh lo.
Cucaah Trump cu president a tuan ni thawk in nihin ni tiang hmanh ah ni khat hmanh din lo in an thangchiat, an soisel. Thil thatha a tuahmi hna kha CNN, ABC, CBS, BBC ti ho in 95% media hna nih an i hmuhter/theihter duh lo. Kum pi kum li chung president a tuanmi ah buaibainak a phunphun an chuahter. Vawlei cung mi vialte hmaiah US president vialte hna lakah mithalo cem ah an canter.
Flynn nih Russia Ambassador Sergey Kislyak he tonbiaruahnak an rak ngeihmi kong in Trump cu FBI sinah a rak leirawimi cu Democrat pawl le FBI lutlai pawl nih sualnak ngei lo pa Flynn kha bia an rak sawhkalh i rap ah an foihtermi a si ti cu a hun fiang cang. Flynn nih FBI sinah cucu ka chimpalhmi a si tiah nawlnak (plea) a tuah ko nain FBI pawl nih an rap in an foih cangmi a si caah an phoih duh ti lo. FBI hmai ah theih ko nabu le i timh hram in lih na chim tiin i hlipphuak kho ti loin upadi he an ngerh i an tem.
Sihmanhsehlaw a lingtelet in hlathlainak an hun tuah than i FBI i bawi pakhat nih phone in ca a kuatmi text message ah “Kan i tinhmi hi zeidah a si? Biatak chimphun maw? Asiloah taza kan cuai i a rian in phuah a si nakhnga lih dah kan chimter rih lai?” tiah a kuatmi an hmuh. Miraang ca in hitihin a tial: A senior FBI official wrote, “What’s our goal? Truth/admission or get him to lie so we can prosecute him or get him fired?”
Cucaah Department of Justice (DOJ) nih Flynn kong hi thlah (dismiss) ding le tu hnu ah FBI zong nih Flynn hi bia halter ti lo ding in an timhtuah. U.S. District Justice Emmet Sullivan lawnglawng nih cucu a duh lo. Trump nih cun Democrat pawl le FBI pawl nih hi bantuk in sualnak ngei lomi Flynn kha hramhram lo in lih ah chimtermi hi cu ningzak awk tlak thil a si a ti.
Cu tikah President Trump nih, “Ralbawi Michael T. Flynn cu Tling Khitkhet in ngaihthiam a si cang tiah lunglawm tein thawng kan thanh hna. Ralbawi Flynn le a tha tukmi a chungkhar hna, atu ahcun (Pathian sin) Lawmhnakchimnak a nuam tukmi nan nei kho cang lai ti ka hngalh ko,” tiah Nithumni ah khan Tweeter ah a tar. (US ram Lawmhnakchim Ni Thanksgiving Day hi November 26 a si.) Miraang ca in hitihin a ti: It is my Great Honor to announce that General Michael T. Flynn has been granted a Full Pardon,” Trump tweeted. “ Congratulations to GenFlynn and his wonderful family, I know you will now have a truly fantastic Thanksgiving!”
Cu tikah White House aiawh in baichimtu Nancy Pelosi (Democrat) nih hi kongkau a lingtelet in hlathlainak (counter investigation) a tuahtu FBI Sihne Ralbawi Bill Barr cu Trump tangka duh ah a tuahmi a si ti in a thangchiat. Barr hi atu lio an mee firnak kong a hlathlai cuahmah tu a si. Bill Barr nih cun, “Hihi biatak/thildik kawlnak kong lawng te a si ko. Hi ca ah hin kaa timtuah cang. Party tanhnak a thawn tuk ruangah mipi nih dinfelnak (justice) tanhnak thinlung an thlau cang mi hi ngaihchiat awk taktak a si,” tiah bia an halmi ah a leh hna. Atu tan ah Trump nih Flynn a ngaihthiammi hi a pahnihnak a si. Kha hlan ah amah a leirawitu Roger Stone zong kha thong a tlak lai te ah a rak ngaih thiam bal cang. Hi kong hi US ram ah atu lio ah media tampi nih tam taktak in an chimmi a si.
(1) Biahalnak Pakhatnak; Nang tah an leirawitu kha na ngaithiam kho hna hnga maw? Jesuh nih, “Midang kha an sualnak va ngaithiam hna u law nannih zong Pathian nih nan sualnak an ngaihthiam ve hna lai,” tiah a ti (Luka 6:27)
Cun, “Midang kha an sualnak nan ngaihthiam hna lo ahcun vancung i a ummi nan Pa zong nih nan sualnak an ngaithiam ve hna lai lo,” tiah a ti fawn (Matt. 11:26).
Cun Jesuh nih, “Mi nih nan cungah an tuahmi that lonak kha nan ngaihthiam hna ahcun, vancung i a ummi nan Pa zong nih an ngaihthiam ve hna lai. Sihmanhsehlaw mi that lonak kha nan ngaihthiam hna lo ahcun vancung i a ummi nan Pa zong nih that lonak nan tuahmi kha an ngaithiam ve hna lai lo,” tiah a ti (Matt. 6:14-15). Cucaah Bawipa thlacamnak i “Mi nih kan cungah an sual tikah kan ngaithiam hna bang in kan sualnak kha kan ngaithiam ve tuah” timi kha lih in maw na cam tawn. Kolose 3:13–“Bawipa nih an ngaihthiam hna bantukin pakhat le pakhat nan i ngaithiam lai,” timi kha ra philh hlah mu.
(2) Biahalnak Pahnihnak; Na uarmi party na tanh tuk nakah biatak asiloah thildik hmu kho lo in na um sual maw?
Na remlomi/huatmi minung/thil pakhat ruangah na tanhmi party a tanh lomi paoh kha mi thalo ah na hmu sual hna maw? Flynn nih FBI sinah a sual aa phuannak na theih duh ahcun a tanglei link kha hmet. Credit: Biak Lian Vel