Trump caah Bad News bak a si ko

Pennsylvania Judge nih Trump campaign team hna nih mail in vote thlak mi million renglo cu hnawl dingin an nawlnak lawsuit cu a cohlan piak hna loh. Judge Mathew Brann nih Trump team hna nih an nawlnak cu pawm khawh asi lo a ti i, hi ti asi ahcun tuzarh ah hin Pennsylvania nih Joe Biden cu teitu ah an phuan khawh lai tinak asi. Trump hi vote 80,000 renglo in a tei ti asi.

November ni 3 ah US presidential election ah teinak hmuh aitim mi Trump caah cun Pennsylvania ah vansungh ko cu sunghnak lian taktak asi. Tu tiangin thimnak an kalpi ningah thil fello tamtuk a um tiin Trump nih a sungh mi cu a cohlang duh rih loh. Biden nih hin president Trump cu US electoral system ah 306-232 in a tei dingah ruah asi i, president sinak dingah a herh mi 270 cu lonh ngai dawh asi. Pennsylvania ah hin Judge Brann nihcun Trump campaign team hna nih vote million pa sarih renglo vote cu thah an timh tiin a chim. Court sinah dan hmangin chirhchan nei lo le lunghrinhnak menmen an phanh pi tiah a ti fawn. United state of America ah cun hi bantuk hna nihhin vote pakhat te hmanh a hnawl ter kholo tiin judge nihcun a tial fawn.

Trump campaign team hna nihcun Pennsylvania state nih US Constitution nih dan tangah humhimnak nawl a pek mi an buar tiin an chim ve. Democratic nawlngeihnak state hna nihcun voters hna cu an ballot ah fello remhthan dingin lungtlinnak an pek i, Republican state hna tu ahcun ti asi ve lo an ti. Mah lioah hin Republican cheukhat hna nihcun President Trump cu a sung cohlang dingin an nawl. Republican Pennsylvania Senator Pat Toomey nihcun Trump nih dan hmangin cawlcangh khawhnak vialte cu a hman dih cang tiin a chim i, thimnak result cu pawm cang dingin a nawl fawn.

Kan hnu zarhte ni ah khan Georgia nih kut theng tein vote an rel dih hnu i Biden a cak tiah an phuan hnu ah vote relthan dingin an duhnak an chim. Trump campaign hna nih vote relthan cu signature he ai mil maw tile thil biapi dang hna he kalpi ding asi tiin an chim. Swing state Democrats candidate Joe Biden nih teinak a hmuhnak Michigan ah Republican officials hna nih state electoral board hna cu result phuan hlan ah zarhhnih hngah dingin nawlnak an tuah. Wisconsin ahcun election officials hna nih Trump tanhtu hna cu vote relthan tlaiter timhah an puh. Trump team observer hna nih ballot kip hna cu vote rel hnuarh ter asi khawhnak dingah an cawlcang tiin an chim. Vote relthan hi December ni 1 ah dih manh dingin ti asi i, mah hlan hrimhrim ah hin Wisconsin nih a fehter manh a hau.