Trump Hmahmuah Mi Tuluk Cu Biden Nih Avoikhatnak A Hun Khawn Chap

Trump Hmahmuah Mi Tuluk Cu Biden Nih Avoikhatnak A Hun Khawn Chap
=================
A luancia President Trump le acozah nih Tuluk ram cu fak ngai in hma an hmuah. Chawlehnak Ral a thawh pi, fak nawn tein a reem ta. Cu a phichuak cu, zahan ah US President thlennak a hun i thawk bak in Trump le US ramdang vuanci Mike Pompeo telh in Trump le acozah minung pawl cu Tuluk nih phihkharnak a tuah colh hna. Tuluk ram ah Trump a chawlehnak cu a pur ruangmang lai tinak a si. A poi a va ti lem lailo.

Cu nakin Tuluk ca ah a poi deuh mi cu tutan Presidential Inauguration ah President thar joe Biden nih Taiwan ramkaltu Hsiao Bi-khim a sawm i a va telpi ve. Hihi US le Taiwan karlak ah 1979 hnu ah avoikhatnak a hung can a si. Trump hmanh nih Biakamnak a rak tuah lio ah a rak sawm hna lo. Hsiao Bi-khim hi Taiwan president Tsai Ing-wen he ai naihniam ngai mi an si. Japan ram Kobe ah a rak chuak. Apa Taiwan, a nu US ram mi nih an hrin. Taiwan ram ah a thang i, US ram ah ramkhel a cawng mi a si. Hmailei ah Taiwan ram Nu President a tuan kho ding zong a si an ti.
Taiwan ram ahhin khoika chuak dah a si timi le Taiwan thi 50% ai tel timi nakin Taiwan ram ca ah zeitluk dah a tuan khawh lai, Taiwan mipi ca ah zeitluk dah a thathnem lai ti mi hi an zoh deuh ti a si.

“Democracy is our common language and freedon is our common objective” tiah Hsiao Bi-khim nih President Joe Biden biakam ni ah a chim. Democracy cu kan tlangholh a si. Zalonnak cu kan zapi tinhmi a si tiah a chim. US ram White House lei in chimnak nawlngeitu Emily Horne zong nih President Biden hi Asia-pacific ram ah ramhawikom pawl hna he kan rumnak le kan himnak timi hna cu thangcho cio ding in an dirpi ko hna lai tiah a chim. Hihi Asia-pacific ram hna ca ah ruahchannak a hung um ngai mi Joe Biden policy a si telai ti khawh a si. President Joe Biden nih ai thim mi ramdang vuanci Antony Blinken zong nih Joe Biden cozah chung ah Taiwan he pehltaihnak a fek lai tiah a chim. Cu leng ah President Trump nih Tuluk kar ah ruru hranghrang in a rak um hnawh mi hna zong kha “ka lung a tling” tiah a chim fawn.

Republican lei zong in tutan Taiwan ramkaltu an hun sawm mi cu an lung a tling dom ve. 1979 kum thawk khan US President Jimmy Carter nih US-Taiwan pehtlaihnak a rak chah hnu in hibantuk puai pical le tuanbia ser ni ahhin Taiwan sawm an tong tilo. Tutan ah Biden nih a hun sawm hna tikah Tuluk ca ah lungfak ngai a si. Taiwan ram Foreign Affairs Ministry zong nih lunglawmhnak cathanh an chuah colh. A ralaimi US ram President Joe Biden le acozah chan ah Tuluk le US zeidah an lawh lai? Kan ram ca ah teh ruahchannak a um lai maw? A tulio cu ai thencheu tuk mi US remhnak caan a si ti zong ti khawh a si. Zei a can lai kan ruahdamh kholo nain, Trump hmahmuah mi Tuluk cu Biden nih voikhat a hun khawn ve ko. Credit: Salai Tial Hram Ling