TNLA Laak Cia Mi Khuapi 3 Ah SAC Nih Martial Law A Thanh,TNLA Nih A Cohlang Lo. Shan ram chaklei ah TNLA nih an laak cia mi khuapi 3 ah SAC nih Martial law a thanh mi cu TNLA nih cohlang loin zulhphung chuahmi vialte kan hnawn cang tiah nihin March 6 ah cathanh an chuah ve.
Shan ram chaklei 1027 Operation lio ah Ta’ang National Liberation Army – TNLA nih an rak laak cang mi Mantung,Namhsam le Namatu peng chung vialte cu SAC nih March 4 ah Martial law a thanh hi a si.
Cu tin SAC nih Martial law a thanh mi ruang ah Ta’ang mizapi lungrethei in an um caah SAC thanhmi telh in 1027 operation chung ah rak chuah mi nawl vialte kan hnawn than tiah TNLA nih an thanh hi a si. CBN Daily News
Thawngpang dang: SAC ralhrang nih hramhram in nawlngeihnak a laak kum 3 reng lo caan chung ah Myanmar ramchung peng 61 ah Martial Law a chuah cang, tiah Data for Myanmar nih 2024, March 4 ah a thanh.
SAC ralhrang dohnak ah a thazaang ṭhawng mi Sagaing ramṭhen, Magway ramṭhen, Tanintharyi ramṭhen, Mon ramkulh, Karen ramkulh, Karenni ramkulh, Shan ramkulh le Chin ramkulh chung peng 8 telh in peng 61 ah atu bantuk in SAC ralhrang nih Martial Law a chuah hi a si.
2021 ah peng 8, 2023 ah peng 48 le 2024 ah peng 5 hna cu SAC ralhrang nih Martial Law a chuah i, cu chung ah Shanram chaklei ah Momeik peng le Mabein peng an i tel. Atu 2024, March 4 ah Mantong peng, Namhsan peng le Namtu peng hna zong an telh chih ve, tiah Data for Myanmar nih a langhter.
SAC ralhrang nih Martial Law a chuahnak pengchung hna ah 2014 milu rel ningin minung Nuai ( leng khuasaknak hmun a si, tiah a langhter.
SAC ralhrang nih nawlngeihnak a laak 2021, May 13 ah Chinram, Mindat peng cu Martial Law a chuah i Myanmar ramchung ah Martial Law a chuah hmasa biknak a si.
2023, February 2 ahcun Chinram, Tedim, Tonzang, Falam, Kanpetlet, Matupi, Thantlang le Hakha a zapi fonh peng 7 chung ah SAC ralhrang nih Martial Law a chuah ṭhan i Paletwa peng tu cu aa tel lo, tiah theih a si.