Ka Nau le he kan Diary II
===================
Ka Nau le lak ah a ka soi peng mi le zu ding hlah tiah a ka si pengmi cu Tial Chawn a si. Anih hi Pathian Dawtnak a theih hnu in zukhmuam zei taktak hmanh a tawng lo i sikvelh zong a hmang bak lomi a si. A pa hi Siangcachim a si i kan khua zongah ca a rak chim balmi a si. A pa thih hnu in Aa Chawn cu a Nu nih pa can bantuk in aa bochanmi fapa fel taktak a si. Rampi huap Bawlung chuih zongah Chin State in thim mi a rak si lengmang ve.
Kan naule he kan rak iceih tawn mi cu ral kan tei cun URF club tiin Bawlung team kan dirh lai i kei Coach ka si lai nannih nan chuih lai. Kum khat voikhat in Revolution Cup kan tuah lai tiah kan rak ti tawn. Asinain tu cu mi kan tling ti lo. URF cu Ngun Cung Lian, Van Biak Thawng, Sui Lian, Tial Chawn, Lai Kulh, Cung Awi, tiin bawlung chuih thiamthiam pa thawng an rak tor.
Aa Chawn hi Chuncung i May 16 ah Tatmah 77 he kan rak i kah lio ah a hnu bik tiang a rak kaptu a si. Mi ralttha a si. Kan tei hna lo tikah hnu kan rak tawn i anih amah te lawng in Chuncung khua chungah a rak lut. Mah zan cu Ralhrang zong Chuncung ah an rak lut ve. Kan ipehtlaih khawh lo caah a ka thihtak rua tiah ka ngaih a rakchiat tuk lioah a riahnak nih an rak ka chawnh i ka rak ilawmhtuk kha ka philh kho lo.
Voikhat cu lam kan zawh lioah Mitthli bomb in an kan cheh Meithahnak motor in ti an kan kah. Kan celh ve lo i Tial Chawn he chai in kan chaih ve hna lai kan ti. Aa Chawn cu Salai Ca Kam Tluangneh nih a rak thlauh khawh kei bel hohmanh nih an ka thlauh lo i ti in a kan kap tu pa a cal ah ka rak chaih. Zarhkhat hnu ah CDM a tuah i Victoria Base ah kan rak itong, a ka hngal lo nain ka rak iphuhrung ngai. Kan uu le cheukhat nih na rak chaihmi ruang hna ah CDM a tuahmi si kho men si a ttha tuk ko tiah capo in an rak ka ti.
Cun nikhat cu Carson Hall pawngah lamzawhmi vialte kan iton lioah ngiatthlai phun in Traffic Police (Motor PK) pawl motor he an ra i lamkam kan chiahmi Cycle an pah. An ka chimh i ka va kal cu Aa Chawn nih velh a rak timh i PK pa nih cun a khuk aa i bil i Aa Chawn cu a rak nawl len ko. Pastor pawl nih Aa Chawn cu an thloh i a rak vel than lo. A herhnak ahcun Aa Chawn cu ttih zong a ngei lo nain a herh lomi kanmah hna bang sikvelh tuktak bel cu duh hrimhrim a duh lo. A lungput kha ka ruah tthan tikah Pasal taktak a rak si.
Tial Chawn cu mi sawhhrawk taktak zong a si. Voikhat cu kan riahnak ah umharphen ah tiin phe kan i kah hna. ZaHre Lian he an ttang i Aa Chawn nih cun a thli tein Hawkom ham tiah a ti. Pa Hre nih cun Hawkom cu a ham i kan vun ikah cu Pa Hre cu Hawkom pakhat hmanh a rak ngei lo.
A thih lai te ah khan kan khua lei in Hakha pawng deuh ah kan itthial. Khua ah thil an philh i va la uh ka ti hna. A va kal cu rian ka fialmi cu pingpalo pi a rak chuahpi i ka rak thah deng. U Aung na thintawi le na ziachiat ning hi cu zai he hrim hi naa tlak lo eh tiah a rak ka ti.
A thih lai hi ka chimhmi zong a rak ngai lo, ka sik zongah a ka nih i sik le zai he naa tlak lo tuk tiah thideng in a ka nih i a rak ka soi. Sik awk zong a rak ttha lo. A ka thihtak lai rak hngalning law cu mu ka rak si siang hnga lo. By Salai Vokawk